ທຣຳ ຫ່ວງວິກິດໄຂ້ໝາກແດງ ໃນສະຫະລັດ ເຕືອນປະຊາຊົນເລັ່ງສັກຢາຕ້ານເຊື້ອ

502

ປະທານາທິບໍດີໂດນັລ ທຣຳ ຜູ້ນໍາສະຫະລັດ ຮຽກຮ້ອງໃຫ້ປະຊາຊົນຟ້າວເຂົ້າຮັບການສັກຢາປ້ອງກັນໄຂ້ໝາກແດງ ເຊິ່ງກໍາລັງແຜ່ລະບາດໃນປະເທດຢ່າງຮຸນແຮງທີ່ສຸດ ໃນຮອບເກືອບ 20 ປີ.

ສໍານັກຂ່າວຕ່າງປະເທດລາຍງານຈາກນະຄອນຫຼວງວໍຊິງຕັນ ປະເທດສະຫະລັດ ອາເມຣິກາ ເມື່ອວັນສຸກ ທີ 26 ເມສາ ວ່າ ປະທານາທິບໍດີໂດນັລ ທຣຳ ກ່າວເມື່ອວັນສຸກກ່ຽວກັບສະຖານະການຂອງການແຜ່ລະບາດໄຂ້ໝາກແດງ ໃນອາເມຣິກາ ເຊິ່ງທາງສູນປ້ອງກັນ ແລະ ຄວບຄຸມໂຣກ (CDC) ໄດ້ລາຍງານການພົບຜູ້ປ່ວຍສະສົມ ຕັ້ງແຕ່ຕົ້ນປີນີ້ ເກືອບ 700 ຄົນ ໃນ 22 ລັດ ຖືເປັນສະຖິຕິສູງທີ່ສຸດ ທັ້ງທີ່ກະຊວງສາທາລະນະສຸກເຄີຍປະກາດໃຫ້ໄຂ້ໝາກແດງໝົດໄປຈາກປະເທດ ເມື່ອປີ 2000 ວ່າ “ການສັກຢາປ້ອງກັນເປັນເລື່ອງສໍາຄັນຫຼາຍ” ທຸກຄົນບໍ່ວ່າຜູ້ໃຫຍ່ ຫຼື ເດັກນ້ອຍ ໃນຕອນນີ້ ຄວນເຂົ້າຮັບການສັກຢາໃຫ້ຄົບຕາມແພດແນະນຳ.

ທັງນີ້ ກະຊວງສາທາລະນະສຸກຂອງອາເມຣິກາ ໄດ້ປະຊາສຳພັນໃຫ້ເດັກນ້ອຍຕ້ອງເຂົ້າຮັບການສັກຢາປ້ອງກັນໄຂ້ໝາກແດງ, ໝາກເບີດ ແລະ ໄຂ້ໝາກແດງເຢຍລະມັນ ກ່ອນອາຍຸ 3 ປີ ຢ່າງໃດກໍ່ຕາມ ໃນໄລຍະບໍ່ເທົ່າໃດປີ ຜ່ານມາ ພັດເກີດມີການເຜີຍແຜ່ “ລັດທິຕໍ່ຕ້ານການສັກຢາປ້ອງກັນ” ເຊິ່ງມັນກໍ່ເປັນທີ່ ປະຫຼາດໃຈວ່າ ມັນເກີດຂຶ້ນໃນຫຼາຍປະເທດທີ່ພັດທະນາແລ້ວ ທັງທາງເສດຖະກິດ ແລະ ອຸດສາຫະກໍາ ໂດຍສະຫະລັດເປັນອັນດັບ 1 ທີ່ລາຍງານຂອງອົງການອະນາໄມໂລກ (WHO) ລະບຸວ່າ ໃນສ່ວນຂອງການປ້ອງກັນໄຂ້ໝາກແດງນັ້ນ ມີເດັກອາເມຣິກັນຫຼາຍກວ່າ 2,5 ລ້ານຄົນ ຍັງບໍ່ເຄີຍໄດ້ຮັບການສັກຢາຮອບທໍາອິດ, ຮອງລົງມາຄືຝຣັ່ງ ສະຖິຕິ 600,000 ຄົນ ແລະ ສະຫະຣາຊະອານາຈັກ ສະຖິຕິ 500.000 ຄົນ.

ໃນເວລາດຽວກັນ ມະຫາວິທະຍາໄລແຄລິຟໍເນຍ ວິທະຍາເຂດລອສແອນເຈລິສ (UCLA) ແລະ ມະຫາວິທະຍາໄລແຄລິຟໍເນຍສະເຕດ ວິທະຍາເຂດລອສແອນເຈລິສເຊັ່ນກັນ (Cal State LA) ໄດ້ລາຍງານການກັກບໍລິເວນນັກສຶກສາ ແລະ ເຈົ້າໜ້າທີ່ລວມກັນ ຫຼາຍກວ່າ 1.000 ຄົນ ໂດຍຖະແຫຼງການຂອງແຄລສະເຕດ ແອລເອ ເຜີຍວ່າ ພົບຜູ້ຕ້ອງສົງໄສປ່ວຍເປັນໄຂ້ໝາກແດງທີ່ຫ້ອງສະໝຸດແຫ່ງໜຶ່ງຂອງມະຫາວິທະຍາໄລ ເມື່ອວັນທີ 11 ເມສາ ທີ່ຜ່ານມາ ສ່ວນຖະແຫຼງການຂອງ ຢູຊີແອລເອ ໃຫ້ຂໍ້ມູນພຽງແຕ່ວ່າ ເລິ່ມຄວບຄຸມສະຖານະການໄດ້ ແລະ ຖ້າເປັນໄປໄດ້ຈະຍຸຕິມາດຕະການກັກບິເວນຜູ້ຕ້ອງສົງໄສທີ່ຕິດເຊື້ອ ພາຍໃນວັນອັງຄານ ທີ 30 ເມສາ ນີ້ ແຕ່ມະຫາວິທະຍາໄລທັງສອງແຫ່ງໃຫ້ຂໍ້ມູນ ວ່າ ໃນລະຫວ່າງນີ້ ມີຜູ້ໄດ້ຮັບການຢືນຢັນວ່າປອດເຊື້ອແມ່ນໄດ້ຮັບອະນຸຍາດໃຫ້ອອກຈາກພື້ນທີ່ກັກບໍລິເວນແລ້ວຫຼາຍຮ້ອຍຄົນ.