ຮອງຜູ້ນໍາຈີນ ຊີ້ ໂລກບໍ່ຄວນປິດກັ້ນກັນເອງ ແຕ່ຄວນຮ່ວມມືກັນ

407

ຮອງປະທານປະເທດຈີນ ກ່າວວ່າ ໂລກບໍ່ອາດປິດກັ້ນການພັດທະນາຈາກຈີນໄດ້ ໃນຂະນະດຽວກັນການພັດທະນາຂອງໂລກໃນຕອນນີ້ກໍ່ຂາດຈີນບໍ່ໄດ້. ດັ່ງນັ້ນ ທຸກພາກສ່ວນຄວນຮ່ວມມືກັນເພື່ອສະຖຽນລະພາບ ແລະ ສັນຕິພາບ.

ສໍານັກຂ່າວຕ່າງປະເທດລາຍງານຈາກນະຄອນຫຼວງປັກກິ່ງປະເທດຈີນ ເມື່ອວັນຈັນ ທີ 8 ກໍລະກົດ ວ່າ ທ່ານຫວັງ ຊີຊານຮອງປະທານປະເທດຈີນ ກ່າວຖະແຫຼງເປີດງານປະຊຸມສັນຕິພາບໂລກ ທີ່ມະຫາວິທະຍາໄລຊິງຫວາ ໃນນະຄອນຫຼວງປັກກິ່ງເມື່ອວັນຈັນ ວ່າ ການພັດທະນາຂອງຈີນໃນທຸກດ້ານ ບໍ່ສາມາດປິດກັ້ນຈີນຈາກໂລກພາຍນອກໄດ້ ໂລກທີ່ກໍາລັງພັດທະນາກໍ່ບໍ່ສາມາດແບ່ງແຍກຕົວເອງຈາກຈີນໄດ້ເຊັ່ນກັນ.

ຢ່າງໃດກໍ່ຕາມກໍ່ຍັງມີບາງປະເທດທີ່ສ້າງວາທະ “ຄວາມໝັ້ນຄົງຂອງຊາດ” ເຊື່ອງໄວ້ພາຍໃຕ້ການໃຊ້ນະໂຍບາຍກີດກັນການຄ້າຕໍ່ປະເທດອື່ນ.ສະນັ້ນ ລັດຖະບານປັກກິ່ງ ຫວັງເປັນຢ່າງຍິ່ງ ວ່າ ນານາປະເທດມະຫາອໍານາດ ແລະ ປະຊາຄົມໂລກ ຈະເພິ່ມຄວາມຮ່ວມມືແລະ ການມີສ່ວນຮ່ວມເພື່ອສັນຕິພາບ ແລະ ສະຖຽນລະພາບຂອງໂລກໃນທຸກດ້ານ ລວມເຖິງດ້ານເສດຖະກິດແລະ ການຄ້າ ໂດຍປະເທດທີ່ມີຂະໜາດໃຫຍ່ ຫຼື ມີຄວາມຈະເລີນກ້າວໜ້າ ແລະມີອິດທິພົນຫຼາຍກວ່າ ຕ້ອງສະແດງຄວາມຮັບຜິດຊອບຫຼາຍກວ່າ ແລະ ສ້າງບັນທັດຖານ ເພື່ອເປັນການຂະຫຍາຍກອບຄວາມຮ່ວມມືໃນອະນາຄົດເນື່ອງຈາກການພັດທະນາຄືກຸນແຈສໍາຄັນ ໃນການແກ້ໄຂຂໍ້ພິພາດ ບໍ່ວ່າຈະເປັນປະເດັນໃດກໍ່ຕາມ.

ທັງນີ້ຄໍາກ່າວຂອງ ທ່ານຫວັງ ເຊິ່ງຖືເປັນໜຶ່ງໃນບຸກຄົນວົງໃນທີ່ມີຄວາມໃກ້ຊິດກັບປະທານປະເທດສີ ຈິ້ນຜິງຫຼາຍ ເກີດຂຶ້ນຫຼັງປະທານາທິບໍດີໂດນັລ ທຣໍາ ຜູ້ນໍາອາເມຣິກາພົບຫາລືກັບຜູ້ນໍາຈີນນອກຮອບການປະຊຸມສຸດຍອດຜູ້ນໍາກຸ່ມປະເທດເສດຖະກິດຂະໜາດໃຫຍ່ “ຈີ 20” ທີ່ເມືອງໂອຊາກ້າ ປະເທດຍີ່ປຸ່ນ ເມື່ອທ້າຍເດືອນມິຖຸນາ ຜ່ານມາ ເຊິ່ງທັງສອງຝ່າຍຕົກລົງ “ສະຫງົບເສິກ” ທາງການຄ້າເປັນຮອບທີ 2 ໂດຍເງື່ອນໄຂໃນລະຫວ່າງນີ້ ລວມເຖິງການກັບມາເຈລະຈາກັນໃໝ່ການບໍ່ຕັ້ງກໍາແພງພາສີຕອບໂຕ້ກັນ ແລະລັດຖະບານອາເມຣິກາທະຍອຍຜ່ອນຄາຍມາດຕະການຂວໍ້າບາດຕໍ່ບໍລິສັດຫົວເຫວີ່ຍເທັກໂນໂລຢີ.