ຟີລິບປິນ ປະກາດສະຖານະການສຸກເສີນການລະບາດຂອງໄຂ້ເລືອດອອກ ໃນປະເທດ

327

ລັດຖະບານຟີລິບປິນໄດ້ປະກາດການແຜ່ລະບາດຂອງພະຍາດໄຂ້ເລືອດອອກເດງກີ ເປັນ “ສະຖານະການສຸກເສີນແຫ່ງຊາດ” ຫຼັງຈາກປະຊາຊົນຫຼາຍກ່ວາ 600 ຄົນ ເສຍຊີວິດ ນັບຕັ້ງແຕ່ຕົ້ນປີນີ້ ແຕ່ຍັງມີຄວາມກັງວົນເລື່ອງການກັບມາໃຊ້ຢາຕ້ານເຊື້ອທີ່ເຄີຍເປັນບັນຫາເມື່ອ 2 ປີກ່ອນ.

ສຳນັກຂ່າວຕ່າງປະເທດລາຍງານຈາກນະຄອນຫຼວງມະນິລາ ປະເທດຟີລິບປິນ ເມື່ອວັນພຸດ ທີ 7 ສິງຫາ ວ່າ ກະຊວງສາທາລະນະສຸກຟີລິບປິນ ໄດ້ອອກຖະແຫຼງການ ເມື່ອວັນອັງຄານ ປະກາດໃຫ້ການແຜ່ລະບາດຂອງການຕິດເຊື້ອໄວຣັສເດງກີ ຫຼື ໄຂ້ເລືອດອອກເດງກີ ເຊິ່ງມີຍຸງລາຍເປັນພາຫະນໍາເຊື້ອເປັນ “ສະຖານະການສຸກເສີນດ້ານສາທາລະນະສຸກແຫ່ງຊາດ” ໂດຍສະຖິຕິຢ່າງເປັນທາງການຂອງກະຊວງສາທາລະນະສຸກຂອງຟິລິບປິນ ລະບຸ ຈໍານວນຜູ້ປ່ວຍລະຫວ່າງວັນທີ 1 ມັງກອນ ເຖິງ 20 ກໍລະກົດ ຜ່ານມາ ປະມານ 146.062 ຄົນ ເພິ່ມຂຶ້ນ 98% ຈາກໄລຍະດຽວກັນຂອງປີຜ່ານມາ ແລະ ຈາກຈໍານວນດັ່ງກ່າວ ເສຍຊີວິດແລ້ວ 662 ຄົນ.

ຢ່າງໃດກໍ່ຕາມ ມາຮອດປີ 2016 ເຖິງປີ 2017 ລັດຖະບານຟີລິບປິນມີບັນຫາກັບບໍລິສັດ “ຊາໂນຟີ” ເຊິ່ງເປັນບໍລິສັດຜະລິດຢາ ແລະ ອຸປະກອນການແພດລາຍໃຫຍ່ຂອງໂລກຈາກປະເທດຝຣັ່ງ ກ່ຽວກັບການ ນຳໃຊ້ຢາຕ້ານເຊື້ອ “ເດງວາເຊຍ (CYD-TDY) ” ສຳລັບການປ້ອງກັນພະຍາດໄຂ້ເລືອດອອກເດງກີໂດຍສະເພາະ ເຖິງວ່າລັດຖະບານຢ່າງໜ້ອຍ 20 ປະເທດ ທີ່ຮັບຮອງຢາຕ້ານເຊື້ອເດງວາເຊຍ ໃຫ້ເປັນຢາຊະນິດທໍາອິດຂອງໂລກທີ່ມີປະສິດທິພາບໃນການປ້ອງກັນໄຂ້ເລືອດອອກເດງກີ ແລະ ອະນຸຍາດໃຫ້ນຳ ໃຊ້ຢາດັ່ງກ່າວໃນປະເທດ ແຕ່ຢາຕ້ານເຂື້ອຊະນິດນີ້ ອາດກໍ່ໃຫ້ເກີດຜົນຂ້າງຄຽງທີ່ຮ້າຍແຮງກັບຄົນທີ່ບໍ່ເຄີຍຕິດເຊື້ອໄຂເລືອດອອກຊະນິດນີ້ມາກ່ອນ ແລະ ມີລາຍງານວ່າ ເດັກນ້ອຍຊາວຟິລິບປິນຫຼາຍກວ່າ 20 ຄົນ ໄດ້ເສຍຊີວິດຍ້ອນຜົນຈາກການຮັບຢາຕ້ານເຊື້ອຊະນິດນີ້  ທາງລັດຖະບານຟີລິບປິນຈຶ່ງມີຄໍາສັ່ງໃຫ້ໂຈະການນຳໃຊ້ຢາຕ້ານເຊື້ອເດງວາເຊຍທີ່ປ້ອງກັນພະຍາດໄຂ້ເລືອດອອກໃນທົ່ວປະເທດ.

ຢ່າງໃດກໍ່ຕາມ, ທ່ານຟຣານຊິສໂກ ດູເກ ລັດຖະມົນຕີກະຊວງສາທາລະນະສຸກຟີລິບປິນ ກ່າວວ່າ ລັດຖະບານກຳລັງພິຈາລະນາຄໍາຮ້ອງຂໍອຸທອນຂອງຊາໂນຟີ ໃນການສົ່ງອອກຢາຕ້ານເຊື້ອໄປຟີລິບປິນອີກຄັ້ງ ຫຼັງຈາກເປັນປະເທດທຳອິດທີ່ໄດ້ຮັບການອະນຸມັດ ເມື່ອ 2 ປີກ່ອນ ໂດຍໃນຄັ້ງນີ້ ຕ້ອງຢູ່ພາຍໃຕ້ເງື່ອນໄຂ ວ່າ ໃຫ້ໃຊ້ກັບເດັກນ້ອຍຕັ້ງແຕ່ອາຍຸ 9 ປີ ຂຶ້ນໄປເທົ່ານັ້ນ ແຕ່ຍັງບໍ່ຊັດເຈນວ່າ ຈະອະນຸມັດ ຫຼື ບໍ່ ເນື່ອງຈາກເທສະບານເມືອງມະນລາຍັງຄັດຄ້ານ  ທັງນີ້ ລາຍງານຂອງອົງການອະນາໄມໂລກ (WHO) ລະບຸວ່າ ໄຂ້ເລືອດອອກເດງກີ ເປັນພະຍາດເຂດຮ້ອນເຊິ່ງໃນແຕ່ລະປີມີຫຼາຍກວ່າ 120 ປະເທດໄດ້ຮັບຜົນກະທົບ.