ເກີດເຫດຍົນນ້ອຍຕົກໃສ່ບ້ານຄົນ ໃນຊິລີ ເສຍຊີວິດ 6 ຄົນ

386

ເມື່ອວັນອັງຄານ ທີ 16 ເມສາ ທີ່ຜ່ານມາ ຕໍາຫຼວດທ້ອງຖິ່ນໄດ້ລາຍງານວ່າ ເກີດເຫດຍົນຂະໜາດນ້ອຍຕົກໃສ່ບ້ານພັກອາໄສຂອງປະຊາຊົນ ທາງພາກໃຕ້ຂອງປະເທດຊິລີ ເຮັດໃຫ້ມີຜູ້ເສຍຊີວິດຢ່າງໜ້ອຍ 6 ຄົນ.

ອຸບັດຕິເຫດຄັ້ງນີ້ ເກີດຂຶ້ນຫຼັງຍົນບິນຂຶ້ນຈາກສະໜາມບິນສ່ວນຕົວ ລາ ປາໂລມາ (La Paloma) ໄດ້ບໍ່ດົນ ເຊິ່ງສະໜາມບິນແຫ່ງນີ້ ຕັ້ງຢູ່ໃນເຂດ ລອສ ລາກອສ (Los Lagos) ຫ່າງຈາກເຂດທີ່ພັກອາໄສ ຂອງເມືອງເປີໂຕ ມອນ (Puerto Montt) ປະມານ 2 ກິໂລແມັດ.

ທ່ານ ແຮຣີ່ ເຈີເກນເຊນ ຜູ້ວ່າການເຂດລອສ ລາກອສ ກ່າວວ່າ “ຍົນລໍານີ້ເປັນຂອງບໍລິສັດເອກະຊົນ Archipielago ຜູ້ໃຫ້ບໍລິການຖ້ຽວບິນ ເຊິ່ງຍົນລຳດັ່ງກ່າວທີ່ຕົກ ແລະ ລະເບີດ ໃສ່ບ້ານເຮືອນທີ່ຖືກໄຟໄໝ້ຈົນໝົດ ໂຊກດີບໍ່ມີຜູ້ພັກອາໄສຢູ່. ເຖິງແມ່ນວ່າແຜນການບິນຈະລະບຸວ່າ ມີນັກບິນ 1 ຄົນ ແລະ ຜູ້ໂດຍສານ 8 ຄົນ ຢູ່ເທິງຍົນ ແຕ່ຫໍຄວບຄຸມການບິນຢືນຢັນວ່າ ມີນັກບິນ 1 ຄົນ ແລະ ຜູ້ໂດຍສານອີກ 5 ຄົນ.

ສະໜາມບິນລາ ປາໂລມາ ເປັນສະໜາມບິນທີ່ສໍາຄັນທີ່ສຸດໃນເມືອງເປີໂຕ ມອນ ທີ່ໃຫ້ບໍລິການຂົນສົ່ງຜູ້ໂດຍສານ ແລະ ສິນຄ້າລະຫວ່າງແຜ່ນດິນໃຫຍ່ຂອງຊິລີ ແລະ ໝູ່ເກາະຊິໂລເອ ເຊິ່ງຢູ່ຫ່າງຈາກສະໜາມບິນທີ່ໃກ້ທີ່ສຸດຂອງແຜ່ນດິນໃຫຍ່ 70 ກິໂລແມັດ.