ປະຊາຊົນອັງກິດແຫ່ປະທ້ວງ ທຣໍາ ໃນນະຄອນຫຼວງລອນດອນ

346

ສໍານັກຂ່າວຕ່າງປະເທດລາຍງານ ເມື່ອວັນຈັນ ທີ 3 ມິຖຸນາ ຜ່ານມາ ວ່າ ມີກຸ່ມຜູ້ປະທ້ວງອອກມາຊຸມນຸມກັນບໍລິເວນດ້ານນອກຂອງພະລາດຊະວັງບັກກິງແຮມ ເພື່ອປະທ້ວງຂັບໄລ່ໂດນັລ ທຣໍາ ປະທານາທິບໍດີແຫ່ງສະຫະລັດ ອາເມຣິກາ ທີ່ເດີນທາງມາຢ້ຽມຢາມນະຄອນຫຼວງລອນດອນ ສະຫະຣາຊະອານາຈັກ.

ປະທານາທິບໍດີໂດນັລ ທຣໍາ ໄດ້ຮັບການຕ້ອນຮັບຈາກລາຊະວົງ ແລະ ຖືກກຸ່ມຜູ້ປະທ້ວງອອກມາຂັບໄລ່ ຫຼັງເດີນທາງມາຮອດນະຄອນຫຼວງລອນດອນ ເມື່ອວັນຈັນ ຜ່ານມາ ເຊິ່ງເປັນສ່ວນໜຶ່ງຂອງແຜນວຽກງານໃນການເດີນທາງມາຢ້ຽມຢາມສະຫະຣາຊະອານາຈັກ ເປັນໄລຍະ 3 ວັນ ໃນຄັ້ງນີ້.

ດ້ານກຸ່ມຜູ້ປະທ້ວງທີ່ອອກມາຊຸມນຸມກັນທົ່ວນະຄອນຫຼວງລອນດອນສ່ວນໃຫຍ່ຈະຊຸມນຸມກັນຢູ່ດ້ານນອກຂອງພະລາດຊະວັງບັກກິງແຮມແລະ ທີ່ສະຖານທີ່ພັກຢ່າງເປັນທາງການຂອງເອກອັກຄະລາຖະທູດສະຫະລັດ ທີ່ຕັ້ງຢູ່ທີ່ຣີເຈນທ໌ ພາກ(Regent’s Park ) ເຊິ່ງໄດ້ຮັບການປ້ອງກັນຢ່າງແໜ້ນໜາ.