ຜູ້ປ່ວຍໄຂ້ໝາກແດງທົ່ວໂລກ ເພີ່ມຂຶ້ນເກືອບ 3 ເທົ່າ

452

ອົງການອະນາໄມໂລກລາຍງານ ຈຳນວນຜູ້ປ່ວຍໄຂ້ໝາກແດງທົ່ວໂລກ ຕະຫຼອດ 7 ເດືອນ ທຳອິດຂອງປີນີ້ ເພີ່ມຂຶ້ນເກືອບ 3 ເທົ່າ ຈາກປີຜ່ານມາ ໂດຍມີຫຼາຍກວ່າ 360.000 ຄົນ.

ສຳນັກຂ່າວຕ່າງປະເທດລາຍງານຈາກເມືອງເຈນີວາ ປະເທດສະວິດເຊີແລນ ເມື່ອວັນທີ 14 ສິງຫາ ອົງການອະນາໄມໂລກ (WHO: World Health Organization) ລາຍງານ ເມື່ອວັນອັງຄານ ກ່ຽວກັບສະພາບການແຜ່ລະບາດຂອງໄຂ້ໝາກແດງ ລະຫວ່າງເດືອນມັງກອນ ເຖິງ ເດືອນກໍລະກົດ ປີນີ້ ວ່າ ຈຳນວນຜູ້ຕິດເຊື້ອທົ່ວໂລກ ຢ່າງໜ້ອຍ 364.808 ຄົນ ເພີ່ມຂຶ້ນເກືອບ 3 ເທົ່າ ເມື່ອທຽບໃສ່ໄລຍະດຽວກັນຂອງປີຜ່ານມາ ທີ່ມີພຽງ 129,239 ຄົນ ແລະ ເປັນສະຖິຕິສູງສຸດ ນັບຕັ້ງແຕ່ປີ 2006 ຂະນະທີ່ ລາຍງານຂອງ WHO ກ່າວດ້ວຍວ່າ ການທີ່ສະຖິຕິດັ່ງກ່າວເປັນພຽງຈໍານວນທີ່ “ໄດ້ຮັບລາຍງານຢ່າງເປັນທາງການ” ຈາກລັດຖະບານຂອງແຕ່ລະປະເທດເທົ່ານັ້ນ ໝາຍຄວາມວ່າ ໃນຄວາມເປັນຈິງແລ້ວ ຈຳນວນຜູ້ປ່ວຍອາດຈະຫຼາຍກວ່ານັ້ນ ແລະ WHO ຄາດການວ່າ ຈໍານວນທີ່ລາຍງານມານັ້ນ ອາດຈະເປັນພຽງ 1 ໃນ 10 ຂອງຈຳນວນຜູ້ທີ່ຕິດເຊື້ອເທົ່ານັ້ນ.

ຂະນະທີ່ ສະຖານະການການແຜ່ລະບາດຂອງພະຍາດໄຂ້ໝາກແດງ ໃນປະເທດຢູເຄຣນ ແລະ ສາທາລະນະລັດ ປະຊາທິປະໄຕຄອງໂກ (ດີອາ ຄອງໂກ) ເປັນ 3 ປະເທດ ທີ່ WHO ເຫັນວ່າ ເປັນບັນຫາທີ່ວິຕົກກັງວົນທີ່ສຸດ ໂດຍສະເພາະໃນ ຄອງໂກ ທີ່ຍັງຜະເຊີນກັບການແຜ່ລະບາດຂອງໄວຣັສອີໂບລາ ເຊິ່ງມີຜູ້ເສຍຊີວິດຫຼາຍກວ່າ 1.800 ຄົນ ນັບແຕ່ເດືອນສິງຫາ ປີ 2018 ເປັນຕົ້ນມາ  ສ່ວນຈຳນວນຜູ້ປ່ວຍຈາກໄຂ້ໝາກແດງ ໃນມາດາກັສກາ ມີປະມານ 127.500 ຄົນ ໃນໄລຍະ 6 ເດືອນຕົ້ນປີນີ້. ແຕ່ຫຼັງຈາກນັ້ນ,  ສະຖິຕິກໍ່ຫຼຸດລົງຫຼາຍ ເນື່ອງຈາກລັດຖະບານໄດ້ປະກາດປະຊາສໍາພັນນະໂຍບາຍການສັກຢາຕ້ານເຊື້ອໄຂ້ໝາກແດງແຫ່ງຊາດ ໂດຍ ອົງການອະນາໄມໂລກ ໃຫ້ການສະໜັບສະໜຸນ.

ທັງນີ ນອກຈາກ 3 ປະເທດ ດັ່ງກ່າວແລ້ວ ລາຍງານຂອງອົງການອະນາໄມໂລກຍັງສະແດງເຖິງຄວາມວິຕົກກັງວົນກ່ຽວກັບສະຖານະການການແຜ່ລະບາດຂອງພະຍາດໄຂ້ໝາກແດງອີກຫຼາຍປະເທດທີ່ລວມເຖິງປະເທດແອັງໂກລາ, ແຄມເມີລູນ, ຊາດ, ຄາຊັກສະຖານ, ໄນຈີເຣຍ, ຊູດານໃຕ້, ຊູດານ, ໄທ ແລະ ຟີລິບປິນ. ສ່ວນສະຖານະການໃນໂລກຕາເວັນຕົກທີ່ວິກິດຫຼາຍຂຶ້ນເນື່ອງຈາກຄວາມເຊື່ອໃນ “ອຸດົມການຕໍ່ຕ້ານການສັກຢາຕ້ານພະຍາດ”ໂດຍຈຳນວນຜູ້ປ່ວຍໄຂ້ໝາກແດງໃນສະຫະລັດຢ່າງໜ້ອຍ 1.164ຄົນ ນັບຕັ້ງແຕ່ຕົ້ນປີນີ້ເປັນຕົ້ນມາ.ແຕ່ຕະຫຼອດປີ 2018 ມີພຽງ 372 ຄົນ ແລະ ສະຖິຕິໃນເອີຣົບລວມກັນມີເກືອບ 90.000 ຄົນ ເພີ່ມຂຶ້ນໜ້ອຍດຽວ ຈາກປີຜ່ານມາ.