ປູຕິນ ຈະຮ່ວມປະຊຸມສຸດຍອດ ກັບ ຜູ້ນໍາເກົາຫຼີເໜືອ ວັນພະຫັດ ນີ້

466

ປະທານາທິບໍດີວະລາດີເມຍ ປູຕິນ ຈະພົບປະຫາລືກັບ ທ່ານຄິມ ຈອງ-ອຶນ ໃນການປະຊຸມສຸດຍອດຮ່ວມກັນທີ່ເມືອງວະລາດິວອສຕັອຄ ເມືອງແຄມຝັ່ງ ປາຊິຟິກຂອງຣັສເຊຍ ໃນວັນພະຫັດ ທີ 25 ເມສາ ນີ້.

ສໍານັກຂ່າວເອພີລາຍງານຈາກນະຄອນຫຼວງມອສໂກ ປະເທດຣັສເຊຍ ເມື່ອວັນພຸດ ທີ 23 ເມສາ ວ່າ ວັງເຄມລິນ ທຳນຽບປະທານາທິບໍດີຣັສເຊຍ ໄດ້ອອກຖະແຫຼງການ ວ່າ ປະທານາທິບໍດີວະລາດິເມຍ ປູຕິນ ແຫ່ງລັດເຊຍ ຈະພົບເຈລະຈາກັບທ່ານຄິມ ຈອງ-ອຶນ ຜູ້ນໍາສູງສຸດຂອງເກົາຫຼີເໜືອ ໃນການປະຊຸມສຸດຍອດທີ່ຈະມີຂຶ້ນ ໃນວັນພະຫັດ ທີ 25 ເມສາ ນີ້ ທີ່ເມືອງວະລາດິວອສຕັອຄ ເມືອງແຄມຊາຍຝັ່ງປາຊິຟິກ ທາງພາກຕາເວັນອອກໄກຂອງປະເທດຣັສເຊຍ ເຊິ່ງມີການກຽມການດ້ານສະຖານທີ່ໄວ້ຮຽບຮ້ອຍແລ້ວ ແຕ່ຍັງຂໍປິດເປັນຄວາມລັບໄວ້ກ່ອນ ດ້ວຍເຫດຜົນດ້ານຄວາມປອດໄພຂອງທາງຝ່າຍເກົາຫຼີເໜືອ.

ທ່ານຢູຣິ ອູຊາຄັອຟ ທີ່ປຶກສາວັງເຄມລິນຖະແຫຼງວ່າ ການເຈລະຈາຫາລືຈະມຸ່ງເນັ້ນເຖິງປະເດັນທີ່ຍັງ ຕົກລົງກັນບໍ່ໄດ້ ວ່າດ້ວຍ ໂຄງການນິວເຄຣຍເກົາຫຼີເໜືອໂດຍຣັສເຊຍຈະຫາທາງຜະນຶກກໍາລັງໄປໃນທິດທາງທີ່ດີ ເຊິ່ງເຄີຍຖືກຂັດຂວາງຈາກຝ່າຍປະທານາທິບໍດີໂດນັລທຣຳ ຂອງສະຫະລັດ ຈາກການປະຊຸມສຸດຍອດທີ່ຜ່ານມາ ກັບຜູ້ນໍາເກົາຫຼີເໜືອ ນອກຈາກນັ້ນ, ຣັສເຊຍຈະຫາທາງທີ່ຈະຊ່ວຍສ້າງຫຼືກໍານົດເງື່ອນໄຂ ແລະ ບັນຍາກາດທີ່ດີ ເພື່ອໃຫ້ບັນລຸຂໍ້ຕົກລົງຂອງບັນຫາເທິງເຂດມະຫາສະໝຸດເກົາຫຼີ.

ທີ່ປຶກສາວັງເຄັມລິນ ຍັງຊີ້ໃຫ້ເຫັນແຜນຣັສເຊຍ-ຈີນ ທີ່ສະເໜີແນວທາງເທື່ອລະຂັ້ນຕອນຂອງການແກ້ບັນຫານິວເຄຣຍເກົາຫຼີເໜືອ ພ້ອມຮຽກຮ້ອງໃຫ້ຜ່ອນຄາຍມາດຕະການຂວໍ້າບາດເກົາຫຼີເໜືອ ແລະ ຫຼັກປະກັນດ້ານຄວາມໝັ້ນຄົງໃຫ້ກັບເກົາຫຼີເໜືອ ນອກຈາກນັ້ນແລ້ວ ການລະງັບການທົດລອງນິວເຄຣຍເກົາຫຼີເໜືອ ແລະ ຫຼຸດລະດັບການຮ່ວມຊ້ອມຮົບຂອງສະຫະລັດ ກັບ ເກົາຫຼີໃຕ້ ຈະຊ່ວຍຜ່ອນຄາຍຄວາມຕຶງຄຽດ ແລະ ສ້າງເງື່ອນໄຂສໍາລັບຄວາມຄືບໜ້າ ໃນການເຈລະຈາເປັນລໍາດັບຕໍ່ໄປ.

ວະລະຂອງການຫາລື ລະຫວ່າງປະທານາທິບໍດີຣັສເຊຍກັບ ຜູ້ນຳເກົາຫຼີເໜືອ ຍັງລວມເຖິງຄວາມຮ່ວມມືລະດັບທະວິພາຄີ ເພາະມູນຄ່າທາງການຄ້າ ລະຫວ່າງຣັສເຊຍ ກັບ ເກົາຫຼີເໜືອ ນັ້ນ ໜ້ອຍຫຼາຍເມືອປີທີ່ຜ່ານມາ ມູນຄ່າພຽງ 34 ລ້ານໂດລາ (ປະມານ 294 ຕື້ກີບ)ເທົ່ານັ້ນ ສາເຫດສຳຄັນເປັນຍ້ອນມາດຕະການຂວໍ້າບາດຂອງນານາຊາດນັ້ນເອງ.