ຜູ້ນໍາ ຊີເລ ປະກາດຍົກເລີກຂຶ້ນຄ່າລົດໄຟຟ້າໃຕ້ດິນຫຼັງເກີດການຕໍ່ຕ້ານ

263

ປະທານາທິບໍດີ ເຊບາດຕຽນ ປີເນຣາ ປະກາດຍົກເລີກຂຶ້ນຄ່າລົດໄຟຟ້າໃຕ້ດິນຫຼັງເກີດການປະທ້ວງຕໍ່ຕ້ານການຂຶ້ນຄ່າລົດໄຟຟ້າໃຕ້ດິນຂອງນັກສຶກສາຈົນເຮັດໃຫ້ລັດຖະບານຕ້ອງປະກາດພາວະສຸກເສີນເພື່ອປາບປາມຜູ້ຊຸມນຸມ.

ທະຫານ ຊີເລ ອອກລາດຕະເວນໃນນະຄອນຫຼວງຊານດີອາໂກ ເປັນຄັ້ງທໍາອິດໃນຮອບເກືອບ 30 ປີ ຍັງບໍ່ເປັນທີ່ແນ່ນອນວ່າຄໍາປະກາດຍົກເລີກຂຶ້ນຄ່າລົດໄຟຟ້າໃຕ້ດິນໃນຄັ້ງນີ້ຈະເຮັດໃຫ້ຜູ້ຊຸມນຸມພໍໃຈ ແລະ ຢຸດການກໍ່ຈະລາຈົນ ຫຼື ບໍ່.

ລັດຖະບານຊີເລ ໃຫ້ເຫດຜົນສໍາລັບການຂຶ້ນຄ່າລົດໄຟຟ້າໃຕ້ດິນວ່າເປັນສິ່ງຈໍາເປັນ ເນື່ອງຈາກລາຄາພະລັງງານເພີ່ມສູງຂຶ້ນ ແລະ ເງິນຂອງ ຊີເລ ມີຄ່າຫຼຸດລົງ.

ຢ່າງໃດກໍຕາມ, ປະຊາຊົນ ຊີເລ ຈໍານວນໜຶ່ງບໍ່ເຊື່ອຄໍາປະກາດຍົກເລີກຂອງລັດຖະບານ ແລະ ພາກັນອອກມາໂຮມຊຸມນຸມ ໂດຍຈູດເຜົາທໍາລາຍສະຖານີລົດໄຟຟ້າ ແລະ ຈູດໄຟເຜົາຕຶກບໍລິສັດໄຟຟ້າຫຼາຍແຫ່ງ.

ທີ່ມາ: ໜັງສືພິມ ເສດຖະກິດ-ການຄ້າ