ຈີນ ປັບຫຼຸດ ຈີດີພີ ຂະຫຍາຍຕົວຕໍ່າສຸດໃນຮອບ 30 ປີ

397

ລັດຖະບານ ແຫ່ງ ສປ ຈີນ ປະກາດປັບຫຼຸດປະລິມານ ຈີດີພີ ໃນປີ 2019 ຂະຫຍາຍຕົວທີ່ 6 – 6,5% ພ້ອມທັງຫຼຸດອັດຕາພາສີມູນຄ່າເພີ່ມ ຫວັງປະຄອງເສດຖະກິດທີ່ຂະຫຍາຍຕົວຊ້າລົງ.

ທ່ານ ຫຼີ ເຄີສຽງ ນາຍົກລັດຖະມົນຕີຈີນ ລາຍງານຕໍ່ສະພາແຫ່ງຊາດຈີນ ເມື່ອບໍ່ດົນມານີ້ ວ່າ: ປີນີ້ໄດ້ຄາດຄະເນອັດຕາການຂະຫຍາຍຕົວທາງເສດຖະກິດຂອງ ຈີນ ຫຼື ຈີດີພີ ຖືກຕັ້ງເປົ້າໄວ້ລະຫວ່າງ 6 – 6,5%. ນອກຈາກນີ້, ຍັງປະກາດຫຼຸດອັດຕາການເກັບພາສີ ເພື່ອເປັນການຢຸດການຂະຫຍາຍຕົວທີ່ຊ້າຂອງເສດຖະກິດ, ຂະນະທີ່ຍັງສາມາດຕໍ່ສູ້ກັບບັນຫາໜີ້ ແລະ ເອົາຕົວລອດໃນບັນຫາເສດຖະກິດກັບ ອາເມຣິກາ ນໍາອີກ.

ຂອບເຂດຂັ້ນຕໍ່າຂອງ ຈີດີພີ ໃນຄັ້ງນີ້ຖືເປັນການຂະຫຍາຍຕົວທີ່ຊ້າທີ່ສຸດໃນຮອບ 30 ປີຂອງ ຈີນ ເນື່ອງຈາກຜູ້ວາງນະໂຍບາຍຕັດສິນໃຈໃຫ້ການແກ້ໄຂບັນຫາໜີ້ ແລະ ລຶບລ້າງຄວາມທຸກຍາກມາເປັນຄວາມສໍາຄັນທີ່ສຸດອັນດັບທໍາອິດ.

ດ້ານອັດຕາພາສີນັ້ນ, ນາຍົກຈີນ ຖະແຫຼງການຫຼຸດອັດຕາພາສີເພີ່ມກວ່າ 2 ພັນຕື້ຢວນ ສໍາລັບປີ 2019.

ທ່ານ ອະລິເຊຍ ກຣາເຊຍ ເອີເຣໂຣ ຫົວໜ້ານັກເສດຖະສາດປະຈໍາອາຊີຈາກ Natixis SA ໃນ ຮົງກົງ ເຊິ່ງເປັນໜຶ່ງໃນບໍລິສັດຜູ້ຈັດການຊັບສິນສັນຊາດຝຣັ່ງ ທີ່ໃຫຍ່ທີ່ສຸດໃນໂລກ ກ່າວວ່າ: ນະໂຍບາຍເຫຼົ່ານີ້ມີຈຸດປະສົງເພື່ອແກ້ໄຂບັນຫາການຂະຫຍາຍຕົວຊ້າຂອງເສດຖະກິດຈີນ ໃນທາງໂຄງສ້າງ, ແຕ່ບໍ່ສາມາດແກ້ໄຂບັນຫາສະເພາະໜ້າທີ່ໝູນວຽນເກີດຂຶ້ນໄດ້. ສະນັ້ນ, ຜູ້ອອກນະໂຍບາຍຈຶ່ງຈໍາເປັນຕ້ອງມີນະໂຍບາຍຜ່ອນຄາຍກວ່ານີ້ເພື່ອຊຸກຍູ້ເສດຖະກິດ.

