ເຫດໄຟໄໝ້ ໂບດນັອດ – ດາມ ອາຍຸກວ່າ 850 ປີ ກາງນະຄອນຫຼວງປາຣີສ ປະເທດຝຣັ່ງ

417

ເກີດເຫດໄຟໄໝ້ທົ່ວທັງຫຼັງຄາ ແລະ ຍອດ ” ວິຫານໂບດນັອດ – ດາມ” ສະຖາປັດຕະຍາກໍາລະດັບໂລກ ອາຍຸກວ່າ 850 ປີ ໃຈກາງນະຄອນຫຼວງປາຣີສ ປະເທດຝຣັ່ງ ເມື່ອແລງວັນຈັນ ທີ່ຜ່ານມາ.

ສໍານັກຂ່າວເອເອັຟພີໄດ້ລາຍງານຈາກນະຄອນຫຼວງປາຣີສ ປະເທດຝຣັ່ງ ເມື່ອວັນຈັນ ທີ 15 ເມສາ ໂດຍໂຄສົກຂອງວິຫານໂບດນັອດ – ດາມ ເປັນແລນມາກທີ່ສໍາຄັນ ທີ່ຕັ້ງຢູ່ໃຈກາງນະຄອນຫຼວງປາຣີສ ເຊິ່ງໃນແຕ່ລະປີຈະມີນັກທ່ອງທ່ຽວນັບລ້ານຄົນເດີນທາງມາທ່ຽວຊົມວິຫານແຫ່ງນີ້ ໂດຍເປີດເຜີຍວ່າ ເມື່ອໄລຍະຕອນແລງຂອງວັນຈັນ ທີ່ຜ່ານມາ ໄດ້ເກີດໄຟໄໝ້ຢ່າງຮຸນແຮງໄປທົ່ວບໍລິເວນຫຼັງຄາ ແລະ ຍອດ ວິຫານນັອດ – ດາມ ຕົວໂຄງສ້າງຂອງໄມ້ທີ່ຄໍ້າຢັນຫຼັງຄາໄດ້ຮັບຄວາມເສຍຫາຍ ເຈົ້າໜ້າທີ່ດັບເພີງໄດ້ເຂົ້າປະຕິບັດການເພື່ອຄວບຄຸມໄຟ ເຊິ່ງອາດກ່ຽວຂ້ອງກັບການບູລະນະທີ່ກຳລັງປັບປຸງວິຫານຢູ່.

ທັງນີ້ ປະທານາທິບໍດີເອັມມານູເອລ ມາຄຣົງ ຂອງຝຣັ່ງ ໄດ້ສັ່ງຍົກເລີກກໍານົດການຖະແຫຼງນະໂຍບາຍຜ່ານທາງສະຖານີໂທລະທັດຕາມກໍານົດ ໃນໄລຍະຕອນແລງຂອງວັນດຽວກັນນີ້ ໂດຍມີສາເຫດມາຈາກເຫດໄຟໄໝ້ວິຫານໂບດນັອດ – ດາມ ຂະນະທີ່ ທ່ານນາງແອນ ຮິລດັລໂກ ນາຍົກເທສະມົນຕີປາຣີສ ໄດ້ກ່າວຜ່ານທາງທະວິດເຕີ ວ່າ ເປັນເຫດການໄຟໄໝ້ຮຸນແຮງ ເຈົ້າໜ້າທີ່ດັບເພີງຂອງປາຣີສພະຍາຍາມທີ່ຈະເຂົ້າຄວບຄຸມໄຟທີ່ໄໝ້ ແລະ ຍັງໄດ້ຂໍຮ້ອງປະຊາຊົນວ່າ ຢ່າເຂົ້າໃກ້ສະຖານທີ່ເພື່ອໃຫ້ເຈົ້າໜ້າທີ່ດັບເພີງໄດ້ເຮັດວຽກຢ່າງເຕັມທີ່.

ໂຄສົກຂອງວິຫານໂບດນັອດ – ດາມໄດ້ຖະແຫຼງຕໍ່ອີກວ່າ ເຫດໄຟໄໝ້ທີ່ເກີດຂຶ້ນ ເປັນໄລຍະທີ່ Catholic Church ຂອງຝຣັ່ງ ກຽມຈັດງານອີສເຕີ ເຊິ່ງລົດດັບເພີງຂອງໜ່ວຍດັບເພີງປາຣີສໄດ້ເລັ່ງດ່ວນມາຮອດທີ່ເກີດເຫດຂອງວິຫານນັອດ – ດາມ ເຊິ່ງຕັ້ງຢູ່ເທິງເກາະໃນແມ່ນໍ້າເຊນຂອງນະຄອນຫຼວງປາຣີສ.

ສ່ວນປະທານາທິບໍດີໂດນັລ ທຣຳ ຂອງສະຫະລັດກ່າວຜ່ານທະວິດວ່າ ເປັນເລື່ອງເສົ້າສະຫຼົດທີ່ໄດ້ເຫັນພາບເຫດໄຟໄໝ້ຢ່າງຮຸນແຮງຄັ້ງໃຫຍ່ ທີ່ເຜົາໄໝ້ວິຫານນັອດ – ດາມ ຖ້າໃຊ້ຍົນບັນທຸກນໍ້າລົງໄປຊ່ວຍດັບໄຟອາດຈະໄດ້ຜົນ ຂໍໃຫ້ດໍາເນີນການໂດຍໄວ.