ໄຕ້ຝຸ່ນເລກິມາ ພັດເຂົ້າຈີນຮອບສອງ ໃນເມືອງຊານຕົງ – ເຈີ້ຈຽງ ເສຍຊີວິດ 44 ສູນຫາຍ 16 ຄົນ

365

ສໍານັກຂ່າວຊິນຫົວຂອງຈີນ ລາຍງານ ເມື່ອວັນຈັນ ທີ 12 ສິງຫາກ່ຽວກັບພາຍຸໄຕ້ຝຸ່ນເລກິມາ ເຊິ່ງພັດຜ່ານເຂົ້າຈີນຮອບສອງ ສົ່ງຜົນໃຫ້ມີຜູ້ເສຍຊີວິດ 44 ຄົນ ແລະ ສູນຫາຍ 16 ຄົນ ຫຼັງເກີດເຫດດິນເຈື່ອນບໍລິເວນແຄມຝັ່ງມົນທົນຊານຕົງແລະ ມົນທົນເຈີ້ຈຽງ ເມື່ອຄືນວັນອາທິດ ຜ່ານມາ.

ສູນຄວບຄຸມອຸທົກກະໄພຂອງມົນທົນເຈີ້ຈຽງ ລາຍງານ ເມື່ອເຊົ້າວັນຈັນ ທີ 12 ສິງຫາ ວ່າ ຈຳນວນຜູ້ເສຍຊີວິດທີ່ໄດ້ຮັບຜົນກະທົບຈາກ ພາຍຸໄຕ້ຝຸ່ນເລກິມາ ໃນມົນທົນເຈີ້ຈຽງ ເພີ່ມຂຶ້ນເປັນ 39 ຄົນ ຂະນະທີ່ 9 ຄົນ ຍັງສູນຫາຍ.

ນອກຈາກນີ້, ຍັງສົ່ງຜົນກະທົບໃຫ້ກັບປະຊາຊົນ 6,68 ລ້ານຄົນ ໃນມົນທົນເຈີ້ຈຽງ ແລະ ປະຊາຊົນ 1,26 ລ້ານຄົນ ຕ້ອງອົບພະຍົບອອກຈາກບ້ານເຮືອນ, ພື້ນທີ່ກະສິກໍາໄດ້ຮັບຜົນກະທົບ 233.600 ເຮັກຕ້າ ແລະ ເກີດຄວາມສູນເສຍຕໍ່ເສດຖະກິດໂດຍກົງ 24 ຕື້ຢວນ (ປະມານ 29.600 ຕື້ກີບ).

ດ້ານຫ້ອງການປົກຄອງສຸກເສີນຂອງມົນທົນຊານຕົງ ລາຍງານວ່າ ພາຍຸໄຕ້ຝຸ່ນເລກິມາ ສົ່ງຜົນໃຫ້ມີຜູ້ເສຍຊີວິດ 5 ຄົນ, ສູນຫາຍ 7 ຄົນ, ສ້າງຄວາມເສຍຫາຍໃຫ້ແກ່ເຂດປົກຄອງຂັ້ນເມືອງ ລວມ 79 ແຫ່ງ, ກະທົບຕໍ່ປະຊາຊົນ ປະມານ 1,66 ລ້ານຄົນ ແລະ 183.000 ຄົນ ອົບພະຍົບ.

ພາຍຸເມກໝອກ ແລະ ກະແສລົມພັດແຮງ ເຮັດໃຫ້ເນື້ອທີ່ປູກຝັງຫຼາຍກວ່າ 160.000 ເຮັກຕ້າ, ບ້ານເຮືອນ 609 ຫຼັງໄດ້ຮັບຄວາມເສຍຫາຍ ແລະ ກະທົບຕໍ່ເສດຖະກິດໂດຍກົງ 1,48 ຕື້ຢວນ (ປະມານ 1.820 ຕື້ກີບ).

ຢ່າງໃດກໍ່ຕາມ, ສະພາບອາກາດອັນຮ້າຍແຮງນີ້ ຍັງບໍ່ທັນສິ້ນສຸດ ແລະ ຂະນະນີ້ໜ່ວຍກູ້ໄພ ແລະ ໜ່ວຍບັນເທົາສາທາລະນະໄພ ກຳລັງຢູ່ລະຫວ່າງປະຕິບັດການໃຫ້ຄວາມຊ່ວຍເຫຼືອ.