ອະນາໄມໂລກ ປະກາດພາວະສຸກເສີນ ‘ອີໂບລາ’ ໃນດີອາຄອງໂກ

478

ອົງການອະນາໄມໂລກປະກາດໃຫ້ການແຜ່ລະບາດຂອງເຊື້ອໄວຣັສອີໂບລາ ໃນສາທາລະນະລັດ ປະຊາທິປະໄຕ ຄອງໂກ ເຊິ່ງພາກຊີວິດປະຊາຊົນ ເກືອບ 1.700 ຄົນ ຕັ້ງແຕ່ກາງປີ ຜ່ານມາ ຖືເປັນ “ພາວະສຸກເສີນດ້ານສາທາລະນະສຸກລະຫວ່າງປະເທດ”.

ສໍານັກຂ່າວຕ່າງປະເທດລາຍງານຈາກເມືອງເຈນີວາ ປະເທດສະວິດເຊີແລນ ເມື່ອວັນພະຫັດ ທີ 18 ກໍລະກົດ ວ່າ ການປະຊຸມວາລະສັງຄົມຂອງອົງການອະນາໄມໂລກ (WHO) ມີມະຕິ ເມື່ອວັນພຸດ ປະກາດໃຫ້ສະຖານະການແຜ່ລະບາດຂອງເຊື້ອໄວຣັສອີໂບລາ ໃນສາທາລະນະລັດ ປະຊາທິບໄຕ ຄອງໂກ (DR Congo) ຖືເປັນ “ພາວະສຸກເສີນ ດ້ານສາທາລະນະສຸກລະຫວ່າງປະເທດ” ຫຼັງກ່ອນໜ້ານີ້ ປະຕິເສດການປະກາດດັງກ່າວເຖິງ 3 ຄັ້ງ ສ້າງສຽງວິພາກວິຈານຢ່າງໜັກຈາກຫຼາຍຝ່າຍ ເນື່ອງຈາກສະຖານະການການແຜ່ລະບາດຂອງເຊື້ອໄວຣັສອີໂບລາ ໃນດີອາຄອງໂກຄັ້ງນີ້ ເຊິ່ງເປັນການແຜ່ລະບາດຄັ້ງທີ 2 ຕໍ່ຈາກການແຜ່ລະບາດລະຫວ່າງເດືອນພຶດສະພາ ເຖິງ ເດືອນກໍລະກົດ ປີຜ່ານມາ ແຕ່ມີຄວາມຮຸນແຮງກວ່າຫຼາຍ ໂດຍຍືດເຍື້ອຕັ້ງແຕ່ເດືອນສິງຫາຂອງປີດຽວກັນ ມີລາຍງານຜູ້ເສຍຊີວິດແລ້ວ ເກືອບ 1.700 ຄົນ ແລະ ຍັງແຜ່ລະບາດຂ້າມເຂດແດນໄປປະເທດຢູການດ້າ ສົ່ງຜົນໃຫ້ມີຜູ້ເສຍຊີວິດຢ່າງໜ້ອຍ 3 ຄົນ.

ຢ່າງໃດກໍ່ຕາມທ່ານແພດ ເທດຣອສ ອັດຮານອມ ເກເບຣເຢຊຸສ ຜູ້ອໍານວຍການ ອົງການອະນາໄມໂລກ ປະຕິເສດໃຫ້ຄວາມເຫັນຕໍ່ສຽງວິຈານຢ່າງໜັກກ່ຽວກັບບົດບາດຂອງອົງການອະນາໄມໂລກ ຕໍ່ສະຖານະການແຜ່ລະບາດຂອງເຊື້ອໄວຣັສອີໂບລາ ໃນດີອາຄອງໂກ ໂດຍຢືນຢັນ ວ່າອົງການດັບເບິລຢູເອັດຈ໌ໂອ ບໍ່ເຄີຍຢູ່ເສີຍຕໍ່ວິກິດທາງສາທາລະນະສຸກຄັ້ງນີ້ ແຕ່ໃນທາງກົງກັນຂ້າມທຸກຝ່າຍຍິ່ງເພິ່ມຄວາມຊ່ວຍເຫຼືອໃຫ້ແກ່ທຸກປະເທດທີ່ກໍາລັງໄດ້ຮັບຜົນກະທົບເຊິ່ງໃນດີອາຄອງໂກ ມີປະຊາຊົນຫຼາຍກວ່າ 160.000 ໄດ້ຮັບການສັກຢາຕ້ານເຊື້ອແລ້ວ ແລະ ໃນທີ່ສຸດມີມະຕິ ວ່າ”ເຖິງເວລາອັນສົມຄວນ” ທີ່ຈະປະກາດສະຖານະການສຸກເສີນ ເພື່ອກະຕຸ້ນຄວາມສົນໃຈຂອງທົ່ວໂລກມາທີ່ດີອາຄອງໂກແລະປະເທດເພື່ອນບ້ານຂອງດີອາຄອງໂກ ເຊິ່ງຕອນນີ້ລ້ວນແລ້ວແມ່ນຜະເຊີນກັບຄວາມສ່ຽງສູງທີ່ຈະມີການແຜ່ລະບາດຂ້າມຊາຍແດນ.