ບຣາຊິລ ບໍ່ຮັບ ເງິນຊ່ວຍເຫຼືອວິກິດໄຟປ່າອະເມຊອນ ຈາກກຸ່ມປະເທດຈີ7

292

ກອງປະຊຸມຜູ້ນຳກຸ່ມປະເທດອຸສາຫະກໍາຊັ້ນນໍາຂອງໂລກ 7 ປະເທດ ຫຼື “G7” ມີມະຕິເຫັນພ້ອມຕົກລົງຈັດສັນງົບຮ່ວມກັນປະມານ 20 ລ້ານໂດລາ ຫຼື ກວ່າ 170 ຕື້ກີບ ເພື່ອຊ່ວຍໃຊ້ໃນການດັບໄຟປ່າອະເມຊອນ ແຕ່ລັດຖະບານບຣາຊິລ “ປະຕິເສດ”.

ສຳນັກຂ່າວຕ່າງປະເທດລາຍງານຈາກເມືອງບີຢາຣິດສ໌ ປະເທດຝຣັ່ງ ເມື່ອວັນອັງຄານ ທີ 27 ສິງຫາ ວ່າ ເນື້ອໃນໄລຍະໜຶ່ງຂອງຄຳຖະແຫຼງຈາກຜູ້ນຳຂອງ 7 ປະເທດອຸດສາຫະກຳຊັ້ນນຳ ຫຼື “G7” ເຊິ່ງສຳເລັດກອງປະຊຸມ ໃນໄລຍະ 3 ວັນ ທີ່ເມືອງບີຢາຣິດສ໌ ໃນແຂວງປີເຣເນ-ອັດລັອງຕິກ ເມືອງແຄມທະເລທາງພາກຕາເວັນຕົກສຽງໃຕ້ຂອງຝຣັ່ງ ເມື່ອວັນຈັນ ລະບຸວ່າ ສະຖານະການໄຟໄໝ້ປ່າອະເມຊອນ ເຊິ່ງມີສູນກາງຢູ່ປະເທດບຣາຊິລ ແຕ່ຂະຫຍາຍລຸກລາມເປັນພື້ນທີ່ກວ້າງອອກໄປປະເທດໂບລິເວຍຢ່າງໄວວາ ຖືເປັນ “ວິກິດການລະຫວ່າງປະເທດ”. ດ້ວຍເຫດນີ້, ສະມາຊິກກຸ່ມປະເທດຈີ7 ເຊັ່ນ: ຝຣັ່ງ ເຊິ່ງເປັນເຈົ້າພາບການປະຊຸມ, ສະຫະລັດ, ເຢຍລະມັນ, ການາດາ, ອັງກິດ, ອີຕາລີ ແລະ ຍີ່ປຸ່ນ ມີມະຕິເຫັນພ້ອມລະດົມງົບຮ່ວມກັນ ປະມານ 20 ລ້ານໂດລາ (ປະມານ 174,82 ຕື້ກີບ) ເພື່ອຊ່ວຍເຫຼືອປະເທດທີ່ໄດ້ຮັບຜົນກະທົບ “ທັງໃນດ້ານເທັກນິກ ແລະ ມະນຸດສະທຳ”.

ຂະນະທີ່ ສູນວິໄຈອະວະກາດແຫ່ງຊາດຂອງປະເທດບຣາຊິລ (INPE: Instituto Nacional de Pesquisas Espaciais or National Institute for Space Research) ລາຍງານວ່າ ໄຟປ່າອະເມຊອນ ໃນຂົງເຂດຂອງປະເທດຍັງເພີ່ມຈຸດລຸກໄໝ້ຂຶ້ນອີກຫຼາຍຈຸດ ” ສະເພາະເມື່ອວັນຈັນ ເພີ່ມສະຖິຕິການເກີດໄຟປ່າອະເມຊອນ ໃນປະເທດບຣາຊິລ ເກືອບ 80.000 ຈຸດ ນັບຕັ້ງແຕ່ຕົ້ນປີນີ້. ເຖິງວ່າທະຫານຫຼາຍສິບພັນຄົນທີ່ມີເຄື່ອງມືຈຳເປັນໄດ້ກະຈາຍກໍາລັງລົງພື້ນທີ່ຫຼາຍລັດຂອງພາກເໜືອ ແລະ ຕາເວັນຕົກສຽງເໜືອ ເພື່ອຊ່ວຍເຫຼືອເຈົ້າໜ້າທີ່ພົນລະເຮືອນໃນການຄວບຄຸມໄຟປ່າ ໂດຍໄຟປ່າທີ່ເກີດຂຶ້ນໃໝ່ພົບຫຼາຍທີ່ສຸດໃນລັດຣອນໂດເນຍ ທາງພາກຕາເວັນຕົກສຽງເໜືອ.

ຢ່າງໃດກໍ່ຕາມ, ປະທານາທິບໍດີຊາອີ ໂບລໂຊນາໂຣ ໄດ້ກ່າວເຖິງຄວາມຊ່ວຍເຫຼືອຈາກກຸ່ມ G7 ວ່າ ເຮັດໃຫ້ບຣາຊິລ ເບິ່ງຄືວ່າ “ເປັນປະເທດທີ່ຕົກຢູ່ພາຍໃຕ້ອານານິຄົມ” ຂອງບັນດາປະເທດຮັ່ງມີ ແລະ ໄດ້ “ປະຕິເສດ” ທີ່ຈະໄດ້ຮັບຄວາມຊ່ວຍເຫຼືອດັ່ງກ່າວ  ເຖິງວ່າກ່ອນໜ້ານັ້ນ ທ່ານຣິຄາໂດ ຊາລເລສ ລັດຖະມົນຕີກະຊວງສິ່ງແວດລ້ອມຂອງປະເທດບຣາຊິລ ກ່າວວ່າ ລັດຖະບານມີຄວາມຍິນດີ ແລະ ຂອບໃຈ ສຳລັບການຊ່ວຍເຫຼືອຈາກກຸ່ມ G7 ທັງນີ້ ຜູ້ນໍາບຣາຊິລ ແລະ ປະທານາທິບໍດີເອັມມານູເອລ ມາຄຣົງ ຜູ້ນໍາປະເທດຝຣັ່ງ ມີຂໍ້ໂຕ້ຖຽງກັນ ເມື່ອຕົ້ນອາທິດນີ້ ຈາກກໍ່ລະນີຂອງທ່ານໂບລໂຊນາໂຣ ກ່າວວ່າ ທ່ານນາງມິເຊລ ໂບລໂຊນາໂຣ ຜູ້ເປັນພັນລະຍານັ້ນ ງາມກວ່າ ທ່ານນາງບຣິຈິດ ມາຄຣົງ ເຊິ່ງຜູ້ນຳຂອງຝຣັ່ງກ່າວວ່າ ເປັນຄໍາວິຈານທີ່ “ບໍ່ໃຫ້ກຽດເຊິ່ງກັນ ແລະ ກັນ”.