ຈີນເພີ່ມໂຄຕ້າຮັບຊື້ເຂົ້າຕໍ່ປີຈາກມຽນມາ ອີກ 4 ເທົ່າ

378

ລັດຖະບານຈີນ ເພິ່ມປະລິມານການສັ່ງຊື້ ເຂົ້າຂອງມຽນມາ ອີກປີລະ 4 ເທົ່າເປັນ 400.000 ໂຕ້ນ ແຕ່ຕ້ອງບໍ່ມີສານປົນເປື້ອນຂອງຂອງເຂົ້າທີ່ຫັກ ຫຼື ເຂົ້າແຕກ.

ສໍານັກຂ່າວຕ່າງປະເທດລາຍງານຈາກເມືອງຢ່າງກຸ້ງ ປະເທດມຽນມາ ເມື່ອວັນສຸກ ທີ 26 ເມສາ ວ່າ ກະຊວງການຄ້າຂອງມຽນມາ ໄດ້ອອກຖະແຫຼງການ ເມື່ອວັນພະຫັດ ວ່າ ຈີນເພິ່ມໂຄຕ້າການສັ່ງຊື້ເຂົ້າ “ທີ່ມີຄຸນນະພາບ” ເຊິ່ງບໍ່ລວມເຖິງເຂົ້າແຕກ ຫຼື ເຂົ້າຫັກ ຈາກມຽນມາ ເປັນ 400.000 ໂຕ້ນຈາກປັດຈຸບັນ ເຊິ່ງມີສັນຍາຊື້ປີລະ 100.000 ໂຕ້ນ ໂດຍຄວາມຄືບໜ້າຄັ້ງສໍາຄັນດັ່ງກ່າວເປັນຜົນຈາກການປະຊຸມລະບຽງເສດຖະກິດລະດັບທະວີພາຄີ ຄັ້ງທີ 2 ທີ່ມົນທົນຢູນໜານ ທາງພາກຕາເວັນຕົກສຽງໃຕ້ຂອງຈີນ ເມື່ອເດືອນກຸມພາ ຜ່ານມາ ຕາມການເປີດເຜີຍຂອງສະຫະພັນເຂົ້າມຽນມາ (MRF).

ຂະນະດຽວກັນ ລັດຖະບານປັກກິ່ງ ຈະຍົກລະດັບມາດຕະການກວດກາການສົ່ງອອກເຂົ້າຜ່ານເຂດແດນທີ່ຕິດກັບມຽນມາດ້ວຍເພື່ອຄັດເຟັ້ນສະເພາະເຂົ້າທີ່ມີຄຸນະພາບ ແລະ ປ້ອງກັນການປົນເປື້ອນຂອງເຂົ້າຫັກ ຫຼື ເຂົ້າແຕກອີກທັງເພື່ອບໍ່ໃຫ້ເປັນການລະເມີດຂໍ້ຕົກລົງຊື້ຂາຍເຂົ້າ ລະຫວ່າງ ລັດ ກັບ ລັດ.

ນອກຈາກນີ້ລາຍງານຂອງເອັມອາເອັຟ ລະບຸ ມູນຄ່າການສົ່ງອອກເຂົ້າຂອງມຽນມາສູ່ຕະຫຼາດໂລກ ປະມານ 2 ລ້ານໂຕ້ນ ນັບຕັ້ງແຕ່ເດືອນເມສາ ປີທີ່ຜ່ານມາ ຈົນເຖິງໝົດເດືອນມີນາທີ່ຜ່ານມາ ສ້າງລາຍ ໄດ້ເຂົ້າສູ່ປະເທດ ປະມານ 650ລ້ານໂດລາ (ປະມານ 5.640 ຕື້ກີບ) ເພິ່ມຂຶ້ນ 130 ລ້ານໂດລາ (ປະມານ 1.120 ຕື້ກີບ)ເມື່ອທຽບກັບມູນຄ່າການສົ່ງອອກເຂົ້າ ໃນໄລຍະເວລາດຽວກັນກ່ອນໜ້ານັ້ນ ເຊິ່ງຫຼາຍກວ່າ 450.000 ໂຕ້ນ ແຕ່ລວມເຂົ້າຫັກ ຫຼື ເຂົ້າແຕກດ້ວຍ.