ລາງວັນກວ່າ 6 ພັນຕື້ກີບ! ຫວຍເພົາເວີບອລແຈັກພັອດແຕກ ຢູ່ອາເມຣິກາ

309

ຫວຍເພົາເວີບອລ ເງິນລາງວັນແຈັກພັອດ ຫຼື ລາງວັນສະສົມທີ່ມູນຄ່າ 768,4 ລ້ານໂດລາສະຫະລັດ ຫຼື ປະມານ 6.600 ຕື້ກີບ ແຕກແລ້ວ ເປັນເງິນລາງວັນສູງສຸດເປັນອັນດັບສາມ ໃນປະຫວັດສາດຂອງອາເມຣິກາ ເຊິ່ງຂາຍຢູ່ໃນເຂດຊານເມືອງມິລວໍກີ ລັດວິສຄອນຊິນ.

ສໍານັກຂ່າວເອພີລາຍງານຈາກເມືອງນິວເບີລິນ ລັດວິສຄອນຊິນ ປະເທດສະຫະລັດ ອາເມຣິກາ ເມື່ອວັນພະຫັດ ທີ 28 ມີນາ ວ່າ ເຈົ້າໜ້າທີ່ໜ່ວຍສະຫຼາກລັດວິສຄອນຊິນ ໄດ້ເປີດເຜີຍວ່າ ພົບລັອດເຕີລີ່ ຫຼື ຫວຍ “ເພົາເວີບອລ” ຖືກລາງວັນແຈັກພັອດ ຫຼື ເງິນລາງວັນສະສົມ ສາມາດຂຶ້ນເງິນລາງວັນເງິນມະຫາສານເຖິງ 768,4 ລ້ານໂດລາສະຫະລັດ ຫຼື ປະມານ 6.600 ຕື້ກີບ ຈາກການອອກເລກລາງວັນທີ 1 ຂອງຫວຍ “ເພົາເວີບອລ” ເມື່ອຄືນວັນພຸດ ທີ່ຜ່ານມາ ໂດຍຈໍາໜ່າຍໃນເມືອງນິວເບີລີນ ລັດວິສຄອນຊິນ ເມືອງນ້ອຍ ທີ່ມີປະຊາກອນອາໄສຢູ່ປະມານ 40.000 ຄົນ ຕັ້ງຢູ່ຫ່າງ 22,5 ກິໂລແມັດ ທາງພາກຕາເວັນຕົກສຽງໃຕ້ ຂອງເມືອງມິລວໍກີ ແຕ່ເຈົ້າໜ້າທີ່ໜ່ວຍສະຫຼາກບໍ່ໄດ້ເປີດເຜີຍວ່າ ຕົວແທນຈໍາໜ່າຍ ຫຼື ຮ້ານຂາຍປີກເປັນຮ້ານໃດ ເຊິ່ງຕາມກົດລະບຽບແລ້ວຈະຕ້ອງໄດ້ຮັບລາງວັນເປັນເງິນສົດຕອບແທນ 100.000 ໂດລາ ຫຼື ປະມານ 850 ລ້ານກີບ ໃນຖານະຜູ້ຈໍາໜ່າຍຫວຍສະບັບທີ່ຖືກລາງວັນ.

ກ່ອນໜ້ານີ້ລັດວິສຄອນຊິນ ກໍ່ເຄີຍມີຜູ້ຖືກລາງວັນແຈັກພັອດ ຂອງຫວຍເພົາເວີບອລ ເມື່ອວັນທີ 22 ມີນາ 2017 ໂດຍຜູ້ຖືກລາງວັນອາໄສຢູ່ໃນເມືອງມິນວໍກີ ແລະ ໄດ້ຮັບເງິນລາງວັນ156,2 ລ້ານໂດລາ ຫຼື ປະມານ 1340ຕື້ກີບ.

ສໍາລັບເລກທີ່ຖືກຫວຍລາງວັນດັ່ງກ່າວໃນງວດວັນພຸດ ທີ 27 ມີນາ ທີ່ຜ່ານມາ ໄດ້ແກ່ 16, 20, 37, 44 ແລະ 62 ສ່ວນເລກເພົາເວີບອລ ຄື 12 ເຊິ່ງໂອກາດ ຫຼື ຄວາມສ່ຽງທີ່ຈະຖືກເລກຊຸດລາງວັນດັ່ງກ່າວ ແມ່ນ 1 ໃນ 292.201.338.

ເງິນລາງວັນແຈັກພັອດມູນຄ່າ 768,4 ລ້ານໂດລາ ຖືວ່າສູງທີ່ສຸດເປັນອັນດັບ 3 ໃນປະຫວັດສາດຂອງ ອາເມຣິກາຮອງຈາກລາງວັນແຈັກພັອດ ເຊິ່ງເປັນສະຖິຕິໂລກຂອງຫວຍເພົາເວີບອລ ເມື່ອເດືອນມັງກອນ 2016 ເງິນລາງວັນມູນຄ່າມະຫາສານ 1.586 ລ້ານໂດລາ ໂດຍມີຜູ້ຖືກລາງວັນ 3 ຄົນ ແບ່ງກັນຢູ່ທີ່ລັດແຄລິຟໍເນຍ, ຟໍລິດາ ແລະ ເທນເນສຊີ, ສ່ວນລາງວັນສູງອັນດັບສອງຄືເງິນລາງວັນຂອງຫວຍເມກະມິລລ້ຽນ ມູນຄ່າ 1.537 ລ້ານໂດລາ ເມື່ອເດືອນຕຸາລ ປີຜ່ານມາ ຜູ້ຖືກລາງວັນຢູ່ໃນລັດເຊົາແຄໂຣໄລນາ.

ສໍາລັບເງິນລາງວັນແຈັກພັອດງວດຫຼ້າສຸດ768,4 ລ້ານໂດລາ ນີ້ ຜູ້ຖືກລາງວັນແມ່ນສາມາດເລືອກຮັບເປັນລາຍປີໄດ້ຍາວນານເຖິງ29 ປີ ຈຶ່ງຈະໄດ້ເງິນລາງວັນຈົນຄົບກ່ອນຫັກພາສີຫຼື ສາມາດເລືອກທີ່ຈະຮັບເງິນລາງວັນກ້ອນໃຫຍ່ງວດດຽວແມ່ນຕົກຢູ່ 477 ລ້ານໂດລາ ຫຼື ປະມານ 4.099 ຕື້ກີບ ກ່ອນຫັກພາສີ.

ຫວຍເພົາເວີບອລມີຈໍາໜ່າຍໃນ 44 ລັດ ຂອງອາເມຣິກາລວມເຖິງວໍຊິງຕັນ, ດີຊີ ໝູ່ເກາະເວີຈິນຂອງ ອາເມຣິກາ ແລະ ເປີໂຕຣິໂກ.