ຈໍາຜູ້ເສຍຊີວິດຈາກພາຍຸໄຊໂຄນພັດຖະຫຼົ່ມ 3 ປະເທດອາຟຣິກາ ເພິ່ມຂຶ້ນຕໍ່ເນື່ອງ

427

ເຖິງວ່າພາຍຸໄຊໂຄນອີດາຍ ໄດ້ພາດຜ່ານ 3 ປະເທດ ທາງຕາເວັນອອກສຽງໃຕ້ຂອງທະວີບອາຟຣິກາ ແລະ ຫຼຸດຜ່ອນກຳລັງເຊົາໄປແລ້ວ ຕັ້ງແຕ່ອາທິດຜ່ານມາ ຢ່າງໃດກໍ່ຕາມ ຈໍານວນຜູ້ເສຍຊີວິດຍັງເພິ່ມຢ່າງຕໍ່ເນື່ອງ ແລະ ການສອຳນວຍຄວາມຊ່ວຍເຫຼືອຍັງຍາກລໍາບາກ.

ສໍານັກຂ່າວຕ່າງປະເທດລາຍງານຈານະຄອນຫຼວງມາປູໂຕ ປະເທດໂມຊໍາບິກ ເມື່ອວັນພະຫັດ ທີ 21 ມີນາ ວ່າ ສຳນັກງານເພື່ອການປະສານງານດ້ານມະນຸດສະທຳແຫ່ງສະຫະປະຊາຊາດ (OCHA: United Nations Office for the Coordination of Humanitarian Affairs) ໄດ້ອອກຖະແຫຼງການ ເມື່ອວັນສຸກ ກ່ຽວກັບສະຖານະການໃນປະເທດໂມຊຳບິກ, ຊິມບັບເວ ແລະ ມາລາວີ ເຊິ່ງເປັນກຸ່ມປະເທດທີ່ທຸກຍາກ ຕັ້ງຢູ່ທາງພາກຕາເວັນອອກສຽງໃຕ້ ຂອງອາຟຣິກາ ວ່າ ປະຊາຊົນຮວມກັນ 3 ປະເທດ ກວ່າ 1,5 ລ້ານຄົນ ຍັງປະສົບກັບຄວາມເດືອດຮ້ອນຢ່າງໜັກ ຈາກອິດທິພົນຂອງພາຍຸໄຊໂຄນ ອີດາຍ (Idai) ທີ່ເຖິງວ່າຈະພາດຜ່ານ ແລະ ອ່ອນກຳລັງເຊົາລົງ ຕັ້ງແຕ່ທ້າຍອາທິດ ຜ່ານມາ ແຕ່ຍັງຖິ້ມຮ່ອງຮອຍຄວາມເສຍຫາຍໄວ້ຢ່າງຫຼວງຫຼາຍ ທັງລະບົບໂຄງສ້າງພື້ນຖານທີ່ຫັກເພ ແລະ ນໍ້າທີ່ຍັງຖ້ວມຂັງໃນລະດັບສູງ ເຊິ່ງເປັນອຸປະສັກສຳຄັນຕໍ່ການອຳນວຍຄວາມຊ່ວຍເຫຼືອຂອງເຈົ້າໜ້າທີ່ ພ້ອມດ້ວຍການເກີດພະຍາດລະບາດ.

ທັງນີ້, ໂອຊີເອຈ໌ເອ ແລະ ໜ່ວຍງານພັນທະມິດ ນໍາໂດຍອົງການກາແດງສາກົນ (IFRC: International Federation of Red Cross and Red Crescent Societies) ຕັ້ງເປົ້າໄວ້ວ່າປະຊາຊົນ 600.000 ຄົນ ຕ້ອງໄດ້ຮັບຄວາມຊ່ວຍເຫຼືອພາຍໃນບໍ່ເທົ່າໃດອາທິດຈາກນີ້ ໂດຍຫຼາຍກວ່າເຄິ່ງ ຢູ່ໃນປະເທດໂມຊໍາບິກ ເຊິ່ງເປັນປະເທດທີ່ໄດ້ຮັບຄວາມເສຍຫາຍຫຼາຍທີ່ສຸດ ທາງດ້ານລັດຖະບານລາຍງານວ່າ ປະຊາຊົນ 350.000 ຄົນ ກໍາລັງລໍຖ້າຄວາມຊ່ວຍເຫຼືອ ຂະນະທີ່ ຈໍານວນຜູ້ເສຍຊີວິດຢ່າງເປັນທາງການມີຫຼາາຍກວ່າ 200 ຄົນ ແຕ່ໃນຄວາມເປັນຈິງ ອາດຫຼາຍກວ່າ 1.000 ຄົນ ດ້ານຈໍານວນຜູ້ເສຍຊີວິດໃນຊິມບັບເວ ເພິ່ມຫຼາຍກວ່າ 100 ຄົນ ແຕ່ຍັງສູນຫາຍ ປະມານ 200 ຄົນ ສ່ວນໃນປະເທດມາລາວີ ເຊິ່ງມີປະຊາຊົນຫຼາຍກວ່າ 80.000 ຄົນ ຕ້ອງອົບພະຍົບ ແລະ ເກືອບ 200 ຄົນສູນຫາຍ.

<

ໃນເວລາດຽວກັນ ນານາປະເທດທັງ ອາເມຣິກາ, ອາຟຣິກາໃຕ້, ບອສວານາ, ແທນຊາເນຍ, ນາມິເບຍ ແລະ ແອງໂກລາ ຕະຫຼອດຈົນສະຫະຣາຊະອານາຈັກ, ສະຫະລັດ ອາຣັບເອມິເຣສ (UAE) ແລະ ສະຫະພາບເອີຣົບ (EU) ບໍລິຈາກເງິນ ແລະ ພະຍາຍາມ ສົ່ງມອບຄວາມຊ່ວຍເຫຼືອດ້ວຍການລໍາລຽງທາງຍົນ ແຕ່ສະໜາມບິນຫຼາຍແຫ່ງ ຂອງທັງສາມປະເທດຢູ່ໃນສະພາເສຍຫາຍຈົນບໍ່ສາມາດລົງຈອດໄດ້.