ເກີດເຫດຂົວທາງຫຼວງຫັກເພລົງໃນປະເທດຈີນ

398

ເກີດເຫດຂົວທາງຫຼວງແຫ່ງໜຶ່ງ ຫັກເພຖະຫຼົ່ມລົງ ໃນມົນທົນຈຽງຊູ ທາງພາກຕາເວັນອອກຂອງປະເທດຈີນ ເຮັດໃຫ້ມີລົດໃຫຍ່ຫຼາຍຄັນຕິດຢູ່ກ້ອງຊາກຂົວທີ່ຫັກເພ ທາງເຈົ້າໜ້າທີ່ກູ້ໄພເລັ່ງໃຫ້ການຊ່ວຍເຫຼືອ.

ສຳນັກຂ່າວເອເອັຟພີລາຍງານຈາກເມືອງຫວູ່ສິມ ມົນທົນຈຽງຊູ ປະເທດຈີນ ເມື່ອວັນພະຫັດ ທີ 10 ຕຸລາ ວ່າ ສະຖານີໂທລະພາບ CCTV ໄດ້ລາຍງານວ່າ ເກີດເຫດຂົວທາງຫຼວງແຫ່ງໜຶ່ງໄດ້ຫັກເພລົງ ເມື່ອເວລາປະມານ 18:00 ໂມງຂອງວັນພະຫັດ ທີ 10 ຕຸລາ ຜ່ານມາ ຕາມເວລາທ້ອງຖິ່ນ ໃນເມືອງຫວູ່ສິມ ມົນທົນຈຽງຊູ ທາງພາກຕາເວັນອອກຂອງຈີນ ແລະ ຫ່າງຈາກນະຄອນຊຽງໄຮໄປທາງທິດຕາເວັນຕົກສຽງເໜືອ ປະມານ 100 ກິໂລແມັດ.

ໜັງສືພິມປະຊາຊົນລາຍວັນ (People’s Daily) ໄດ້ລາຍງານວ່າ ເຈົ້າໜ້າທີ່ກູ້ໄພໄດ້ເລັ່ງໃຫ້ຄວາມຊ່ວຍເຫຼືອແລ້ວ ແລະ ຍັງມີລົດໂຮງໝໍ ປະມານ 10 ຄັນ ມາຮອດສະຖານທີ່ເກີດເຫດ ພາບຂ່າວຍັງສະແດງໃຫ້ເຫັນລົດໃຫຍ່ຢ່າງໜ້ອຍ 2 ຄັນ ຢູ່ກ້ອງຊາກຫັກເພ.

CCTV ລາຍງານວ່າ ມີລົດໃຫ້ 3 ຄັນ ຖືກຊາກຂົວຫັກເພທັບ ລວມທັງມີອີກຄັນໜຶ່ງທີ່ຈອດຢູ່ ແຕ່ບໍ່ມີຄົນຢູ່ໃນລົດ ຂະນະທີ່ ເຈົ້າ ໜ້າທີ່ທ້ອງຖິ່ນເຊື່ອວ່າ ຂົວຫັກເພລົງມາຍ້ອນລົດບັນທຸກນໍ້າໜັກເກີນອັດຕາ.