ວອລມາດ ຈະບໍ່ເຊົາຂາຍປືນ ຫຼັງເກີດເຫດຍິງກັນພາຍໃນສູນການຄ້າ

370

ສຳນັກຂ່າວຕ່າງປະເທດລາຍງານຈາກນະຄອນຫຼວງວໍຊິງຕັນ ສະຫະລັດ ອາເມຣິກາ ເມື່ອວັນຈັນ ທີ 5 ສິງຫາ ວ່າ ບໍລິສັດວອລມາດ (Walmart) ເຄືອສູນການຄ້າລາຍໃຫຍ່ທີ່ສູດຂອງອາເມຣິກາ ໄດ້ເຜີຍແຜ່ຖະແຫຼງການຂອງ ທ່ານຄາລ ດັກລາສ ແມັກມິິລລອນ ປະທານຄະນະເຈົ້າໜ້າທີ່ບໍລິຫານ ຂອງບໍລິສັດ ກ່າວ ສະແດງຄວາມເສຍໃຈຢ່າງສູງສຸດຕໍ່ຄວາມສູນເສຍທີ່ເກີດຂື້ນ ທີ່ສາຂາຂອງວອລມາດ ໃນເມືອງເອລປາໂຊ ລັດເທັກຊັສ ເຊິ່ງເກີດເຫດຍິງກັນ ເຮັດໃຫ້ມີຜູ້ເສຍຊີວິດຢ່າງໜ້ອຍ 20 ຄົນ ໄດ້ຮັບບາດເຈັບ 26 ຄົນ ເມື່ອວັນເສົາ ຜ່ານມາ ໂດຍລະບຸວ່າ ວອລມາດ ເປັນກຳລັງໃຈໃຫ້ກັບຄອບຄົວຂອງຜູ້ສູນເສຍທຸກຄົນ.

ທັງນີ້ ເຫດການຍິງກັນທີ່ສູນການຄ້າວອລມາດ ໃນເມືອງເອລປາໂຊ ເກີດຂື້ນໄດ້ສອງສາມມື້ ຫຼັງກ່ອນໜ້ານັ້ນພະນັກງານຂອງວອລມາດ ໃນສາຂາແຫ່ງໜຶ່ງ ໃນລັດມິສຊິສຊິບປີ ຍິງເພື່ອນຮ່ວມງານ 2 ຄົນ ເສຍຊີວິດ ແລະ ຕຳຫຼວດ ຄົນໜຶ່ງໄດ້ຮັບບາດເຈັບ ຈຶ່ງເປັນປະເດັນໂຕ້ຖຽງຂຶ້ນມາອີກຄັ້ງ ວ່າ ວອລມາດ ຄວນຢຸດການຈໍາໜ່າຍປືນ “ຢ່າງເດັດຂາດ ແລະ ຖາວອນ ຫຼື ບໍ່” ໂດຍທາງວອລມາດໄດ້ຢຸດຂາຍປືນໄຣເຟິລມາແລ້ວກ່ອນໜ້າ ເນື່ອງຈາກເກີດເຫດຍິງກັນຢູ່ໂຮງຮຽນແຫ່ງໜຶ່ງ ໃນເມືອງພາກແລນ ລັດຟຼໍລິດາ ເມື່ອເດືອນກຸມພາ ປີຜ່ານມາ ເຊິ່ງເຫດການດັ່ງກ່າວມີຜູ້ເສຍຊີວິດ 17 ຄົນ ແລະ ມີມາດຕະການເພິ່ມເງື່ອນໄຂອາຍຸຂັ້ນຕໍ່າທີ່ສາມາດຊື້ອາວຸດປືນ ແລະ ລູກປືນ ຈາກວອລມາດ ຕັ້ງແຕ່ 21 ປີຂຶ້ນໄປ ແລະ ໄດ້ຢຸດຂາຍອາວຸດປືນພົກພາ ຕັ້ງແຕ່ປີ 1993.

ຢ່າງໃດກໍ່ຕາມ ທ່ານແຣນດີ ອາໂກຣຟ ໂຄສົກຂອງວອລມາດ ກ່າວໃນໄລຍະຕໍ່ມາ ວ່າ ຈຸດປະສົງໃນການຂາຍປືນຂອງ ສູນການຄ້າວອລມາດແມ່ນເພື່ອ “ດ້ານກີລາ ແລະ ການລ່າສັດ”ແລະ ສອດຄ່ອງກັບຄວາມຕັ້ງໃຈຂອງ ທ່ານແຊມ ວອລຕັນ ຜູ້ກໍ່ຕັ້ງບໍລິສັດ ທີ່ມີຄວາມມັກໃນດ້ານອາວຸດປືນເຊັ່ນກັນ.