ສະເປີ ເປີດໂຕະເຈລະຈາດຶງ ມູຣິນໂຢ ຄຸມທີມ ຄາດຄຸມທີມໄວໆນີ້

538

ສະກາຍ ສະປອດ ສື່ກີລາຂອງອັງກິດ ລາຍງານ ສະເປິ ໄດ້ເຈລະຈາກັບ ໂຊເຊ ມູຣິນໂຢ ເພື່ອດຶງຕົວໃຫ້ເປັນຫົວໜ້າຄູຝຶກຄົນໃໝ່. ນອກຈາກນີ້, ທັງສອງຝ່າຍຍັງເຊື່ອວ່າ ການເຈລະຈາໃກ້ຈະໄດ້ຂໍ້ສະຫຼຸບທຸກຢ່າງ ແລະ ອາດຈະແລ້ວສົມບູນ ໃນວັນພຸດ ນີ້.

ທັອດແນັມ ຮັອດສະເປີ ສະໂມສອນຈາກເວທີພຣີເມຍ ລີກ ຂອງອັງກິດ ກໍາລັງເຈລະຈາກັບ ໂຊເຊ ມູຣິນໂຢ ຫົວໜ້າຄູຝຶກທີ່ມີຊື່ສຽງທີ່ກຳລັງວ່າງວຽກເຂົ້າມາຮັບວຽກໃຫ້ກັບທີມ ຕາມລາຍງານຂອງສະກາຍ ສະປອດ ສື່ກີລາຊັ້ນນຳຂອງອັງກິດ.

ສະເປີ ຫາກໍ່ສັ່ງປົດ ມາວຣິຊິໂອ ໂປເຊັດຕິໂນ ຫົວໜ້າຄູຝຶກຊາວອາເຈນໄຕ ແບບກະທັນຫັນ ເມື່ອວັນອັງຄານ ວັນທີ 19 ພະຈິກ ຜ່ານມາ ເນື່ອງຈາກລະດູການນີ້ ພາທີມສ້າງຜົນງານໄດ້ໜ້າຜິດຫວັງຫຼາຍ ໃນລີກຫຼັງຜ່ານການແຂ່ງຂັນໄປແລ້ວ 12 ນັດ ມີພຽງ 14 ຄະແນນ ຊະນະ 3 ສະເໝີ 5 ແພ້ 4 ຢູ່ອັນດັບທີ 14 ຫ່າງຈາກລີເວີພູລ ທີມນຳອັນດັບ 1 ເຖິງ 20 ຄະແນນ ຜິດຄາດຈາກແຕ່ລະລະດູການກ່ອນໜ້ານີ້ ທີ່ພາທີມມີຜົນງານໂດດເດັ່ນມາໂດຍຕະຫຼອດ.

ສະກາຍ ສະປອດ ກ່າວຕື່ມວ່າ ທັງ ສະເປີ ແລະ ໂຊເຊ ມູຣິນໂຢ ຕ່າງກໍ່ເຊື່ອວ່າ ແຕ່ລະຝ່າຍຈະບັນລຸຂໍ້ຕົກລົງຮ່ວມກັນໄດ້ແລ້ວ ໂດຍຄາດຈະໄດ້ຂໍ້ສະຫຼຸບ ໃນວັນພຸດ ທີ 20 ພະຈິກ (ຕາມເວລາທ້ອງຖິ່ນ) ແລະ ຫົວໜ້າຄູຝຶກຊາວປັອກຕຸຍກາລ ກໍ່ຈະໄດ້ຄຸມທີມ ນັດທຳອິດ ໃນລີກ ທີ່ ສະເປີ ຈະອອກໄປຢາມ ເວສແຮັມ ຢູໄນເຕັດ ວັນເສົາ ທີ 23 ພະຈິກ ນີ້ທັນທີ.

ກ່ອນໜ້ານີ້, ມີຂ່າວລືອອກມາແລ້ວວ່າ ມູຣິນໂຢ ມີຄວາມສົນໃຈຢາກກັບເຂົ້າມາຄຸມທີມໃນລີກອັງກິດອີກຄັ້ງ ເນື່ອງຈາກມີສະຖິຕິທີ່ໂດດເດັ່ນ ທັງກັບ ເຊລຊີ ແລະ ແມນເຊັສເຕີ ຢູໄນເຕັດ ແລະ ຕ້ອງການສ້າງປະຫວັດສາດເປັນຫົວໜ້າຄູຝຶກຄົນທຳອິດ ທີ່ໄດ້ແຊັມລາຍການໃຫຍ່ກັບທີມໃນປະເທດອັງກິດເຖິງ 3 ທີມ.