ລົດໄຟຕໍາກັບລົດບັນທຸກ ເຈັບ 14 ໃນເມືອງໂຢໂກຮາມ້າ ປະເທດຍີ່ປຸ່ນ

315

ລົດໄຟຕຳກັບລົດບັນທຸກ ຢູ່ຈຸດຂ້າມທາງລົດໄຟໃນເມືອງໂຢໂກຮາມ້າ ປະເທດຍີ່ປຸ່ນ ສົ່ງຜົນໃຫ້ມີຜູ້ໄດ້ຮັບບາດເຈັບ 35 ຄົນ, ໃນຈໍານວນນີ້ ອາການສາຫັດ 1 ຄົນ.

ສຳນັກຂ່າວເອເອັຟພີລາຍງານຈາກນະຄອນຫຼວງໂຕກຽວ ປະເທດຍີ່ປຸ່ນ ເມື່ອວັນພະຫັດ ທີ 5 ກັນຍາ ວ່າ ທ່ານຣຽວ ນາງາກຸຣະ ເຈົ້າໜ້າທີ່ຝ່າຍຄຸ້ມຄອງວິກິດການຂອງເມືອງໂຢໂກຮາມ້າ ກ່າວວ່າ ອຸບັດຕິເຫດລົດໄຟຕຳກັບລົດບັນທຸກບໍລິເວນຈຸດທາງຂ້າມທາງລົດໄຟ ໃນເມືອງໂຢໂກຮາມ້າ ທາງທິດໃຕ້ຂອງນະຄອນຫຼວງໂຕກຽວ ມີຜູ້ໄດ້ຮັບບາດເຈັບ 35 ຄົນ ໃນຈໍານວນນີ້ ໄດ້ຮັບບາດເຈັບສາຫັດ 1 ຄົນ ມີອາການຫົວໃຈຢຸດເຕັ້ນ. ໂດຍສື່ທ້ອງຖິ່ນລາຍງານດ້ວຍວ່າ ຄົນຂັບລົດບັນທຸກອາດຈະຕິດຢູ່ໃນລົດບັນທຸກທີ່ຖືກລົດໄຟທັບຢູ່.

ທັງນີ້ ການໃຫ້ບໍລິການລົດໄຟຍີ່ປຸ່ນມີຊື່ສຽງດ້ານຄວາມປອດໄພ ແລະ ກົງຕໍ່ເວລາ ອຸບັດຕິເຫດຈຶ່ງບໍ່ຄ່ອຍຈະເກີດຂື້ນ ແຕ່ເມື່ອຕົ້ນປີ ຜ່ານມາ ໃນເຂດຊານເມືອງນະຄອນຫຼວງໂຕກຽວ ມີຜູ້ໄດ້ຮັບບາດເຈັບເລັກນ້ອຍ 14 ຄົນ ເນື່ອງຈາກລົດໄຟບໍ່ມີຄົນຂັບ ຈຶ່ງແລ່ນຜິດລາງ ເຮັດໃຫ້ລົດແລ່ນໄປຕຳກັບກໍາແພງຂັ້ນທາງ ແລະ ຍັງມີເຫດການເມື່ອເດືອນເມສາ ປີ 2005 ລົດໄຟຕົກລາງໃກ້ເມືອງໂອຊາກ້າ ຂະນະທີ່ແລ່ນມາດ້ວຍຄວາມໄວເທິງລາງທີ່ເປັນທາງໂຄ້ງ ສົ່ງຜົນໃຫ້ມີຜູ້ເສຍຊີວິດ 107 ຄົນ ແລະ ບາດເຈັບຫຼາຍກວ່າ 550 ຄົນ.