ຈີນຫຼຸດພາສີນໍາເຂົ້າສິນຄ້າອຸປະໂພກບໍລິໂພກ

356

ລັດຖະບານຈີນປະກາດ ເມື່ອວັນຈັນຜ່ານມາ ຈະຫຼຸດອັດຕາພາສີນໍາເຂົ້າສິນຄ້າອຸປະໂພກບໍລິໂພກຫຼາຍລາຍການ ຕັ້ງແຕ່ຄອມພິວເຕີໄປຈົນເຖິງເຟີນິເຈີ ແລະ ລົດຈັກ ຂະນະທີ່ປັກກິ່ງກໍາລັງຖືກທົ່ວໂລກຕິດຕາມເບິ່ງພຶດຕິກໍາທາງການຄ້າ.

ສໍານັກຂ່າວເອເອັຟພີລາຍງານຈາກນະຄອນຫຼວງປັກກິ່ງ ສາທາລະນະລັດ ປະຊາຊົນຈີນ ເມື່ອວັນຈັນ ທີ 8 ເມສາ ວ່າ ຈີນ ແລະ ອາເມຣິກາ ຂຶ້ນພາສີຕອບໂຕ້ກັນມູນຄ່າຫຼາຍກວ່າ 360.000 ລ້ານໂດລາ ໃນການຄ້າ 2 ທາງ ຂະນະທີ່ເອີຣົບກ່າວເມື່ອບໍ່ດົນມານີ້ ວ່າ ຈະປະນາມຈີນທີ່ດໍາເນີນນະໂຍບາຍການຄ້າບໍ່ເປັນທໍາ.

ການປະກາດຂອງຄະນະກໍາມະການພາສີ ໃນສັງກັດຄະນະມົນຕີແຫ່ງລັດເມື່ອວັນຈັນ ລະບຸວ່າ ອັດຕາພາສີຂອງຈີນສໍາລັບສິນຄ້ານໍາເຂົ້າເຊັ່ນປື້ມ, ຄອມພິວເຕີ, ອາຫານ,ເຟີນິເຈີ ແລະ ຢາປິ່ນປົວ ຈະຫຼຸດລົງຈາກ 15% ເຫຼືອ 13%ເລີ່ມມີຜົນຕັ້ງແຕ່ວັນອັງຄານ 9 ເມສາ ສ່ວນພາສີສິນຄ້ານໍາເຂົ້າອື່ນໆ ເຊັ່ນຜະລິດຕະພັນກີລາ,ອຸປະກອນຕຶກເບັດ, ສິ່ງຖັກທໍ, ເຄື່ອງນຸ່ງຫົ່ມ, ເຄື່ອງໃຊ້ໄຟຟ້າ ແລະ ລົດຈັກຈະຫຼຸດລົງຈາກ25% ເຫຼືອ 20%.

ກຸ່ມຜູ້ນໍາສະຫະພາບເອີົບ (EU) ກໍານົດພົບຫາລືກັບນາຍົກລັດຖະມົນຕີຫຼີ່ ເຄີ່ສຽງ ຂອງຈີນ ໃນອາທິດນີ້ ລະຫວ່າງການປະຊຸມສຸດຍອດທີ່ນະຄອນຫຼວງບຣັສເຊລ ປະເທດແບນຊິກ ແຕ່ຄວາມຫວັງຂອງຜູ້ນໍາອີຢູທີ່ຈະໄດ້ຮັບຄໍາໝັ້ນ ແລະ ຈິງຈັງທາງດ້ານການຄ້າອາດຈະລົ້ມເຫຼວ.

ປະທານາທິບໍດີໂດນັລ ທຣຳ ຜູ້ນໍາສະຫະລັດໄດ້ກ່າວເມື່ອວັນສຸກ ໃນທີ່ການເຈລະຈາການຄ້າກັບຈີນ ວ່າ “ມີຄວາມຄືບໜ້າ”ໄປສູ່ການຍຸຕິສົງຄາມການຄ້າ ລະຫວ່າງ 2 ປະເທດ ເສດຖະກິດຂະຫນາດໃຫຍ່ທີ່ສຸດໃນໂລກ ແຕ່ ທຣຳ ໄດ້ປະຕິເສດທີ່ຈະຄາດເດົາເຖິງຄວາມສໍາເລັດ.

ທ່ານໂຣເບີດ ໄລທີເຊີຜູ້ແທນການຄ້າແລະ ທ່ານສະຕີເວນ ມະນູຊິນ ລັດຖະມົນຕີກະຊວງການເງິນສະຫະລັດ ໄດ້ເຂົ້າຮ່ວມການເຈລະຈາການຄ້າກັບຄະນະຜູ້ແທນລັດຖະບານຈີນນໍາໂດຍຮອງນາຍົກລັດຖະມົນຕີຫຼິວ ເຫີ ໃນນະຄອນຫຼວງວໍຊິງຕັນ ລະຫວ່າງວັນທີ 3-5 ເມສາ ທີ່ຜ່ານມາ.