ຄັ້ງທໍາອິດຂອງໂລກ! ອິດສະຣາແອນ ສ້າງຫົວໃຈທຽມຈາກເນື້ອເຍື່ອຄົນ ດ້ວຍຈັກພິມ 3 ມິຕິ

386

ທີມນັກວິທະຍາສາດອິດສະຣາແອນ ໄດ້ຜະລິດຫົວໃຈຈາກຈັກພິມ 3 ມິຕິ ທີ່ໃຊ້ຊິ້ນສ່ວນເນື້ອເຍື່ອຂອງຄົນ ໃນການສ້າງຫົວໃຈໃໝ່ຂຶ້ນມາ ເພື່ອເປັນໃບເບີກທາງໃນການຮັກສາຜູ້ປ່ວຍທີ່ຕ້ອງການປ່ຽນຖ່າຍຫົວໃຈ ໃນອະນາຄົດ.

ຄວາມກ້າວໜ້າທາງການແພດຄັ້ງໃໝ່ທີ່ຕີພິມລົງໃນວາລະສານAdvanced Science ເຜີຍຮູບພາບຫົວໃຈຂະໜາດ 2,5 ເຊັນຕີແມັດ ຂະໜາດນ້ອຍເທົ່າກັບຫົວໃຈຂອງກະຕ່າຍແຕ່ມີໂຄງສ້າງຂອງຫົວໃຈທີ່ໃກ້ຄຽງຫົວໃຈຂອງຄົນແທ້ໆທັງໝົດ ເຊິ່ງສ້າງຂຶ້ນມາຈາກຈັກພິມ 3 ມິຕິ.

ອາຈານ Tal Dvir ຫົວໜ້າທີມນັກວິທະຍາສາດຈາກມະຫາວິທະຍາໄລ Tel Aviv University ຖະແຫຼງຂ່າວຄວາມສໍາເລັດ ເມື່ອວັນອັງຄານ ທີ່ຜ່ານມາ ໄດ້ອະທິບາຍວ່າ ນີ້ຖືເປັນຄວາມກ້າວໜ້າທາງການແພດຄັ້ງສໍາຄັນ ເພາະເປັນຫົວໃຈຈາກຈັກພິມ 3 ມິຕິ ທີ່ຜະລິດຈາກເຊລຂອງມະນຸດ ແລະ ມີໂຄງສ້າງຫ້ອງຫົວໃຈ ແລະ ຫຼອດເລືອດທີ່ໃກ້ຄຽງກັບຫົວໃຈຂອງແທ້ທັງໝົດ.

ອາຈານໄດ້ເບິ່ງເຫັນວ່າຈຸດເດັ່ນຂອງຫົວໃຈຈາກຈັກພິມ 3 ມິຕິ ດວງນີ້ຄືນໍ້າໝຶກຊີວະພາບທີ່ມາຈາກເນື້ອເຍື່ອຂອງຄົນປ່ວຍໂດຍກົງເຊິ່ງຊ່ວຍຫຼຸດບັນຫາການເຂົ້າກັນບໍ່ໄດ້ຂອງອະໄວຍະວະທີ່ປູກຖ່າຍໃນຕົວຜູ້ປ່ວຍ ແລະ ຫຼຸດເວລາທີ່ຜູ້ປ່ວຍຕ້ອງລໍຖ້າໃນການປູກຖ່າຍຫົວໃຈໃນອະນາຄົດ.

ຂັ້ນຕອນການຜະລິດຫົວໃຈຈາກຈັກພິມ 3 ມິຕິ ແບບນີ້ຈະເລີ່ມຈາກການນໍາຊິ້ນສ່ວນເຊລເນື້ອເຍື່ອໄຂມັນ ຫຼື   fatty tissue ຂອງຜູ້ປ່ວຍມາແຍກສ່ວນທີ່ເປັນເຊລ ແລະ ທີ່ບໍ່ແມ່ນເຊລ ເຊັ່ນຄອລລາເຈນ ເພື່ອໃຊ້ເປັນນໍ້າໝຶກຊີວະພາບສໍາລັບຂຶ້ນຮູບເປັນຫົວໃຈ ໃນຈັກພິມ 3 ມິຕິ ແລະ ປັບແຕ່ງເຊລໃຫ້ເປັນສະເຕັມເຊລ ເພື່ອພັດທະນາເປັນເຊລຫົວໃຈດວງໃໝ່.

ສໍາລັບຫົວໃຈກະຕ່າຍຂະໜາດ 2,5 ເຊັນຕີແມັດ ນັ້ນ ໃຊ້ເວລາພຽງບໍ່ເທົ່າໃດຊົ່ວໂມງ ໃນການພິມຂຶ້ນມາ ແຕ່ສໍາລັບຫົວໃຈຄົນຈະຕ້ອງໃຊ້ເວລາຢ່າງໜ້ອຍ 1 ວັນ ແລະ ຕ້ອງໃຊ້ເຊລຫຼາຍພັນລ້ານເຊລ ສໍາລັບຫົວໃຈພຽງ 1 ດວງ.

ຢ່າງໃດກໍ່ຕາມຫົວໜ້າທີມນັກວິທະຍາສາດຈາກມະຫາວິທະຍາໄລ Tel Aviv University ໄດ້ອະທິບາຍເພິ່ມຕື່ມວ່າ ຕ້ອງໃຊ້ເວລາຢ່າງໜ້ອຍ 1 ເດືອນ ໃຫ້ຫົວໃຈໄດ້ເຕີບໂຕຫຼາຍພໍ ທີ່ຈະເລິ່ມເຕັ້ນຄືຫົວໃຈປົກກະຕິໂດຍໃນຂັ້ນຕອນນີ້ ທີມວິໄຈກຽມທົດລອງປູກຖ່າຍຫົວໃຈຈາກຈັກພິມ 3 ມິຕິນີ້ ໃສ່ສັດກ່ອນ ແລະ ຄາດວ່າຈະທົດລອງໃຫ້ກັບຄົນໄດ້ໃນເວລາຕໍ່ໄປ.