ສໍານັກຂ່າວ ບລູມເບິກ ລາຍງານວ່າ: ລັດຖະບານຈີນ ຕັ້ງເປົ້າຫຼຸດອັດຕາພາສີ ລົງ 3% ຈາກແຕ່ກ່ອນ ໂດຍຫວັງຊ່ວຍເຫຼືອຫົວໜ່ວຍທຸລະກິດໂດຍກົງ.

ຂະນະທີ່, ມໍແກນ ສະແຕນລີ ບໍລິສັດ ໃຫ້ບໍລິການທາງການເງິນລະດັບໂລກ ໃຫ້ຮູ້ວ່າ: ລັດຖະບານຈີນ ຍັງວາງແຜນຫຼຸດພາສີ 1% ຈາກແຕ່ກ່ອນທີ່ 10% ເຊິ່ງຄິດເປັນມູນຄ່າ ປະມານ 800 ຕື້ຢວນ ເຊິ່ງຈະຊ່ວຍຊຸກຍູ້ລາຍໄດ້ຂອງບໍລິສັດຕ່າງໆໄດ້.

ລັດຖະບານຈີນ ຕັ້ງເປົ້າຫຼຸດປະລິມານຂາດດຸນການຄ້າຂອງປີ 2019 ໄວ້ທີ່ 2,8% ຂອງ ຈີດີພີ ໃນຂະນະທີ່ ປີ 2018 ຕົວເລກຢູ່ທີ່ 2,6% ໂດຍລາຍງານຊີ້ວ່າການຫຼຸດພາສີໃນຄັ້ງນີ້ມາພ້ອມຄ່າທໍານຽມ 2 ພັນຕື້ຢວນ.

ການຂະຫຍາຍຕົວຢ່າງຄ່ອຍເປັນຄ່ອຍໄປ ຄຽງຄູ່ກັບການຊຸກຍູ້ເສດຖະກິດໃນອະນາຄົດຍິ່ງຫຼາຍຂຶ້ນເທົ່າໃດກໍສະແດງໃຫ້ເຫັນເຖິງຄວາມພະຍາຍາມຂອງລັດຖະບານຈີນ ທີ່ຕ້ອງການເຮັດໃຫ້ເສດຖະກິດໝັ້ນທ່ຽງ ຫຼັງຈາກເສດຖະກິດງຽບເຫງົາ ໃນປີ 2018 ແລະ ເລີ່ມດີຂຶ້ນເມື່ອຄວາມສໍາຄັນຖືກໃຫ້ໄປກັບການຄວບຄຸມຄວາມສ່ຽງທາງການເງິນ ແລະ ການຈໍາກັດການໃຊ້ງົບປະມານ, ການຮັກສາການຈ້າງວຽກ ຈຶ່ງກາຍເປັນເລື່ອງທີ່ມີຄວາມສໍາຄັນຫຼາຍຂຶ້ນກວ່າປີກ່ອນໜ້ານັ້ນ.

ຢ່າງໃດກໍຕາມ, ທ່ານ ເດວິດ ຊູ ແລະ ຊາງ ຊູ ນັກເສດຖະສາດທີ່ສໍານັກຂ່າວ ບລູມເບິກ ກ່າວວ່າ: ໃນການປະກາດຂອງຜູ້ນໍາຈີນ ເມື່ອບໍ່ດົນມານີ້ມີການພັດທະນາ 2 ຢ່າງທີ່ດີຂຶ້ນ ຄື: ການຫຼຸດອັດຕາພາສີທີ່ຂ້ອນຂ້າງຫຼາຍ ແລະ ສັນຍານການຊ່ວຍເຫຼືອດ້ານນະໂຍບາຍການເງິນ ສໍາລັບເສດຖະກິດຫຼາຍກວ່າການໄຫຼເຂົ້າຂອງກະແສເງິນສົດ.