ລົດເມຕຳກັບລົດບັນທຸກ ເສຍຊີວິດ 36 ຄົນ ບາດເຈັບ 36 ຄົນ ໃນປະເທດຈີນ

353

ລົດເມໂດຍສານ ເກີດອຸບັດຕິເຫດຢາງແຕກ ເສຍຫຼັກຂ້າມເລນໄປຕຳກັບລົດບັນທຸກທີ່ແລ່ນສວນທາງມາ ເທິງທາງດ່ວນລະຫວ່າງເມືອງ ທາງພາກຕາເວັນອອກຂອງຈີນ ເຮັດໃຫ້ມີຜູ້ເສຍຊີວິດຢ່າງໜ້ອຍ 36 ຄົນ ບາດເຈັບ 36 ຄົນ.

ສຳນັກຂ່າວເອເອັຟພີ ແລະ ຣອຍເຕີ ລາຍງານຈາກນະຄອນຫຼວງປັກກິ່ງ ປະເທດຈີນ ເມື່ອວັນອາທິດ ທີ 29 ກັນຍາ ວ່າລົດເມທີ່ມີຜູ້ໂດຍສານເທິງລົດ 69 ຄົນ ເສຍຫຼັກຂ້າມຄູກາງທາງໄປຕຳກັບລົດບັນທຸກ ເຊິ່ງມີຄົນຂັບລົດ ແລະ ຜູ້ໂດຍສານ 3 ຄົນ ທີ່ກຳລັງແລ່ນສວນມາຈາກອີກຟາກໜຶ່ງຂອງທາງດ່ວນສາງຊຸນ – ເສິນເຈິ້ນ ໃນເຂດເມືອງອີ້ຊິງ ມົນທົນຈຽງຊູ ທາງພາກຕາເວັນອອກຕອນກາງຂອງຈີນ ເມື່ອເຊົ້າວັນເສົາ ທີ 28 ກັນຍາ ຜ່ານມາ.

ຖະແຫຼງການຈາກອົງການຄວາມໝັ້ນຄົງສາທາລະນະຂອງເມືອງອີ້ຊິງ ກ່າວວ່າ ການສືບສວນເບື້ອງຕົ້ນພົບວ່າ ອຸບັດຕິເຫດແມ່ນເກີດຈາກລົດເມໂດຍສານຢາງໜ້າເບື້ອງຊ້າຍແຕກ ມີຜູ້ເສຍຊີວິດໃນເຫດການ 36 ຄົນ ໄດ້ຮັບບາດເຈັບ 36 ຄົນ ໂດຍ 9 ຄົນໃນຈຳນວນນີ້ ອາການສາຫັດ ສ່ວນອີກ 26 ຄົນ ບາດເຈັບເລັກນ້ອຍ ແລະ ອີກ 1 ຄົນ ທ່ານໝໍຈາກໂຮງໝໍທ້ອງຖິ່ນໄດ້ອະນຸຍາດໃຫ້ກັບເຮືອນໄດ້.

ຖະໜົນທາງດ່ວນລະຫວ່າງເມືອງສາງຊຸນ – ເສິນເຈິ້ນ ໄດ້ກັບມາເປີດໃຫ້ລົດແລ່ນຜ່ານອີກຄັ້ງ ພາຍຫຼັງໃຊ້ເວລາໃນການເກັບກູ້ດົນ 8 ຊົ່ວໂມງ.

ອຸບັດຕິເຫດທີ່ຮ້າຍແຮງຕາມທ້ອງຖະໜົນ ເກີດຂຶ້ນເປັນເລື່ອງປົກກະຕິໃນປະເທດຈີນ ເຊິ່ງສ່ວນຫຼາຍເກີດຈາກການບໍ່ເອົາໃຈໃສ່ກົດລະບຽບຈາລະຈອນ ຈາກຂໍ້ມູນທາງການໃນຮອບປີ 2015 ເຊິ່ງເປັນຂໍ້ມູນຫຼ້າສຸດທີ່ຮວບຮວມໄດ້ ມີຜູ້ເສຍຊີວິດ ປະມານ 58 ພັນຄົນ ຈາກອຸປະຕິເຫດທາງຖະໜົນໃນທົ່ວປະເທດຈີນ.