ຈີນ ຍັງຮັກສາການເຕີບໃຫຍ່ທາງເສດຖະກິດໄດ້ຢ່າງໝັ້ນທ່ຽງ

300

ທ່ານ ຢີກາງ ຜູ້ວ່າການທະນາຄານກາງຈີນ ກ່າວວ່າ: ລັດຖະບານຈີນ ຍັງຮັກສາເຕີບໃຫຍ່ທາງເສດຖະກິດເອົາໄວ້ໄດ້ຢ່າງໝັ້ນທ່ຽງ ໃນປີ 2019 ດ້ວຍດັດຊະນີຕ່າງໆທີ່ສຳຄັນຂອງເສດຖະກິດລ້ວນຢູ່ໃນເຂດທີ່ສົມເຫດສົມຜົນ ເຖິງວ່າເສດຖະກິດຈີນ ທີ່ມີຂະໜາດໃຫຍ່ເປັນອັນດັບ 2 ຂອງໂລກ ຍັງຄົງປະເຊີນກັບບັນຫາເສດຖະກິດຢ່າງໃຫຍ່ຫຼວງທີ່ມີປັດໄຈຈາກພາຍນອກກໍຕາມ.

ທັງນີ້, ຈີນ ໄດ້ບັນລຸຄວາມຄືບໜ້າຫຼາຍໃນການປັບໂຄງສ້າງເສດຖະກິດ, ຄວາມຕ້ອງການ ແລະ ການສະໜອງຢູ່ໃນລະດັບທີ່ກ້ຳເກິ່ງ ໂດຍພື້ນຖານ ແລະ ຄວາມເຕີບໃຫຍ່ມີຄວາມໝັ້ນຄົງຫຼາຍຂຶ້ນ.

ໃນຕົ້ນປີ 2019 ຕົວເລກລວມຍອດຜະລິດຕະພັນພາຍໃນປະເທດ ຫຼື GDP ຂອງຈີນ ຢູ່ທີ່ລະດັບ 6,2% ໂດຍຕົວເລກດັ່ງກ່າວກໍຖືເປັນການປະກອບສ່ວນໃຫ້ແກ່ເສດຖະກິດໃນທົ່ວໂລກ.

ຂະນະດຽວກັນເມື່ອກາງເດືອນຕຸລານີ້ ອົງການສະຖິຕິແຫ່ງຊາດຈີນ ກໍໄດ້ປະກາດຕົວເລກສະຖິຕິ ໂດຍໄດ້ໃຫ້ຮູ້ວ່າ: ໃນ 9 ເດືອນຕົ້ນປີນີ້ GDP ຂອງຈີນ ບັນລຸມູນຄ່າ 69.779,8 ຕື້ຢວນ ເຕີບໂຕ 6,2% ເມື່ອປຽບທຽບໃສ່ໄລຍະດຽວກັນຂອງປີກ່ອນ, ເມື່ອເບິ່ງຕົວເລກຕາມໄຕມາດແລ້ວເຫັນວ່າໄຕມາດທີ 1 ຂອງປີນີ້ ເຕີບໂຕທີ່ 6,4%, ໄຕມາດທີ 2 ເຕີບໂຕ 6,2% ແລະ ໄຕມາດທີ 3 ເຕີບໂຕ 6%.

ທີ່ມາ: ໜັງສືພິມ ເສດຖະກິດ-ການຄ້າ