ອິນເດຍປະຕິເສດຂໍໃຫ້ ທຣໍາ ເປັນ “ຄົນກາງ” ໄກ່ເກ່ຍພິພາດແຄຊເມຍ

390

ລັດຖະບານອິນເດຍກ່າວວ່າ ນາຍົກລັດຖະມົນຕີນະເຣນທຣາ ໂມດີ ບໍ່ເຄີຍຂໍຮ້ອງໃຫ້ປະທານາທິບໍດີໂດນັລ ທຣໍາ ເຮັດໜ້າທີ່ເປັນ “ຜູ້ໄກ່ເກ່ຍ” ບັນຫາເລື່ອງແຄຊເມຍ ກັບ ປາກິດສະຖານ ຕາມທີ່ຜູ້ນໍາສະຫະລັດກ່າວອ້າງ.

ສໍານັກຂ່າວຕ່າງປະເທດລາຍງານຈາກນະຄອນຫຼວງນິວເດລີ ປະເທດອິນເດຍ ເມື່ອວັນອັງຄານ ທີ 23 ກໍລະກົດ ວ່າ ກະຊວງການຕ່າງປະເທດອິນເດຍ ອອກຖະແຫຼງການເມື່ອວັນຈັນ ວ່າ ລັດຖະບານນິວເດລີ ບໍ່ເຄີຍຂໍຄວາມຊ່ວຍເຫຼືອຈາກປະທານາທິບໍດີໂດນັລ ທຣໍາ ຫຼື ເຈົ້າໜ້າທີ່ລະດັບສູງຄົນໃດ ໃນລັດຖະບານວໍຊິງຕັນ ຊຸດປັດຈຸບັນ ໃຫ້ມາເຮັດໜ້າທີ່ເປັນ “ຜູ້ໄກ່ເກ່ຍ” ລະຫວ່າງ ອິນເດຍ ກັບ ປາກິດສະຖານ ຈາກກໍລະນີພິພາດເລື່ອງພູມສາດແຄຊເມຍ ໂດຍຢືນຢັນວ່າ ເລື່ອງນີ້ ເຖິງວ່າຈະຍືດເຍື້ອມາດົນ ນັບຕັ້ງແຕ່ທັງສອງປະເທດໄດ້ຮັບເອກະລາດຈາກສະຫະຣາຊະອານາຈັກ ແຕ່ “ເປັນບັນຫາລະດັບທະວີພາຄີ ທີ່ຄູ່ກໍລະນີທັງສອງປະເທດເຈລະຈາກັນເອງໄດ້”.

ຖະແຫຼງການດັ່ງກ່າວເຜີຍແຜ່ອອກມາພາຍໃນເວລາພຽງບໍ່ເທົ່າໃດຊົ່ວໂມງ ລະຫວ່າງ ທຣໍາ ຕ້ອນຮັບ ແລະ ພົບຫາລືກັບນາຍົກລັດຖະມົນຕີອິມຣານ ຂ່ານ ຜູ້ນໍາປາກິດສະຖານ ທີ່ທໍານຽບຂາວ ເຊິ່ງຜູ້ນໍາສະຫະລັດກ່າວໃນໄລຍະໜຶ່ງວ່າ ຕົນໄດ້ສົນທະນາກັບນາຍົກລັດຖະມົນຕີນະເຣນທຣາ ໂມດີ ນອກຮອບການປະຊຸມສຸດຍອດຜູ້ນໍາກຸ່ມປະເທດເສດຖະກິດຂະໜາດໃຫຍ່ “ຈີ 20” ທີ່ເມືອງໂອຊາກ້າ ປະເທດຍີ່ປຸ່ນ ເມື່ອທ້າຍເດືອນມິຖຸນາ ຜ່ານມາ ເຊິ່ງ ທ່ານໂມດີ ຖາມວ່າ ທຣໍາ ພ້ອມຈະເຮັດໜ້າທີ່ເປັນ “ຄົນກາງ” ຫຼື “ຜູ້ໄກ່ເກ່ຍ” ໄດ້ ຫຼື ບໍ່ ເມື່ອຖືກຖາມກັບມາວ່າກ່ຽວກັບເລື່ອງຫຍັງ ຜູ້ນໍາອິນເດຍ ຕອບວ່າ “ກ່ຽວກັບສະຖານະການໃນແຄຊເມຍ” ເຊິ່ງ ທຣໍາ ກ່າວວ່າ ຕົນໄດ້ຕອບຕົກລົງ ຂະນະທີ່ຜູ້ນໍາ ປາກິດສະຖານກ່າວວ່າ “ເປັນເລື່ອງດີ ແລະ ໜ້າສົນໃຈ” ຖ້າມີປະເທດໃດສາມາດເຮັດໜ້າທີ່ດັ່ງກ່າວໄດ້.

ທັງນີ້ພູມສາດແຄຊເມຍ ເຊິ່ງເປັນດິນແດນພິພາດ ລະຫວ່າງອິນເດຍ ກັບ ປາກິດສະຖານນັບຕັ້ງແຕ່ໄດ້ຮັບເອກະລາດຈາກສະຫະຣາຊະອານາຈັກ ເມື່ອປີ 1947 ໂດຍທັງສອງປະເທດເຊິ່ງຖືເປັນ ”ມະຫາອໍານາດດ້ານນິວເຄຣຍ” ແຫ່ງອາຊີໃຕ້ເຮັດສົງຄາມຄັ້ງໃຫຍ່ ເພື່ອຍາດຊີງກໍາມະສິດເໜືອແຄຊເມຍ ມາແລ້ວ 2 ຄັ້ງແລະ ຄວາມຕຶງຄຽດຈົນເກືອບບານປາຍເປັນສົງຄາມ ຄັ້ງທີ 3 ເມື່ອເດືອນກຸມພາ
ທີ່ຜ່ານມາ ເປັນຜົນຈາກເຫດວາງລະເບີດໃສ່ໃນລົດເພື່ອໂຈມຕີລົດເມໂດຍສານຂອງທະຫານອິນເດຍ ໃນເຂດປຸລວາມາລັດຊໍາມູ ແລະ ລັດກັສມີ ເຮັດໃຫ້ທະຫານຫຼາຍກວ່າ 40 ເສຍຊີວິດສະຖານະການດັ່ງກ່າວຕຶງຄຽດດົນຫຼາຍປີ ກ່ອນທີ່ທັງສອງປະເທດຈະຕົກລົງ “ສະຫງົບສົງຄາມ”ຄັ້ງນີ້ໄດ້.