ອາເມຣິກາ ກຽມຍົກເລີກເກັບພາສີສິນຄ້າ ຈີນ ເກືອບທັງໝົດ

278

ອາເມຣິກາ ອາດຈະຍົກເລີກນະໂຍບາຍເກັບພາສີຕໍ່ສິນຄ້ານໍາເຂົ້າຈາກ ຈີນ ເກືອບທັງໝົດທີ່ໄດ້ບັງຄັບໃຊ້ຕັ້ງແຕ່ປີກ່ອນ ໂດຍຄາດວ່າຜູ້ນໍາທັງສອງອາດຈະບັນລຸຂໍ້ຕົກລົງການຄ້າຢ່າງສົມບູນ ໃນກອງປະຊຸມວັນທີ 27 ເດືອນມີນານີ້.

ຖະແຫຼງການດັ່ງກ່າວມີອອກມາຫຼັງຈາກທີ່ ທ່ານ ໂຣເບີດ ໄລທີເຊີ ຜູ້ແທນການຄ້າຂອງອາເມຣິກາ ກ່າວຕໍ່ລັດຖະສະພາອາເມຣິກາ ໂດຍກ່າວວ່າ: ຫ້ອງການຜູ້ແທນການຄ້າກໍາລັງດຳເນີນເອກະສານທາງດ້ານນິຕິກຳ ເພື່ອປະຕິບັດການຍົກເລີກດັ່ງກ່າວ.

ຄວາມເຄັ່ງຕຶງທາງການຄ້າລະຫວ່າງ ອາເມຣິກາ ກັບ ຈີນ ເລີ່ມຂຶ້ນມາຕັ້ງແຕ່ກາງປີ 2018 ເມື່ອພື້ນຖານເສດຖະກິດທັງສອງທີ່ຕ່າງກໍຢູ່ໃນອັນດັບແຖວໜ້າຂອງໂລກນັ້ນໄດ້ຕອບໂຕ້ກັນຢ່າງຕໍ່ເນື່ອງດ້ວຍລະດັບພາສີໃໝ່ ມາຮອດເວລານີ້ຍອດປະລິມານສິນຄ້າທີ່ຖືກເກັບພາສີສູງຂຶ້ນຂອງສອງຝ່າຍມີມູນຄ່າກວ່າ 360 ຕື້ໂດລາ.

ການນຳຂອງສອງປະເທດໄດ້ເຫັນດີເປັນເອກະສັນກັນ “ ຢຸດສົງຄາມການຄ້າ ” ເພື່ອໃຫ້ສອງຝ່າຍເຈລະຈາຫາຂໍ້ຕົກລົງ ເພື່ອຜ່ອນຄາຍຄວາມເຄັ່ງຕຶງທີ່ເພີ່ມຂຶ້ນເປັນເວລາຫຼາຍເດືອນທີ່ຜ່ານມາ.

ຢ່າງໃດກໍຕາມ, ຫາກເຈົ້າໜ້າທີ່ຂອງສອງປະເທດບໍ່ບັນລຸວິທີການແກ້ໄຂໃຫ້ແກ່ສົງຄາມການຄ້ານັ້ນແລ້ວ ອາເມຣິກາ ກໍຈະຂຶ້ນພາສີຈາກລະດັບ 10% ໃນປັດຈຸບັນເປັນ 25% ກັບສິນຄ້າຈີນ ເປັນມູນຄ່າລວມ 200 ຕື້ໂດລາ.