ຍົນໂດຍສານລໍານ້ອຍຕົກໃນເກາະຮາວາຍ ເສຍຊີວິດ ໝົດລໍາ 11 ຄົນ

388

ຍົນໂດຍສານລໍານ້ອຍຕົກທາງພາກເໜືອຂອງລັດຮາວາຍ ປະເທດອາເມຣິກາ ເມື່ອຄ່ໍາວັນສຸກ ທີ່ຜ່ານມາ ເຮັດໃຫ້ມີຜູ້ເສຍຊີວິດໝົດລໍາ 11 ຄົນ.

ສໍານັກຂ່າວເອເອັຟພີລາຍງານຈາກລັດຮາວາຍ ປະເທດສະຫະລັດ ອາເມຣິກາ ເມື່ອວັນອາທິດ ທີ 23 ມິຖຸນາ ວ່າ ກົມການຂົນສົ່ງຂອງລັດຮາວາຍຖະແຫຼງ ວ່າ ຍົນໂດຍສານລໍານ້ອຍ ຂະໜາດສອງເຄື່ອງຈັກ ຄິງ ແອຣ໌ ປະສົບອຸບັດຕິເຫດຕົກ ເມື່ອຄ່ໍາວັນສຸກ ທີ່ຜ່ານມາ ໃກ້ກັບສະໜາມບິນເທິງເກາະໂອອາຮູ ທາງພາກເໜືອຂອງລັດຮາວາຍ ສົ່ງຜົນໃຫ້ຜູ້ໂດຍສານທັງ 11 ຄົນ ເທິງຍົນເສຍຊີວິດທັງໝົດ ສ່ວນຜູ້ກວດສອບດ້ານການບິນຈາກໜ່ວຍງານລັດຖະບານກາງສະຫະລັດໄດ້ເຂົ້າມາສອບສວນແລ້ວ.

ທ່ານມານູເອລ ພີ ເນເວສ ຫົວໜ້າໜ່ວຍດັບເພີງຮອນໂນລູລູ ກ່າວວ່າ ຍົນໂດຍສານລໍານີ້ ເປັນຍົນທີ່ນໍານັກໂດດຈ້ອງຂຶ້ນໄປໂດດຈ້ອງ ສ່ວນສະໜາມບິນດິລຣິງແຮມໃກ້ທີ່ເກີດເຫດຍົນຕົກນັ້ນ ເປັນສະໜາມບິນຣັນເວດຽວ ທີ່ໃຫ້ບໍລິການສະເພາະການໂດດຈ້ອງ ແລະ ຍົນໂດຍສານນັກໂດດຈ້ອງເທົ່ານັ້ນ.

ສ່ວນ ທ່ານເຄີກ ຄັລເວລ ນາຍົກເທສະມົນຕີ ເມືອງຮອນໂນລູລູ ກ່າວວ່າ ໄດ້ຕິດຕາມສະຖານະການຢ່າງໃກ້ຊິດ ແລະ ສູດມົນພາວະນາໃຫ້ກັບຄອບຄົວຂອງຜູ້ເຄາະຮ້າຍດ້ວຍ.