ລົດເມຊຽງໄຮ້ 2 ພັນຄັນ ປ່ຽນຈາກເຊື້ອໄຟ ມາໃຊ້ “ນໍ້າມັນເຫຼືອຖິ້ມ” ໃນທໍ່ລະບາຍນໍ້າເປື້ອນ

399

ສໍານັກຂ່າວຊິນຫົວຂອງຈີນລາຍງານວ່າເມື່ອວັນອັງຄານ ທີ 7 ພຶດສະພາ ທີ່ຜ່ານມາ ຈິ່ວຊື່ກຣຸ໊ບ (ShanghaiJiushi Group) ບໍລິສັດລົດໂດຍສານປະຈໍາທາງສາຍຫຼັກຂອງເມືອງຊຽງໄຮ້ໄດ້ເລິ່ມປ່ຽນມາໃຊ້ເຊື້ອໄຟໄບໂອກາຊວນ ໃນລົດໂດຍສານປະຈຳທາງແລ້ວ ຈໍານວນ 2.000 ຄັນ ຕາມແຜນອະນຸລັກສິ່ງແວດລ້ອມຂອງເມືອງທີ່ມີການນໍານໍ້າມັນທີ່ໄດ້ປຸງແຕ່ງອາຫານໄປແລ້ວກັບມານຳໃຊ້ໃໝ່ເປັນເຊື້ອໄຟລົດໃຫຍ່.

ຈາກອັດຕາການໃຊ້ນໍ້າມັນໃນປັດຈຸບັນ ບໍລິສັດຈິ່ວຊື່ ຄາດວ່າ ພາຍໃນປີນີ້ລົດໂດຍສານປະຈໍາທາງທີ່ຂັບເຄື່ອນດ້ວຍນໍ້າມັນກາຊວນ ແລະ ແບບໄຮບຣີດ (ກາຊວນ – ໄຟຟ້າ) ຈະໃຊ້ເຊື້ອໄຟໄບໂອກາຊວນບີ5 ລວມກວ່າ 22.000 ໂຕ້ນ.

ນໍ້າມັນໄບໂອກາຊວນບີ 5 ເປັນເຊື້ອໄຟທີ່ມີສ່ວນປະສົມຂອງໄບໂອກາຊວນ ເຊິ່ງເຮັດມາຈາກນໍ້າມັນປຸງອາຫານທີ່ເຫຼືອຖິ້ມຕາມທໍ່ລະບາຍນໍ້າ(Gutteroil) 5% ແລະ ອີກ 95% ເປັນເຊື້ອໄຟປິໂຕລຽມກາຊວນ ເຊິ່ງນໍ້າມັນໄບໂອກາຊວນ ບີ 5 ນີ້ ໄດ້ຮັບການພິສູດແລ້ວວ່າ ສາມາດຊ່ວຍຫຼຸດການປ່ອຍມົນລະພິດ ເຊັ່ນ:ໂລຫະໜັກ ແລະ ຝຸ່ນລະອຽດ (Fine Particles) ທີ່ມີເສັ້ນຜ່ານສູນກາງນ້ອຍກວ່າ2,5 ໄມຄຣອນ ໄດ້ຫຼາຍເຖິງ 10% ອີກທັງຍັງ ປ່ອຍແກ໊ສໄນໂຕຣເຈນອອກໄຊ ທີ່ມີຄວາມບໍລິສຸດເຖິງ80% ອີກດ້ວຍ.

ດ້ວຍຄວາມທີ່ຊຽງໄຮ້ເປັນໜຶ່ງໃນມະຫານະຄອນທີ່ສໍາຄັນຂອງປະເທດຈີນ ຈຶ່ງມີນໍ້າມັນປຸງອາຫານເຫຼືອຖິ້ມຫຼາຍກວ່າ 30.000 ໂຕ້ນຕໍ່ປີ ເຊິ່ງນໍ້າມັນສ່ວນນີ້ສາມາດນໍາມາກັ່ນເພື່ອໃຊ້ເຮັດເປັນເຊື້ອໄຟໄບໂອກາຊວນບີ 5 ໄດ້ຫຼາຍເຖິງ 600.000 ໂຕ້ນ.

ຮອງຜູ້ຈັດການທົ່ວໄປຂອງບໍລິສັດຊິໂນເປັກມາຣ໌ເກັດຕິ້ງ ຊຽງໄຮ້ ບໍລິສັດໃນເຄືອທຸລະກິດຄ້ານໍ້າມັນລາຍໃຫຍ່ ຊິໂນເປັກ ກ່າວວ່າການໃຊ້ນ້ຳມັນໄບໂອກາຊວນນີ້ ບໍ່ພຽງແຕ່ຫຼຸດບັນຫາທາງສິ່ງແວດລ້ອມທີ່ເກີດຂຶ້ນຈາກເຊື້ອໄຟແຕ່ຍັງປ່ຽນນໍ້າມັນເຫຼືອຖິ້ມໃຫ້ກາຍເປັນຊັບພະຍາກອນໃໝ່ ແລະ ຫຼຸດການໃຊ້ນໍ້າມັນປຸງອາຫານຊໍ້າຫຼາຍຮອບຂອງບັນດາຮ້ານອາຫານທີ່ຕ້ອງການຫຼຸດຕົ້ນທຶນອີກດ້ວຍ.