ລັດຖະບານຈີນ ໃຫ້ງົບ 126 ຕື້ກີບ ຊ່ວຍພື້ນທີ່ປະສົບໄພແຜ່ນດິນໄຫວເສສວນ

388

ສໍານັກຂ່າວຊິນຫົວ ລາຍງານຈາກນະຄອນຫຼວງປັກກິ່ງ ປະເທດຈີນ ເມື່ອວັນພຸດ ທີ 19 ມິຖຸນາ ວ່າ ກະຊວງການເງິນ ແລະ ກະຊວງບໍລິຫານຈັດການເຫດສຸກເສີນຂອງຈີນ ລະບຸ ເມື່ອວັນພຸດ ທີ 19 ມິຖຸນາ ວ່າ ລັດຖະບານໄດ້ມີການຈັດສັນງົບປະມານ 100 ລ້ານຢວນ (ປະມານ 126,9 ຕື້ກີບ) ໃຫ້ກັບປະຕິບັດການກູ້ໄພທີ່ມົນທົນເສສວນທີ່ໄດ້ເກີດເຫດແຜ່ນດິນໄຫວ ຂະໜາດ 6,0 ແມັກນິຈູດ ເມື່ອວັນທີ 18 ມິຖຸນາ ຜ່ານມາ.

ພ້ອມກັນນີ້, ລັດຖະບານຈີນຍັງໄດ້ຈັດສົ່ງເຕັ້ນ 5 ພັນຫຼັງ, ຕຽງສະໜາມ 10 ພັນໜ່ວຍ ແລະ ຜ້ານວມສໍາລັບຮອງເປັນບ່ອນນອນ 20 ພັນຜືນ ໄປເຖິງພື້ນທີ່ປະສົບໄພຮຽບຮ້ອຍແລ້ວ.

ຈາກລາຍງານຫຼ້າສຸດເມື່ອເວລາ 16:00 ໂມງ ຂອງວັນພຸດ ທີ 19ມິຖຸນາ ວ່າມີຜູ້ໄດ້ຮັບຜົນກະທົບຈາກເຫດໄພທໍາມະຊາດດັ່ງກ່າວ 243.880 ຄົນ ເສຍຊີວິດແລ້ວ 13ຄົນ ແລະໄດ້ຮັບບາດເຈັບ 220 ຄົນ ປະຊາຊົນຫຼາຍກວ່າ 52 ພັນຄົນ ໄດ້ຮັບການອົບພະຍົບອອກຈາກພື້ນທີ່ເກີດເຫດແລ້ວ.ນອກຈາກນີ້, ຍັງມີບ້ານເຮືອນທີ່ຫັກເພເສຍຫາຍຢ່າງໜັກ ລວມ 20.000 ຫຼັງ.