ເກີດເຫດຍົນແລ່ນໄຖອອກນອກຣັນເວ ປະເທດເນປານ

417

ສະໜາມບິນນານາຊາດແຫ່ງດຽວຂອງປະເທດເນປານ ໃນນະຄອນຫຼວງກາດມານດຸ ຈໍາເປັນຕ້ອງປິດໃຫ້ບໍລິການຊົ່ວຄາວ ຍ້ອນເກີດອຸບັດຕິເຫດຍົນໂດຍສານແລ່ນໄຖອອກນອກຣັນເວ ທີ່ຫາກໍ່ແປງແລ້ວ ເມື່ອບໍ່ດົນມານີ້ ມີຜູ້ບາດເຈັບ 2 ຄົນ.

ສໍານັກຂ່າວເອເອັຟພີ ລາຍງານຈາກນະຄອນຫຼວງກາດມານດຸ ປະເທດເນປານ ເມື່ອວັນສຸກ ທີ 12 ກໍລະກົດ ວ່າ ເນປານເປັນປະເທດທີ່ມີບັນທຶກດ້ານຄວາມປອດໄພຂອງການບິນທີ່ບໍ່ຄ່ອຍດີປານໃດ ເຊັ່ນສາຍການບິນຂອງເນປານຖືກສັ່ງຫ້າມບໍ່ໃຫ້ບິນເຂົ້າໃນເຂດໜ້າຟ້າຂອງສະຫະພາບເອີຣົບ ນອກຈາກນັ້ນ ໜ້າຟ້າຂອງປະເທດເນປານເອງ ກໍ່ຍາກທີ່ຈະນໍາຍົນລົງຈອດ ດ້ວຍສະພາບພາກພື້ນປະເທດທີ່ຕັ້ງຢູ່ເທິງພູສູງ.

ທ່ານຣາຊ ກຸມາຣ ເຊດຕີ ຜູ້ຈັດການໃຫຍ່ສະໜາມບິນນານາຊາດຕຣິພູວັນ ເປັນສະໜາມບິນແຫ່ງດຽວຂອງເນປານ ກ່າວວ່າ ເກີດອຸບັດຕິເຫດຍົນໂດຍສານແບບເອທີອາ 72-500 ຂອງສາຍການບິນເຢຕີ ຖ້ຽວບິນໃນປະເທດ ເຊິ່ງເດີນທາງມາຈາກທາງພາກໃຕ້ຂອງເນປານ ສູ່ຈຸດໝາຍທີ່ນະຄອນຫຼວງກາດມານດຸ ພ້ອມຜູ້ໂດຍສານ 66 ຄົນ ເມື່ອວັນສຸກ ທີ 12 ກໍລະກົດ ແລ່ນໄຖນອອກນອກຣັນເວ 15 ແມັດໄປຢຸດຢູ່ເທິງເດີ່ນຫຍ້າ ມີຜູ້ໄດ້ຮັບບາດເຈັບ 2 ຄົນ ເຮັດໃຫ້ທາງການຕ້ອງສັ່ງປິດໃຫ້ບໍລິການຊົ່ວຄາວສະໜາມບິນນານາຊາດຕຣິພູວັນ ເພື່ອໃຫ້ເຈົ້າໜ້າທີ່ດໍາເນີນການເຄື່ອນຍ້າຍຍົນອອກຈາກຣັນເວ ແຕ່ກໍ່ມີອຸປະສັກ ຍ້ອນຝົນທີ່ຕົກຢ່າງໜັກເຮັດໃຫ້ພື້ນເດີ່ນຫຍ້າກາຍເປັນຕົມ ກວ່າຈະເຄື່ອນຍ້າຍສໍາເລັດກໍ່ໃຊ້ເວລາ 11 ຊົ່ວໂມງ.

ຣັນເວສະໜາມບິນນານາຊາດຕຣິພູວັນ ຫາກໍ່ມີການປັບປຸງແລ້ວ ຫຼັງເຄີຍເກີດອຸບັດຕິເຫດ ແບບດຽວກັນນີ້ເມື່ອເດືອນກັນຍາ ປີຜ່ານມາ ແລະ ຫຼາຍເດືອນກ່ອນໜ້ານີ້ ຍົນຂອງມາເລເຊຍ ພ້ອມຜູ້ໂດຍສານ ແລະລູກເຮືອ 139 ຄົນ ກໍ່ເກີດອຸບັດຕິເຫດແລ່ນໄຖອອກນອກຣັນເວຂະນະກຽມບິນຂຶ້ນ ແຕ່ໃນເດືອນມີນາ ປີຜ່ານມາ ສາຍການບິນອາເມຣິກາ – ບັງກລາເທດ ຕົກໃກ້ກັບສະໜາມບິນແຫ່ງນີ້ມີຜູ້ເສຍຊີວິດ 51 ຄົນ.