ເສຍຊີວິດ 1 ເຈັບ 5 ຄົນ! ເຫດໄຟໄໝ້ຄອນໂດ ໃນນະຄອນຫຼວງມະນິລາ ປະເທດຟີລິບປິນ

338

ເກີດເຫດໄຟໄໝ້ຊັ້ນເທິງຂອງອາຄານຄອນໂດ ສູງ 21 ຊັ້ນ ໃນນະຄອນຫຼວງມະນິລາ ປະເທດຟິລິບປິນ ລະຫວ່າງສະພາບອາກາດຮ້ອນ ສົງຜົນໃຫ້ມີຜູ້ເສຍຊີວິດ 1 ຄົນ ແລະ ບາດເຈັບ 5 ຄົນ.

ສໍານັກຂ່າວເອພີລາຍງານຈາກນະຄອນຫຼວງມະນິລາ ປະເທດຟິລິບປິນ ເມື່ອວັນຈັນ ທີ 29 ເມສາ ວ່າ ທ່ານ ເອັດວິນ ໂອລິເວີເຣຊ ນາຍົກເທສະມົນຕີນະຄອນຫຼວງມະນິລາ ເປີດເຜີຍວ່າ ລົດດັບເພີງກວ່າ 100 ຄັນ ໄດ້ຮັບຄໍາສັ່ງໃຫ້ມາຄວບຄຸມເຫດໄຟໄໝ້ເປັນອາຄານຄອນໂດມິນຽມ ສູງ 21 ຊັ້ນ ຊື່ແປຊິຟິກ ໂຄສຕ໌ ພລາຊາ ຄອນໂດມິນຽມ ຕັ້ງຢູ່ໃນເຂດເມືອງປາຣານາເກ ຂອງນະຄອນຫຼວງມະນິລາ ເຊິ່ງຕິດກັບຖະໜົນລຽບໄປຕາມແຄມຝັ່ງຂອງອ່າວມະນິລາ ແຕ່ຕ້ອງປິດໃຫ້ບໍລິການ 1 ເລນ ເພາະເສດຊິ້ນສ່ວນຂອງອາຄານຕົກລົງມາຈາກຊັ້ນເທິງຂອງຄອນໂດມິນຽມ ໄຟໄດ້ລຸກລາມໄປຕາມຊັ້ນເທິງຂອງຕົວອາຄານ ເຊິ່ງເຈົ້າໜ້າທີ່ພົບສົບຜູ້ເສຍຊີວິດ 1 ຄົນ ເປັນຜູ້ເຖົ້າເພດຍິງ ແລະ ຍັງມີອີກ 5 ຄົນ ໄດ້ຮັບບາດເຈັບ ສ່ວນເຈົ້າໜ້າທີ່ດັບເພີງ 1 ຄົນ ມີອາການເມື່ອຍລ້າຈົນໄດ້ຮັບການປະຖົມພະຍາບານໃນເບື້ອງຕົ້ນ.

ເຈົ້າໜ້າທີ່ສອບສວນຈະເຂົ້າກວດກາຊັ້ນເທິງຂອງຕົວອາຄານທີ່ເກີດໄຟໄໝ້ເຊິ່ງເຈົ້າໜ້າທີ່ດັບເພີງຕ້ອງໃຊ້ເວລາ 3 ຊົ່ວໂມງ ຈຶ່ງສາມາດຄວບຄຸມໄຟໄດ້ສ່ວນຕົ້ນເຫດຂອງໄຟໄໝ້ຄັ້ງນີ້ ແມ່ນຢູ່ໃກ້ກັບປ່ອງຖິ້ມຂີ້ເຫຍື້ອ ຈາກຊັ້ນເທິງສຸດເຖິງຊັ້ນລຸ່ມຂອງອາຄານສ່ວນດ້ານເທິງສຸດຂອງຕົວອາຄານມີຄວັນ ລອຍອອກມາຈາກຫ້າຊັ້ນເທິງຂອງອາຄານທີ່ຖືກໄຟໄໝ້.

ສໍາລັບອາຄານຄອນໂດມິນຽມແປຊິຟິກ ໂຄສຕ໌ ພລາຊາ ສ້າງຂຶ້ນຫຼາຍວ່າ 20 ປີແລ້ວ ມີຊາວຈີນເຂົ້າມາອາໄສຢູ່ເປັນຈໍານວນຫຼາຍ ໃນໄລຍະຫຼາຍປີ ທີ່ຜ່ານມາ.

ເຈົ້າໜ້າທີ່ດັບເພີງຕັ້ງຂໍ້ສັງເກດວ່າມີເຫດໄຟໄໝ້ກວ່າ 100 ຄັ້ງ ໃນເມືອງນະຄອນຫຼວງມະນິລາສະເພາະລະດູຮ້ອນຂອງປີນີ້ ເຊິ່ງຫຼາຍກວ່າຫຼາຍປີ ທີ່ຜ່ານມາ ສາເຫດແມ່ນຍ້ອນບັນຫາໄຟຟ້າ,ໃຕ້ທຽນ ຫຼື ໃຕ້ຕະກຽງປະໄວ້ແບບປະໝາດ ແລ້ວຍັງມີໄຟໄໝ້ຊຸມຊົນແອອັດອີກດ້ວຍ.