ສະຖິຕິ ຜູ້ປ່ວຍໄຂ້ໝາກແດງທົ່ວໂລກ ເພິ່ມຂຶ້ນ 300% ໃນໄຕມາດທໍາອິດຂອງປີນີ້

461

ລາຍງານຂອງອົງການອະນາໄມໂລກ ລະບຸວ່າຈໍານວນຜູ້ປ່ວຍຈາກໄຂ້ໝາກແດງ ໃນໄລຍະ 3 ເດືອນທໍາອິດຂອງປີນີ້ ເພິ່ມຂຶ້ນຫຼາຍເຖິງ 300% ເມື່ອທຽບກັບໄລຍະເວລາດຽວກັນຂອງປີ ທີ່ຜ່ານມາ ຈຶ່ງຢໍ້າເຕືອນໃຫ້ປະຊາຊົນໂດຍສະເພາະເດັກໃຫ້ເຂົ້າຮັບການສັກຢາຕ້ານເຊື້ອ.

ສໍານັກຂ່າວຕ່າງປະເທດລາຍງານຈາກເມືອງເຈນີວາ ປະເທດສະວິດເຊີແລນ ເມື່ອວັນອັງຄານ ທີ 16 ເມສາ ວ່າ ອົງການອະນາໄມໂລກ (WHO: World Health Organization) ໄດ້ລາຍງານເມື່ອວັນຈັນ ວ່າ ຜົນການປະເມີນເບື້ອງຕົ້ນກ່ຽວກັບການພົບຜູ້ປ່ວຍຈາກໄຂ້ໝາກແດງ (Measles) ໃນໄລຍະ 3 ເດືອນທໍາອິດຂອງປີນີ້ ເພິ່ມຂຶ້ນຫຼາຍເຖິງ 300% ເມື່ອທຽບກັບໄລຍະເວລາດຽວກັນຂອງປີ ທີ່ຜ່ານມາ ໂດຍອັດຕາການພົບຜູ້ປ່ວຍແມ່ນທຸກໆ 1 ໃນ 10 ຄົນ ແລະ ສ່ວນຫຼາຍເປັນເດັກນ້ອຍ ເຊິ່ງລັດຖະບານມາດາກັສກາ ໄດ້ລາຍງານວ່າ ເດັກຢ່າງໜ້ອຍ 800 ຄົນ ເສຍຊີວິດຈາກໄຂ້ໝາກແດງ ນັບຕັ້ງແຕ່ເດືອນກັນຍາ ປີຜ່ານມາ ແລະ ສະຖານະການ ການແຜ່ລະບາດຂອງໄຂ້ໝາກແດງ ໃນປະເທດເຢເມນ ທີ່ຍັງວິກິດຕະຫຼອດຈົນອີກຫຼາຍປະເທດໃນອາຟຣິກາ ແລະ ຕາເວັນອອກກາງ.

ຂະນະດຽວກັນ, ລາຍງານຂອງ WHO ລະບຸວ່າ ຕະຫຼອດໄລຍະ 3 ເດືອນທໍາອິດຂອງປີນີ້ ໄດ້ຮັບລາຍງານວ່າຜູ້ປ່ວຍຈາກໄຂ້ໝາກແດງທີ່ເປັນທາງການ ຢ່າງໜ້ອຍ 112.163 ຄົນ ໃນ 170 ປະເທດ ທຽບກັບສະຖິຕິຂອງໄລຍະເວລາດຽວກັນ ເມື່ອປີຜ່ານມາ ເຊິ່ງໄດ້ຮັບລາຍງານວ່າມີຜູ້ປ່ວຍພຽງ 28.124 ຄົນ ໃນ 163 ປະເທດ ນອກຈາກນີ້, ຜູ້ໄດ້ຮັບການສັກຢາຕ້ານເຊື້ອຮອບທໍາອິດຂອງປະຊາຊົນແມ່ນ 85% ແຕ່ສັດສ່ວນທີ່ໄດ້ຮັບການສັກຢາຕ້ານເຊື້ອ ຮອບທີ 2 ແມ່ນຫຼຸດລົງເຫຼືອ 67%.

ທັງນີ້ ລາຍງານຂອງ WHO ໄດ້ຮັບການເຜີຍແຜ່ອອກມາໃນເວລາດຽວກັບທີ່ສູນປ້ອງກັນແລະ ຄວບຄຸມໂຣກຂອງສະຫະລັດ (CDC: Centers for Disease Control and Prevention) ໄດ້ລາຍງານການພົບຜູ້ປ່ວຍຈາກໄຂ້ໝາກແດງ ໃນປະເທດແລ້ວ 555 ຄົນ ນັບຕັ້ງແຕ່ຕົ້ນປີນີ້ ເຊິ່ງເກືອບເທົ່າສະຖິຕິຕະຫຼອດປີ 2014ທີ່ພົບຜູ້ປ່ວຍ 667 ຄົນ ໂດຍພື້ນທີ່ທີ່ມີການແຜ່ລະບາດ ແລະ ມີແນວໂນ້ມຕິດເຊື້ອສູງທີ່ສຸດຄືນະຄອນນິວຢອກໂດຍສະເພາະໃນເຂດບຣູຄລີນ ທີ່ມີຈໍານວນຜູ້ປ່ວຍຄິດເປັນສັດສ່ວນ 2 ໃນ 3 ຂອງຜູ້ຕິດເຊື້ອທົ່ວປະເທດມີລາຍງານເຂົ້າມາແລ້ວ ຢ່າງໜ້ອຍ 20 ລັດ ເຊິ່ງທາງ ຊີດີຊີ ໄດ້ອອກປະກາດແນະນໍາໃຫ້ທຸກຄົນເຂົ້າຮັບການສັກຢາຕ້ານເຊື້ອທີ່ຫ້ອງປ້ອງກັນໂຣກໄຂ້ໝາກແດງບໍ່ຕໍ່າກວ່າ2ຮອບ ທີ່ຈະຊ່ວຍເພິ່ມປະສິດທິພາບການປ້ອງກັນໄດ້ຫຼາຍເຖິງ 97%.