ພົບເງິນໂດລາປອມເຊື່ອງຢູ່ໃນຕູ້ນິລະໄພ

308

ຕໍາຫຼວດເຄນຢາຢຶດເງິນປອມ ສະກຸນໂດລາ ສະຫະລັດ ລວມກວ່າ 20 ລ້ານໂດລາເຊື່ອງຢູ່ຕູ້ນິລະໄພ ສ່ວນຕົວຂອງສາຂາທະນາຄານເຄຼແບງປະເທດເຄນຢາ ຈັບຜູ້ຕ້ອງສົງໄສ 6 ຄົນ ລວມເຖິງພະນັກງານທະນາຄານ.

ສໍານັກຂ່າວຣອຍເຕີລາຍງານຈາກປະເທດເຄນຢາ ເມື່ອວັນພຸດ ທີ 20 ມີນາ ວ່າ ການຖະແຫຼງການຂອງສໍານັກງານສືບສວນຄະດີອາຊາຍາກໍາເຄນຢາ ລະບຸວ່າ ຕໍາຫຼວດໄດ້ຈັບກຸມຜູ້ຕ້ອງສົງໄສໄດ້ 6 ຄົນ ແຍກເປັນພະນັກງານທະນາຄານ 2 ຄົນ ໃນຖານະຜູ້ຕ້ອງສົງໄສຄະດີປອມແປງທະນະບັດໂດລາ ສະຫະລັດ ລວມມູນຄ່າກວ່າ 20 ລ້ານໂດລາ ທີ່ເຊື່ອງຢູ່ໃນຕູ້ນິລະໄພສ່ວນຕົວຂອງທະນາຄານເຄຼແບງ ສາຂາຄວີນເວ ປະເທດເຄນຢາ ພົບທະນະບັດໃບ 100 ໂດລາ ເປັນເງິນປອມຢູ່ໃນຕູ້ນິລະໄພດັ່ງກ່າວ.

ນັກຂ່າວລາຍງານດ້ວຍວ່າມີຄົນກຸ່ມໜຶ່ງໄດ້ມາຊຸມນຸມກັນທີ່ໜ້າສໍານັກງານສາຂາຂອງທະນາຄານເຄຼແບງເມື່ອວັນອັງຄານ ທີ່ຜ່ານມາ ຕ່າງສົ່ງສຽງຮ້ອງດ່າດ້ວຍຄວາມຄຽດແຄ້ນ ແລະ ຢາກໃຫ້ເຈົ້າໜ້າທີ່ເປີດເຜີຍຕົວຕົນຂອງຜູ້ຕ້ອງສົງໄສ.

ທະນາຄານເຄຼແບງ ເຄນຢາ ຫຼື ທະນາຄານເຄຼແບງສາຂາປະເທດເຄນຢາ ເຊິ່ງເປັນສ່ວນໜຶ່ງຂອງກຸ່ມອັບສາແປ່ງປະເທດອາຟຣິກາໃຕ້ ຖະແຫຼງຢືນຢັນວ່າມີການຢຶດທະນະບັດປອມຈາກຕູ້ນິລະໄພສ່ວນຕົວຂອງທະນາຄານ ແຕ່ທັງໝົດນັ້ນບໍ່ແມ່ນເງິນຂອງທະນາຄານ ແລະ ທາງທະນາຄານຈະໃຫ້ຄວາມຮ່ວມມືກັບເຈົ້າໜ້າທີ່ໃນການສອບສວນຄະດີນີ້.