ວິໂດໂດ ຈະໄລ່ເຈົ້າໜ້າທີ່ອອກ ຖ້າຄວບຄຸມໄຟປ່າ ບໍ່ໄດ້

361

ປະທານາທິບໍດີໂຈໂຄ ວິໂດໂດ ກ່າວວ່າ ທະຫານ ແລະ ຕຳຫຼວດຄົນໃດທີ່ໄດ້ຖືກມອບໝາຍໃຫ້ຈັດການກັບໄຟໄໝ້ປ່າ ແຕ່ “ເຮັດວຽກບໍ່ເຕັມທີ່” ຈະຖືກປົດອອກຈາກຕຳແໜ່ງ ໂດຍທ່າທີເຂັ້ມງວດຂອງຜູ້ນຳອິນໂດເນເຊຍ ກໍ່ເພື່ອ “ປົກປ້ອງພາບລັກຂອງປະເທດ” ຫຼັງຈາກບັນຫາດັ່ງກ່າວສ້າງຄວາມເດືອດຮ້ອນກັບປະເທດເພື່ອບ້ານທຸກປີ.

ສຳນັກຂ່າວຕ່າງປະເທດລາຍງານຈາກນະຄອນຫຼວງຈາກາຕ້າ ປະເທດອິນໂດເນເຊຍ ເມື່ອວັນພຸດ ທີ 7 ສິງຫາ ວ່າ ປະທານາທິບໍດີອິນໂດເນເຊຍໂຈໂຄ ວິໂດໂດ ໄດ້ກ່າວລະຫວ່າງກອງປະຊຸມຄະນະລັດຖະມົນຕີ ເມືອວັນອັງຄານ ວ່າ ຈະເປັນຜູ້ຊີ້ນຳໂດຍກົງໄປເຖິງຜູ້ບັນຊາການທັງກອງທັບ ແລະ ຕຳຫຼວດ ໃຫ້ສາມາດປົດເຈົ້າໜ້າທີ່ ເຊິ່ງ “ບໍ່ສາມາດປະຕິບັດ ໜ້າທີ່ຂອງຕົນໄດ້ຢ່າງມີປະສິດທິພາບ” ໃນການຊ່ວຍເຫຼືອເຈົ້າໜ້າທີ່ພົນລະເຮືອນຄວບຄຸມສະຖານະການໄຟໄໝ້ປ່າພາຍໃນປະເທດ ພ້ອມທັງເນັ້ນໜັກວ່າ ການດັບໄຟປ່າຕ້ອງໃຫ້ສຳເລັດໂດຍໄວເທົ່າທີ່ຈະໄວໄດ້ ເພື່ອຮັກສາພາບພົດຂອງອິນໂດເນເຊຍ ບໍ່ໃຫ້ມີຄວນອັບອາຍ ແລະ ຖືກປະນາມໂດຍປະເທດໃກ້ຄຽງຄືທຸກໆປີຜ່ານມາ ວ່າ ບໍ່ມີສັກກະຍາພາບໃນການຄວບຄຸມສະຖານະການໄດ້ ເຊິ່ງສ້າງຄວາມເດືອດຮ້ອນໝອກຄັວນໃຫ້ແກ່ປະເທດໃກ້ຄຽງ ໂດຍສະເພາະປະເທດສິງກະໂປ, ມາເລເຊຍ ແລະ ບາງເຂດທາງພາກໃຕ້ຂອງປະເທດໄທ.

ທັດສະນະຄະຕິຂອງທ່ານວິໂດໂດ ມີຂຶ້ນຫຼັງສານສູງສຸດໃນນະຄອນຫຼວງຈາກາຕ້າມີຄຳພິພາກສາເຊີງສັນຍາລັກ ເມື່ອທ້າຍເດືອນຜ່ານມາ ວ່າ ຜູ້ນໍາອິນໂດເນເຊຍ ພ້ອມດ້ວຍຄະນະລັດຖະມົນຕີ ແລະ ບັນດາເຈົ້າແຂວງທົ່ວປະເທດ “ມີຂໍ້ບົກຜ່ອງຕໍ່ໜ້າທີ່” ໃນການຈັດການບັນຫາວິກິດໄຟປ່າ ເມື່ອປີ 2015 ເຊິ່ງລຸກລາມຫຼາຍກວ່າ 2,59 ລ້ານເຮັກຕາ ແລະ ສ້າງຄວາມເສຍຫາຍໃຫ້ເສດຖະກິດຂອງອິນໂດເນເຊຍ ຫຼາຍກວ່າ 2,21 ແສນຕື້ຣູເປຍ (ປະມານ 134.640 ຕື້ກີບ).

ຂະນະທີ່ ໃນວັນດຽວກັນເຈົ້າໜ້າທີ່ດ້ານສິ່ງແວດລ້ອມຈາກລັດຖະບານມາເລເຊຍ, ສິງກະໂປ, ໄທ, ບຣູໄນ ແລະ ອິນໂດເນເຊຍ ໄດ້ພົບຫາລືກັນທີ່ນະຄອນຫຼວງບັນດາ ເສຣີເບກາວັນ ປະເທດບຣູໄນ
ກ່ຽວກັບສະຖານະການໄຟໄໝ້ປ່າ ໃນປະເທດອິນໂດເນເຊຍ ເຊິ່ງເກີດຂື້ນເກືອບ 1.000 ຈຸດ ຕັ້ງແຕ່ຕົ້ນປີນີ້ສົ່ງຜົນກະທົບ 18 ແຂວງ ໂດຍສະເພາະເທິງເກາະບໍນຽວ ແລະ ເກາະສຸມາຕຣາ ແລະ ໄດ້ປະກາດສະຖານະການສຸກເສີນແລ້ວ ຢ່າງໜ້ອຍ 6 ແຂວງ ລວມເຖິງກຸ່ມແຂວງກາລີມັນຕັນ ເທິງເກາະບໍນຽວ. ທັງນີ້, ໄຟປ່າສ່ວນໃຫຍ່ໃນປະເທດອິນໂດເນເຊຍ ເກີດມາຈາກຄົນ ທີ່ສ່ວນຫຼາຍແມ່ນຊາວກະສິກອນທີ່ໄດ້ຖາງປ່າເຮັດໄຮ່ເພື່ອກະກຽມພື້ນທີ່ ສຳລັບການປູກຕົ້ນປາມນໍ້າມັນ ແລະ ຕົ້ນຈາວ.