ຢູເອັນ ອາດຈະບໍ່ມີງົບຈ່າຍເງິນເດືອນ ຮຽກຮ້ອງໃຫ້ສະມາຊິກເລັ່ງຊຳລະໜີ້ຄ້າງ

371

ເລຂາທິການສະຫະປະຊາຊາດ ຫຼື UN ກ່າວວ່າ ອົງການສະຫະປະຊາຊາດ ອາດຈະບໍ່ມີເງິນພຽງພໍໃນການຈ່າຍເງິນເດືອນໃຫ້ແກ່ເຈົ້າໜ້າທີ່ ໃນເດືອນໜ້າ ຖ້າປະເທດສະມາຊິກບໍ່ຊໍໍຳລະໜີ້ທີ່ຄ້າງຢູ່.

ສຳນັກຂ່າວຣອຍເຕີ ລາຍງານວ່າ ທ່ານອັນໂຕນິໂອ ກູແຕເຣສ ໄດ້ກ່າວກັບຄະນະກຳມະການງົບປະມານສະມັດຊາໃຫຍ່ສະຫະປະຊາຊາດ ວ່າ ຖ້າບໍ່ຫາທາງແກ້ໄຂການຫຼຸດຜ່ອນຄ່າໃຊ້ຈ່າຍມາຕັ້ງແຕ່ເດືອນມັງກອນ ສະຫະປະຊາຊາດຈະບໍ່ມີງົບປະມານພຽງພໍ ໃນການຈັດກອງປະຊຸມ ເມື່ອເດືອນ ຜ່ານມາ.

ສ່ວນໃນເດືອນຕຸລາ ນີ້, ສະຫະປະຊາຊາດຈະຂາດດຸນຫຼາຍທີ່ສຸດໃນຮອບທົດສະວັດ ແລະ ມີຄວາມສ່ຽງທີ່ຈະບໍ່ມີເງິນພຽງພໍ ສຳລັບຈ່າຍເງິນເດືອນພະນັກງານໃນເດືອນໜ້າ ການເຮັດວຽກ ແລະ ການປະຕິຮູບຕ່າງໆ ຈະຕົກຢູ່ໃນຄວາມສ່ຽງ. ໂດຍຕົວທ່ານໄດ້ເລີ່ມໃຊ້ມາດຕະການພິເສດ ຕັ້ງແຕ່ເດືອນ ຜ່ານມາ ເຊັ່ນ: ບໍ່ຈ້າງພະນັກງານມາແທນ ຕຳແໜ່ງທີ່ຍັງວ່າງຢູ່, ອະນຸມັດການເດີນທາງສະເພາະວຽກງານທີ່ຈຳເປັນ, ເລື່ອນ ຫຼື ຍົກເລີກບາງກອງປະຊຸມບາງງານ.

ຣອຍເຕີ ໄດ້ເຜີຍອີກວ່າ ສະຫະລັດ ອາເມຣິກາ ເປັນຜູ້ສະໜັບສະໜຸນງົບປະມານລາຍໃຫຍ່ທີ່ສຸດຂອງສະຫະປະຊາຊາດ ໃນອັດຕາ 22% ຂອງງົບປະມານປົກກະຕິໃນປີ 2019 ທີ່ໄດ້ກຳນົດໄວ້ ກວ່າ 3,3 ຕື້ໂດລາ (ກວ່າ 29 ພັນຕື້ກີບ) ສຳລັບການດຳເນີນວຽກງານທາງການເມືອງ, ມະນຸດສະທຳ, ການປົດອາວຸດ, ເສດຖະກິດ, ສັງຄົມ ແລະ ການສື່ສານ. ສະຫະລັດ ອາເມຣິກາ ຍັງຄ້າງຊຳລະເງິນສະໜັບສະໜຸນ ງົບປະມານປົກກະຕິປີນີ້ ປະມານ 674 ລ້ານໂດລາ (ປະມານ 5,9 ພັນຕື້ກີບ) ແລະ ຫຼາຍປີກ່ອນໜ້ານີ້ ລວມກັນ 381 ລ້ານໂດລາ (ປະມານ 3,3 ພັນຕື້ກີບ). ສ່ວນຄະນະຜູ້ແທນຖາວອນຂອງສະຫະລັດ ປະຈຳຢູເອັນ ກໍ່ອອກມາຢືນຢັນຈຳນວນດັ່ງກ່າວວ່າ ເປັນຄວາມຈິງ.

ຂະນະທີ່ ໂຄສົກຂອງອົງການສະຫະປະຊາຊາດ ກ່າວວ່າ ມາຮອດປັດຈຸບັນ 129 ປະເທດສະມາຊິກ ໄດ້ຊຳລະເງິນສະໜັບສະໜຸນງົບປະມານປົກກະຕິໃນປີນີ້ ຄົບແລ້ວ ລວມມູນຄ່າເກືອບ 2.000 ລ້ານໂດລາ (ກວ່າ 17,6 ພັນຕື້ກີບ).