ຟອດ ກຽມປົດພະນັກງານ 7 ພັນຄົນ ຫຼຸດລາຍຈ່າຍຄັ້ງໃຫຍ່

436

ຟອດ ມໍເຕີ ບໍລິສັດຜູ້ຜະລິດລົດລາຍໃຫຍ່ຂອງໂລກ ແຫ່ງສະຫະລັດ ປະກາດແຜນປົດພະນັກງານ 7 ພັນຄົນ ຫຼື 10% ຂອງພະນັກງານຮັບເງິນເດືອນທີ່ມີຢູ່ທົ່ວໂລກ ເປັນສ່ວນໜຶ່ງຂອງການປັບປ່ຽນພາຍໃນອົງກອນ ແລະ ຫຼຸດລາຍຈ່າຍ ເຊິ່ງຈະຊ່ວຍໃຫ້ບໍລິສັດສາມາດປະຢັດເງິນໄດ້ປີລະປະມານ 600 ລ້ານໂດລາ (5.200 ຕື້ກີບ).

ສໍານັກຂ່າວຕ່າງປະເທດລາຍງານຈາກນະຄອນນິວຢອກ ປະເທດສະຫະລັດ ອາເມຣິກາ ເມື່ອວັນຈັນ ທີ 20 ພຶດສະພາ ວ່າ ຖະແຫຼງການຂອງຟອດ ມໍເຕີ ກ່າວວ່າ ບໍລິສັດຈະເລິ່ມແຈ້ງໃຫ້ພະນັກງານຮັບຮູ້ກ່ຽວກັບການຢຸດຈ້າງ ຕັ້ງແຕ່ວັນອັງຄານ ທີ 21 ພຶດສະພາ ແລະ ການຢຸດຈ້າງຈະແລ້ວສໍາເລັດພາຍໃນໝົດເດືອນສິງຫາ ປີນີ້ ໂດຍພະນັກງານທີ່ຖືກປົດປະມານ 2.400 ຄົນ ຢູ່ໃນອາເມຣິກາເໜືອ ແລະ ອີກ 1.500 ຄົນ ປົດໂດຍໃຫ້ພະນັກງານສະໝັກໃຈລາອອກ.

ໃນຈົດໝາຍທີ່ສົ່ງເຖິງພະນັກງານ ແລະ ລູກຈ້າງ ເມື່ອເຊົ້າວັນຈັນ ທ່ານຈິມ ແຮັກເກັດ ຊີອີໂອຂອງຟອດ ມໍເຕີ ກ່າວວ່າ ຄວາມເຄື່ອນໄຫວເປັນຄວາມພະຍາຍາມປັບປຸງລະບົບພາຍໃນບໍລິສັດ ແລະ ຮື້ໂຄງສ້າງການບໍລິຫານຈັດການ ນອກເໜືອຈາກຄວາມປາຖະໜາໃນການຫຼຸດລາຍຈ່າຍ.

ແຜນປົດພະນັກງານຂອງຟອດ ຄ້າຍກັບແຜນການປົດພະນັກງານຝ່າຍບໍລິຫານຂອງບໍລິສັດເຈເນີຣັລ ມໍເຕີ ຫຼື ຈີເອັມ ຄ້າຍລົດໃຫຍ່ຄູ່ແຂ່ງທີ່ປະກາດໃນເດືອນພະຈິກ ປີຜ່ານມາ ແຕ່ຈີເອັມປົດຫຼາຍກວ່າຄືປະມານ 14 ພັນຄົນຂອງພະນັກງານທີ່ບໍ່ຢູ່ໃນສັງກັດສະຫະພາບແຮງງານ ຫຼື 15% ຂອງພະນັກງານທັງໝົດ ແລະ ຕາມແຜນຈີເອັມປະກາດຈະປິດໂຮງງານ 5 ແຫ່ງ ໃນສະຫະລັດ ແລະ ການາດາດ້ວຍ.

ປີຜ່ານມາ ຟອດ ມໍເຕີ ປະກາດລະດົມງົບ 11.000 ລ້ານໂດລາ (ປະມານ 95.740 ຕື້ກີບ) ເພື່ອກໍານົດຮູບແບບທຸລະກິດໃໝ່ ໂດຍຫວັງກະຕຸ້ນຍອດຂາຍໃນຕ່າງແດນ ແລະ ປັບປຸງລົດໃຫຍ່ໃນສັງກັດໃຫ້ທັນສະໄໝ ໂດຍຈະເນັ້ນລົດໃຫຍ່ໄຟຟ້າ ແລະ ເທັກໂນໂລຢີຂັບເຄື່ອນດ້ວຍລະບົບອັດຕະໂນມັດ.