ທ້າຍອາທິດນີ້ 2 ດາວເຄາະນ້ອຍຈະເຄື່ອນທີ່ຜານໂລກ ໃນໄລຍະໃກ້ທີ່ສຸດ

428

ໃນທ້າຍອາທິດນີ້ດາວເຄາະນ້ອຍສອງດວງ “2010 CO1” ແລະ “2000 QW7” ຈະເຄື່ອນທີ່ຜ່ານໃກ້ໂລກ ໃນໄລຍະໄລ່ເລ່ຍກັນ ອົງການນາຊາ ຢືນຢັນ “ບໍ່ມີຜົນກະທົບຕໍ່ໂລກ”.

ສຳນັກຂ່າວຕ່າງປະເທດລາຍງານວ່າ ໃນທ້າຍອາທິດນີ້ ຈະມີປະກົດການທາງທຳມະຊາດ ຢູ່ຊັ້ນນອກບັນຍາກາດຂອງໂລກ ໂດຍດາວເຄາະນ້ອຍ 2 ດວງ ຈະເຄື່ອນທີ່ຜ່ານໂລກ ໃນໄລຍະທີ່ໃກ້ຫຼາຍ ແຕ່ທາງອົງການນາຊາ (NASA) ໄດ້ຢືນຢັນວ່າ ດາວເຄາະນ້ອຍທັງສອງດວງ ຈະບໍ່ມີຜົນກະທົບ ຫຼື ເປັນອັນຕະລາຍກັບໂລກ.

ອົງການນາຊາ ໄດ້ເປີດເຜີຍວ່າ ໃນທ້າຍອາທິດນີ້ ດາວເຄາະນ້ອຍ 2010 CO1 ມີຄວາມຍາວ 260 ແມັດ ຈະເຄື່ອນທີ່ຜ່ານໂລກໃນໄລຍະຫ່າງປະມານ 5,3 ລ້ານກິໂລແມັດ ດາວເຄາະນ້ອຍດວງນີ້ ຈະເຂົ້າໃກ້ໃນໄລຍະກາງຄືນຂອງວັນທີ 13 ກັນຍາ ຕາມເວລາໃນສະຫະລັດ ຫຼື ຕອນບ່າຍຂອງວັນທີ 14 ຕາມເວລາປະເທດລາວ.

ຫຼັງຈາກນັ້ນ ບໍ່ເທົ່າໃດຊົ່ວໂມງ ດາວເຄາະນ້ອຍ 2000 QW7 ເຊິ່ງເປັນວັດຖຸອະວະກາດທີ່ມີຄວາມຍາວປະມານ 650 ແມັດ ແລະ ຖືວ່າເປັນວັດຖຸທີ່ມີຂະໜາດໃຫຍ່ ເຊິ່ງຜ່ານມາໃກ້ໂລກທີ່ສຸດໃນເດືອນນີ້. ດາວເຄາະນ້ອຍດວງນີ້ ຈະເຄື່ອນເຂົ້າໃກ້ໂລກໃນຕອນເຊົ້າມືດຂອງວັນທີ 14 ກັນຍາ ຕາມເວລາສະຫະລັດ ຫຼື ໄລຍະຫົວຄໍ່າຂອງວັນດຽວກັນ ຕາມເວລາໃນປະເທດລາວ.

ສຳລັບດາວເຄາະນ້ອຍ ທັງສອງດວງນີ້ ນັກວິທະຍາສາດໄດ້ຄົ້ນພົບ ແລະ ເຝົ້າຕິດຕາມເບິ່ງເສັ້ນທາງເຄື່ອນທີ່ຂອງພວກມັນເປັນເວລາຫຼາຍທົດສະວັດ ໂດຍໃນຄັ້ງນີ້, ວັດຖຸອະວະກາດຈະບໍ່ມີຜົນກະທົບໃດໆກັບໂລກ ພຽງແຕ່ເຄື່ອນທີ່ ຜ່ານໂລກໃນໄລຍະໃກ້ກວ່າປົກກະຕິເທົ່ານັ້ນ.

ຕາມລາຍງານ ລະບຸວ່າ ດາວເຄາະນ້ອຍ 2000 QW7 ຖືກຄົ້ນພົບ ເມື່ອ 20 ປີກ່ອນ ເພາະມັນມີປະຕິກິລິຍາເຄື່ອນທີ່ແບບຜິດປົກກະຕິ ຫຼັງຈາກທີ່ມັນເຄື່ອນທີ່ຜ່ານໂລກໄປແລ້ວໃນຄັ້ງນີ້ ກໍ່ຈະມີເສັ້ນທາງວົນຢ້ອນກັບມາເຂົ້າໃກ້ໂລກອີກຄັ້ງ ອີກ 19 ປີຂ້າງໜ້າ ຫຼື ໃນປີ 2038.