ນະຄອນນິວຢອກ ອອກກົດໝາຍ ໃຫ້ໂຮງຮຽນ ເຮັດພິທີລະນຶກເຫດການ “ວັນທີ 9-11” ທຸກປີ

377

ນະຄອນນິວຢອກ ມີມະຕິເຫັນດີອອກົດໝາຍໃຫ້ໂຮງຮຽນຂອງລັດທົ່ວນະຄອນນິວຢອກ ຈັດພິທີຢືນສະຫງົບເພື່ອລະນຶກເຫດການໂສກນາຕະກຳ “ວັນທີ 9-11” ທຸກປີ ໂດຍກົດໝາຍມີຂໍ້ບັງຄັບໃຊ້ທັນທີ.

ສຳນັກຂ່າວຕ່າງປະເທດລາຍງານຈາກນະຄອນນິວຢອກ ປະເທດສະຫະລັດ ອາເມຣິກາ ເມື່ອວັນອັງຄານ ທີ 10 ກັນຍາ ວ່າ ນັກຮຽນຫຼາຍສິບພັນຄົນທຸກໂຮງຮຽນຂອງລັດຖະບານທົ່ວນະຄອນນິວຢອກ ຈະຮ່ວມກັນຢືນສະຫງົບເພື່ອລະນຶກເຖິງວັນຄົບຮອບ 18 ປີ ເຫດໂສກນາຕະກຳ ເມື່ອວັນທີ 9/11 ໃຫ້ເປັນໄປຕາມກົດໝາຍສະບັບໃໝ່ຂອງລັດ.

ເມື່ອວັນຈັນ ທີ 9 ກັນຍາ ຜ່າານມາ ທ່ານແອນດຣູ ຄູໂອໂມ (Andrew Cuomo) ເຈົ້າຄອງນະຄອນນິວຢອກ ປະກາດການສ້າງຕັ້ງວັນລະນຶກເຫດການ ວັນທີ 11 ກັນຍາ ໂດຍອອກກົດໝາຍໃຫ້ໂຮງຮຽນຂອງລັດຖະບານທົ່ວລັດນິວຢອກຈັດພິທີຢືນສະຫງົບ ເພື່ອລະນືກເຖິງເຫດດັ່ງກ່າວ ກ່ອນເຂົ້າຮຽນ ຂອງທຸກປີ.

ຖະແຫຼງການຈາກຫ້ອງການຂອງເຈົ້າຄອງນະຄອນນິວຢອກ ລະບຸວ່າ ກົດໝາຍສະບັບນີ້ ມີຈຸດປະສົງເພື່ອ “ການສົ່ງເສີມການສົນທະນາ ແລະ ການສຶກສາໃນຫ້ອງຮຽນ” ແລະ ຮັບຮອງໃຫ້ຄົນຮຸ່ນຫຼັງຈະມີຄວາມຮູ້ຄວາມເຂົ້າໃຈກ່ຽວກັບເຫດໂສກນາຕະກຳດັ່ງກ່າວ ເຊິ່ງພາກຊີວິດປະຊາຊົນ ຫຼາຍກ່ວາ 3 ພັນຄົນ.

ທ່ານຄູໂອໂມ ຖະແຫຼງວ່າ “ເຫດການ “9/11 ເປັນໜຶ່ງໃນໄລຍະເວລາທີ່ມືດມົນເສົ້າສະຫຼົດທີ່ສຸດຂອງນະຄອນນິວຢອກ ແລະ ປະຫວັດສາດຂອງຊາດ. ພວກເຮົາມີພັນທະດ້ານສິນທຳຕໍ່ບຸກຜູ້ຄົນທີ່ພວກເຮົາໄດ້ສູນເສຍ ແລະ ມີຄວາມກ້າຫານເສຍສະຫຼະນັບບໍ່ຖ້ວນທີ່ແລ່ນຜ່ານຜ່າອັນຕະລາຍເພື່ອໃຫ້ຄວາມຊ່ວຍເຫຼືອເຊິ່ງກັນ ແລະ ກັນ ໃນມື້ນັ້ນ. ພວກເຮົາຈະເຮັດທຸກຢ່າງ ເພື່ອຮັກສາຄວາມຊົງຈຳຂອງພວກເຂົາໃຫ້ກ້າວເດີນຕໍ່ໄປ.”

“ດ້ວຍການສ້າງຕັ້ງວັນຄົບຮອບການລະນຶກ ແລະ ການຈັດກິດຈະກຳຢືນສະຫງົບໄວ້ອາໄລ ໃນໂຮງຮຽນຂອງພາກລັດ ພວກເຮົາໝັ້ນໃຈໄດ້ວ່າ ພວກເຮົາຈະບໍ່ມີວັນລືມ ບໍ່ພຽງແຕ່ເຈັບປວດໃນໄລຍະທີ່ຍາກລຳບາກເຫຼົ່ານັ້ນ ແຕ່ຍັງລວມເຖິງຄວາມກ້າຫານ, ການເສຍສະຫຼະ ແລະ ຄວາມຮັກອັນລົ້ນເຫຼືອ ທີ່ເຮັດໃຫ້ຄວາມຮູ້ສຶກຂອງພວກເຮົາໃນຕອນນີ້ ມີຕໍ່ເຫດການໃນຄັ້ງນັ້ນ” ທ່ານຄູໂອໂມ ກ່າວຕື່ມ.

ດ້ານທ່ານໂຈເຊຟ ພີ ອາດັບໂບ (Joseph P. Addabbo) ສະມາຊິກສະພາຂອງລັດ ແລະ ທ່ານສະເຕຊີ ເຟັຟເຟີ ອາມາໂຕ (Stacey Pheffer Amato) ສະມາຊິກສະພາຜູ້ແທນປະຊາຊົນຂອງລັດ ເຊິ່ງເປັນຜູ້ສະໜັບສະໜູນກົດໝາຍສະບັບນີ້ ລະບຸລະຫວ່າງກ່າວຖະແຫຼງການ ວ່າ ພວກເຂົາຫວັງເປັນຢ່າງຍິ່ງ ວ່າ ຄວາມສຳຄັນຂອງເຫດການໂສກນາຕະກຳ ຈະໄດ້ຮັບຄວາມສົນໃຈຈາກນັກຮຽນລຸ້ນຫຼັງຂອງໂຮງຮຽນລັດຖະບານ ເຊິ່ງສ່ວນໃຫຍ່ ມີອາຍຸຕໍ່າກວ່າ 18 ປີ ແລະ ອາຍຸນ້ອຍເກີນກວ່າຈະຮັບຮູ້ໃນເຫດການຄັ້ງນັ້ນ.

ທັງນີ້ ກົດໝາຍສະບັບດັ່ງກ່າວ ມີຜົນບັງຄັບໃຊ້ໂດຍທັນທີ.