ໂຄວິດ ໂຕການ! ງົດມອບລາງວັນ ບັລລົງ ດໍ ຮອບ 64 ປີ

540

ຟຣອງຊ໌ ຟຸດບອລ ວາລະສານຊັ້ນນໍາຂອງຝຣັ່ງ ປະກາດງົດພິທີມອບລາງວັນ ບັລລົງ ດໍ ຄັ້ງທໍາອິດໃນຮອບ 64 ປີ ຕາມການປະກາດຢືນຢັນໃນວັນຈັນທີ 20 ກໍລະກົດ ທີ່ຜ່ານມາ ຫຼັງຈາກທີ່ ໂຄວິດ 19 ສົ່ງຜົນກະທົບຕໍ່ການແຂ່ງຂັນບານເຕະ.

ລາງວັນດັ່ງກ່າວ ຕັດສິນດ້ວຍການໂຫວດຂອງຜູ້ສື່ຂ່າວ ແລະ ຈັດໂດຍວາລະສານ ຟຣອງຊ໌ ຟຸຸດບອລ ເປັນການມອບລາງວັນໃຫ້ແກ່ນັກເຕະທີ່ດີທີ່ສຸດຂອງໂລກ ເຊິ່ງຈັດມາຕັ້ງແຕ່ປີ 1956 ແລະ ເລີ່ມມອບໃຫ້ກັບນັກເຕະຍິງ ເມື່ອປີ 2018 ເປັນຕົ້ນມາ.

ຫຼ້າສຸດ ທ່ານ ປາສຄາລ ແຟເຣ ບັນນາທິການຂອງ ຟຣອງຊ໌ ຟຸດບອລ ອອກຖະແຫຼງການກ່ອນຍົກເລີກວ່າ: “ ຕາມແງ່ຂອງກີລາ, ຂອບເວລາພຽງ 2 ຈາກ 11 ເດືອນ ເພື່ອນຮອບຮວມຄວາມເປັນ ແລະ ຊີ້ຂາດວ່າ: ໃຜຄືນັກເຕະທີ່ເໝາະສົມກັບລາງວັນ, ມັນຍັງໜ້ອຍເກີນກວ່າ ຈະປະເມີນ ແລະ ຕັດສິນ, ແຕ່ຢ່າລືມວ່າການແຂ່ງຂັນທີ່ຜ່ານໄປແລ້ວ ຫຼື ກໍາລັງແຂ່ງຂັນ ຢູ່ພາຍໃຕ້ເງື່ອນໄຂພິເສດ ( ປະສະຈາກຜູ້ຊົມ ແລະ ປ່ຽນຕົວໄດ້ 5 ຄົນ ) ”.

ສໍາລັບ ຕົວເຕັງປະຈໍາປີ 2020 ກ່ອນຍົກເລີກ ໄດ້ແກ່ ໂຣເບິດ ເລວານດອຟສະກີ ກອງໜ້າຂອງ ບາເຢິນ ມິວນິກ ຍິງໄປ 50 ປະຕູ ລວມທຸກລາຍການ ແລະ ລຸ້ນຄວ້າ 3 ແຊັມໃນລະດູການນີ້ກັບທີມ, ສ່ວນ ລິໂອເນລ ເມສຊີ ກອງໜ້າຂອງ ບາເຊໂລນາ ເຈົ້າຂອງລາງວັນນີ້ 6 ສະໄໝ ກາຍເປັນນັກເຕະຄົນທໍາອິດທີ່ຍິງ 20 ປະຕູ ແລະ ສົ່ງໃຫ້ໝູ່ຍິງ 20 ປະຕູໃນລະດູການດຽວ.