ບໍລິສັດຜະລິດເຫຼັກລາຍໃຫຍ່ຂອງອັງກິດລົ້ມລະລາຍ

448

ບຣິຕິຊສະຕີລ ບໍລິສັດຜູ້ຜະລິດເຫຼັກກ້າຂະໜາດໃຫຍ່ສຸດ ອັນດັບ 2ຂອງສະຫະຣາຊະອານາຈັກ ປະສົບພາວະລົ້ມລະລາຍ ເມື່ອວັນພຸດ ຫຼັງການເຈລະຈາຂັ້ນສຸດທ້າຍ ລະຫວ່າງລັດຖະບານ ກັບ ກຸ່ມເຈົ້າຂອງບໍ່ສາມາດຕົກລົງເລື່ອງເງິນທຶນກອບກູ້ກິດຈະການໄດ້ ຄາດສົ່ງຜົນກະທົບຢ່າງໜັກຕໍ່ແຮງງານບໍລິສັດປະມານ 5 ພັນຄົນ ແລະ ແຮງງານໃນຕ່ອງໂສ້ອີກ ປະມານ 20 ພັນຄົນ.

<

ສໍານັກຂ່າວເອເອັຟພີແລະ ເອພີ ລາຍງານຈາກນະຄອນຫຼວງລອນດອນ ປະເທດອັງກິດ ເມື່ອວັນພຸດ ທີ 22 ພຶດສະພາ ວ່າ ສານສູງສຸດອັງກິດ ໃນນະຄອນຫຼວງລອນດອນມີຄໍາສັ່ງເມື່ອວັນພຸດໃຫ້ບໍລິສັດບຣິຕິຊສະຕີລ ເຂົ້າສູ່ຂະບວນການບັງຄັບຊໍາລະໜີ້ ເຊິ່ງໝາຍເຖິງຊັບສິນຂອງບໍລິສັດຈະຖືກຂາຍ ເພື່ອນໍາມາຊໍາລະໜີ້ຂະນະທີ່ ທ່ານເກຼັກ ຄລາກ ລັດຖະມົນຕີກະຊວງທຸລະກິດ, ພະລັງງານ ແລະ ຍຸດທະສາດອຸດສາຫະກໍາອັງກິດກ່າວວ່າ ລັດຖະບານພະຍາຍາມເຮັດວຽກຢ່າງໜັກກັບບໍລິສັດບຣິຕິຊ ສະຕີລ ແລະ ເຈົ້າຂອງບໍລິສັດຄືເກຣບູລ ແຄບປິຕອລ ແລະ ກຸ່ມເຈົ້າໜີ້ ເພື່ອສໍາຫຼວດທາງເລືອກທີ່ເປັນໄປໄດ້ທັງໝົດ ໃນການຫາທາງອອກສໍາລັບບຣິຕິຊສະຕີລ.

ທ່ານທິມໂຣເຊ ເລຂາທິການສະຫະພາບແຮງງານ ຈີເອັມບີ ເຊິ່ງມີສະມາຊິກຫຼາຍກວ່າ 631.000 ຄົນ ໃນເກືອບທຸກພາກອຸດສາຫະກໍາຂອງສະຫະຣາຊະອານາຈັກກ່າວວ່າ ການລົ້ມລະລາຍຂອງບໍລິສັດຜູ້ຜະລິດເຫຼັກຂະໜາດໃຫຍ່ ອັນດັບ 2 ຂອງອັງກິດ ຖືເປັນຂ່າວຮ້າຍສຸດສະເທືອນໃຈ ສໍາລັບແຮງງານຫຼາຍສິບພັນຄົນໃນສະຫະຣາຊະອານາຈັກ ເຊິ່ງໃນຈໍານວນນີ້ ລວມເຖິງແຮງງານ ປະມານ 5 ພັນຄົນຂອງບຣິຕິຊ ສະຕີລ ແລະ ອີກປະມານ 20 ພັນຄົນໃນຫ່ວງໂສ້ຂອງບໍລິສັດ.