ທາງການ! ມູຣິນໂຢ ຄຸມທີມແທນ ພ້ອມສັນຍາ 3 ປີ

459

ສະເປີ ປະກາດ ແຕ່ງຕັ້ງ ມູຣິນໂຢ ເປັນຫົວໜ້າຄູຝຶກຄົນໃໝ່ ພ້ອມເຊັນສັນຍາຍາວ ຮອດປີ 2023 ໂດຍ ມູຣິນໂຢ ກ່າວວ່າດີໃຈ ແລະ ຕື່ນເຕັ້ນທີ່ສຸດ ທີ່ໄດ້ກັບມາເຮັດວຽກທີ່ຍິ່ງໃຫຍ່ກັບ ສະເປີ ແລະ ຊົມເຊີຍສູນເຍົາວະຊົນຂອງທີມດ້ວຍວ່າ ມີຄຸນນະພາບສູງ.

ທັອດແນັມ ຮັອດສະເປີ ສະໂມສອນຍັກໃຫຍ່ຈາກເວທີພຣີເມຍລີກ ຂອງອັງກິດ ໄດ້ປະກາດແຕ່ງຕັ້ງ ໂຊເຊ ມູຣິນໂຢ ເປັນຜູ້ຈັດການຄົນໃໝ່ຂອງພວກເຂົາເປັນທີ່ຮຽບຮ້ອຍແລ້ວ ໂດຍທັງສອງຝ່າຍໄດ້ເຮັດສັນຍາກັນຈົນເຖິງໄລຍະປິດລະດູການ ປີ 2023.

ມູຣິນໂຢ ກ່າວ ມີຄວາມຮູ້ສຶກດີໃຈຫຼາຍ ທີ່ໄດ້ມາຮ່ວມງານກັບທີມຊັ້ນນຳ ເຊັ່ນ ສະເປີ “ຂ້ອຍຮູ້ສຶກຕື່ນເຕັ້ນທີ່ໄດ້ມາເຮັດວຽກກັບສະໂມສອນທີ່ມີປະເພນີທີ່ດີ ແລະ ມີແຟນບານເຕະທີ່ມີອາລົມຮ່ວມສູງ, ຄຸນນະພາບທັງໃນດ້ານຂຸມກຳລັງ ແລະ ສູນເຍົາວະຊົນທີ່ມີປະສິດທິພາບ ເຮັດໃຫ້ຂ້ອຍຮູ້ສຶກຕື່ນເຕັ້ນຫຼາຍ ການໄດ້ຮ່ວມງານກັບບັນດານັກເຕະເຫຼົ່ານີ້ ເປັນສິ່ງທີ່ເຮັດໃຫ້ຂ້ອຍສົນໃຈມາເຮັດວຽກຢູ່ທີ່ນີ້ “.

ດ້ານ ປະທານສະໂມສອນ ທ່ານດານຽວ ເລວີ ໄດ້ກ່າວຍ້ອງຍໍ ມູຣິນໂຢ ວ່າ “ເປັນຫົວໜ້າຄູຝຶກທີ່ປະສົບຜົນສຳເລັດຢ່າງຫຼວງຫຼາຍ ແລະ ຍັງມີກົນລະຍຸດດ້ານແທັກຕິກອີກດ້ວຍ ໂຊເຊ ເປັນໜຶ່ງໃນຫົວໜ້າຄູຝຶກທີ່ປະສົບຜົນສຳເລັດຫຼາຍທີ່ສຸດໃນວົງການບານເຕະ, ມີປະສົບການສູງ, ສາມາດສ້າງແຮງກະຕຸ້ນໃຫ້ກັບທີມໄດ້ ແລະ ເປັນນັກວາງແຜນທີ່ໂດດເດັ່ນ ນອກຈາກນີ້ ກໍ່ຍັງພາທີມໄດ້ແຊັມຫຼາຍລາຍການກັບທຸກໆທີມທີ່ໄດ້ຮ່ວມວຽກ. ສະນັ້ນ ພວກເຮົາເຊື່ອວ່າ ມູຣິນໂຢ ຈະນຳຄວາມສຳເລັດ, ຄວາມເປັນທີມ ແລະ ຄວາມໝັ້ນໃຈກັບມາສູ່ຫ້ອງແຕ່ງຕົວຂອງພວກເຮົາ”.

ສຳລັບ ການແຂ່ງຂັນນັດທຳອິດຂອງ ມູຣິນໂຢ ໃນຖານະຫົວໜ້າຄູຝຶກຂອງ ສະເປີ ຈະເປັນການແຂ່ງຂັນໃນລີກ ພາທີມບຸກໄປຢາມ ເວສແຮັມ ຢູໄນເຕັດ ທີ່ສະໜາມລອນດອນ ສະເຕດຽມ  ວັນເສົາ ທີ 23 ພະຈິກ ນີ້ ໂດຍຍັງບໍ່ມີການເປີດເຜີຍ ວ່າ ການຖະແຫຼງຂ່າວເປີດຕົວ ມູຣິນໂຢ ຕໍ່ໜ້າສື່ມວນຊົນເມື່ອໃດ.