ອາເມຣິກາ ອາກາດຮ້ອນອົບເອົ້າ

375

ຄື້ນຄວາມຮ້ອນແຜ່ປົກຄຸມພື້ນທີ່ທົ່ວພາກຕາເວັນອອກແລະ ພາກກາງຂອງສະຫະລັດ ອາເມຣິກາ ເມື່ອໄລຍະທ້າຍອາທິດ ສົ່ງຜົນກະທົບຕໍ່ປະຊາຊົນ ປະມານ 200 ລ້ານຄົນ ຫຼາຍເມືອງໃຫຍ່ລວມເຖິງນິວຢອກ, ຟິລາເດລເຟຍ ແລະ ວໍຊິງຕັນອຸນຫະພູມສູງ ເຖິງ 38 ອົງສາ.

ສໍານັກຂ່າວເອເອັຟພີ ແລະ ເອພີລາຍງານ ຈາກນະຄອນຫຼວງວໍຊິງຕັນ ແລະ ນະຄອນນິວຢອກ ປະເທດສະຫະລັດ ອາເມຣິກາ ເມື່ອວັນອາທິດ ທີ 21 ກໍລະກົດ ວ່າ ຄື້ນຄວາມຮ້ອນທີ່ແຜ່ປົກຄຸມພື້ນທີ່ປະມານ 2 ໃນ 3 ຂອງອາເມຣິກາ ຕັ້ງແຕ່ພື້ນທີ່ຮາບເຂດມິດເວສ ໄປຈົນຮອດຊາຍຝັ່ງມະຫາສະໝຸດແອັດແລນຕິກ ສົ່ງຜົນໃຫ້ປະຊາຊົນປະມານ 200 ລ້ານຄົນ ຕ້ອງຕໍ່ສູ້ກັບຄວາມຮ້ອນອົບເອົ້າ ທີ່ຕ້ອງຢູ່ໃນຫ້ອງປັບອາກາດ, ສະລອຍນໍ້າ ຫຼື ທະເລຊາຍທີ່ມີອຸນຫະພູມເພິ່ມຂຶ້ນສູງ.

ຖະແຫຼງການຂອງສໍານັກງານສະພາບອາກາດແຫ່ງຊາດສະຫະລັດ (NWS: National Weather Service) ກ່າວວ່າ ຄ່າດັດຊະນີຄວາມຮ້ອນ (HIV: heat index values) ເຊິ່ງລວມກັບຜົນກະທົບຈາກຄວາມຮ້ອນ ແລະ ຄວາມເຂັ້ມເຂົ້າດ້ວຍກັນ ໃນວັນອາທິດອາດສູງເຖິງ 43,3 -46,1 ອົງສາ ໃນຕອນກາງເວັນ ໂດຍສະເພາະພື້ນທີ່ຕາມແລວຊາຍຝັ່ງຕາເວັນອອກ ຕັ້ງແຕ່ລັດແຄໂຣໄລນາ ຂຶ້ນໄປຈົນເຖິງ ລັດເມນ.

ແຕ່ຫຼັງຈາກຕາເວັນຕົກດິນຄວາມຮ້ອນຈະຫຼຸດຜ່ອນລົງຫຼາຍ ແຕ່ຄາດວ່າ ອຸນຫະພູມສະເລ່ຍປະມານ 26 ອົງສາ ໃນຕອນກາງຄືນ.

NWS ປະກາດເຕືອນອຸນຫະພູມສູງອັນຕະລາຍບວກກັບຄວາມຊື້ນອາດກໍ່ໃຫ້ເກີດພາວະຄວາມຄຽດຈາກຄວາມຮ້ອນທັງໃນຄົນ ແລະ ສັດ ດ້ວຍໂລກລົມແດດ ເມື່ອວັນເສົາມີລາຍງານຜູ້ເສຍຊີວິດຈາກອາກາດຮ້ອນໃນປະເທດແລ້ວຢ່າງໜ້ອຍ 6 ຄົນ ລວມເຖິງ 2 ຄົນ ເມື່ອໄລຍະຕົ້ນອາທິດທີ່ລັດແມຣີແລນ ທາງພາກຕາເວັນອອກຕອນເທິງ.

ຢ່າງໃດກໍ່ຕາມຄາດວ່າອາກາດຮ້ອນຈະຫຼຸດລົງໃນວັນຈັນ ແລະ ວັນອັງຄານ.