ເສຍຊີວິດ ກວ່າ 100 ຄົນ ຈາກນ້ຳຖ້ວມກະທັນຫັນທີ່ແຂວງປາປົວ ປະເທດອິນໂດເນເຊຍ

307

ຈໍານວນຜູ້ເສຍຊີວິດຈາກເຫດນໍ້າຖ້ວມກະທັນຫັນ ແລະ ດິນເຈື່ອນທີ່ແຂວງປາປົວ ທາງຕາເວັນອອກສຸດຂອງປະເທດອິນໂດເນເຊຍ ເຊິ່ງເກີດຂຶ້ນເມື່ອອາທິດຜ່ານມາ ເພີ່ມຫຼາຍກວ່າ 100 ຄົນ.

ສໍານັກຂ່າວຕ່າງປະເທດລາຍງານຈາກນະຄອນຫຼວງຈາກາຕ້າ ປະເທດອິນໂດເນເຊຍ ເມື່ອວັນອັງຄານ ທີ 18 ມີນາ ວ່າ ສໍານັກງານບໍລິຫານຈັດການໄພພິບັດແຫ່ງຊາດ (BNPB: Badan Nasional Penanggulangan Bencana) ໄດ້ລາຍງານເມື່ອວັນພຸດ ຜ່ານມາ ວ່າ ຈໍານວນຜູ້ເສຍຊີວິດຈາກອຸທົກກະໄພ ແລະ ດິນເຈື່ອນກະທັນຫັນທີ່ແຂວງປາປົວ ພາກຕາເວັນອອກສຸດຂອງປະເທດ ເຊິ່ງເກີດຂຶ້ນເມື່ອທ້າຍອາທິດ ທີ່ຜ່ານມາ ເພິ່ມຂຶ້ນຫຼາຍກວ່າ 100 ຄົນ ແລະ ມີຜູ້ໄດຮັບບາດເຈັບອີກ 160 ຄົນ ໃນຈໍານວນນີ້ 85 ຄົນມີອາການສາຫັດ. ຢ່າງໃດກໍ່ຕາມ, ຈໍານວນຜູ້ເສຍຊີວິດ ແລະ ໄດ້ຮັບບາດເຈັບອາດຈະມີການປ່ຽນແປງ ເນື່ອງຈາກໜ່ວຍກູ້ໄພລາຍງານຊື່ຜູ້ສູນຫາຍຢ່າງເປັນທາງການ 79 ຄົນ.

ທັງນີ້ ລາຍງານຂອງ ບີເອັນພີບີ ລະບຸດ້ວຍວ່າ ພື້ນທີ່ໄດ້ຮັບຄວາມເສຍຫາຍຫຼາຍທີ່ສຸດຄືເມືອງຈາຢາປູຣາ ເຊິ່ງເປັນເມືອງເອກຂອງແຂວງປາປົວ ເນື່ອງຈາກເກີດດິນເຈື່ອນຕາມແລວພູໄຊຄັອບ ທີ່ຕັ້ງຢູ່ທາງຝັ່ງຕາເວັນຕົກຂອງເມືອງ ນອກຈາກນີ້, ໄພພິບັດທາງທໍາມະຊາດຄັ້ງນີ້ ຍັງສົ່ງຜົນໃຫ້ປະຊາຊົນ ເກືອບ 10.000 ຄົນ ຕ້ອງໄຮ້ທີ່ຢູ່ອາໄສ ທາງດ້ານກອງທັບທະຫານ ແລະ ຕໍາຫຼວດລະດົມກໍາລັງເຈົ້າໜ້າທີ່ໃຫ້ຄວາມຊ່ວຍເຫຼືອປະຊາຊົນຢ່າງໃກ້ຊິດ. ອີກປະການໜຶ່ງ, ແຂວງປາປົວ ປະເທດອິນໂດເນເຊຍ ຕັ້ງຢູ່ເທິງເກາະນິວກີນີ ໂດຍມີຊາຍແດນພາກຕາເວັນອອກຕິດກັບປະເທດປາປົວກີນີ ແລະ ມີຕາຝັ່ງຂອງນະຄອນຫຼວງພອດມອສບີ ໃກ້ກັບຕາຝັ່ງຂອງປະເທດອົສຕຣາລີ ພຽງ 150 ກິໂລແມັດ.