ສະເປີ ສັ່ງປົດ ໂປເຊັດຕິໂນ ອອກຈາກຫົວໜ້າຄູຝຶກຫຼັງຜົນງານຕົກຕໍ່າ

584

ເປັນການສັ່ງປົດແບບຟ້າຜ່າ ເມື່ອ ສະເປີ ປະກາດ ໄລ່ ມາວຣິຊິໂອ ໂປເຊັດຕິຟນ ຈາກການເປັນ ຫົວໜ້າຄູຝຶກຂອງສະໂມສອນແລ້ວ ນອກຈາຫົວໜ້າຄູຜຶກແລ້ວ ຍັງມີທີມງານຂອງລາວກໍ່ຖືກປົດອອກເຊັ່ນກັນ ເພື່ອເປັນການຮັບຜິດຊອບຕໍຜົນງານທີ່ຕົກຕໍ່າໃນລະດູການນີ້.

ທັອດແນັມ ຮັອດສະເປີ ສະໂມສອນຍັກໃຫຍ່ຈາກເວທີພຣີເມຍລີກ ຂອງອັງກິດ ໄດ້ອອກຖະແຫຼງການວ່າ ມາວຣິຊິໂອ ໂປເຊັດຕິໂນ (Mauricio Pochettino) ຖືກປົດອອກຈາກຕຳແໜ່ງຫົວໜ້າຄູຝຶກເປັນທີ່ຮຽບຮ້ອຍແລ້ວ ເມື່ອວັນອັງຄານ ທີ 19 ພະຈິກ ທີ່ຜ່ານມາ ຫຼັງຈາກທີມມີຜົນງານທີ່ໜ້າຜິດຫວັງ ໃນລະດູການນີ້.

ຖະແຫຼງການຂອງ ສະເປີ ລະບຸວ່າ ຫົວໜ້າຄູຝຶກຊາວອາເຈນໄຕ ທີ່ຄຸມທີມມາດົນ 5 ປີ ແລະ ໄດ້ສ້າງປະຫວັດສາດ ໃນການພາຕົ້ນສັງກັດຜ່ານເຂົ້າສູ່ຮອບຊີງຊະນະເລີດ ການແຂ່ງຂັນບານເຕະ ຢູຟາ ແຊມປ້ຽນລີກ ລະດູການຜ່ານມາ ລວມທັງທີມງານ ເຮຊູສ ເປເຣຊ (Jesus Perez), ມິເກລ ດາ ຄອສຕ້າ (Miguel da Costa) ແລະ ອັນໂຕນິໂອ ຊິມິເນສ ( Antonio Jiminez) ກໍ່ຖືກປົດອອກຈາກໜ້າທີ່ຢ່າງເປັນທາງການ.

ຢ່າງໃດກໍ່ຕາມ ໂປເຊັດຕິໂນ ກໍ່ພັດມີຜົນງານອັນໜ້າຜິດຫວັງຫຼາຍໃນລະດູການນີ້ ເມື່ອລາວພາສະໂມສອນຄວ້າໄຊຊະນະໄດ້ພຽງ 3 ນັດ ຈາກ 12 ນັດທຳອິດ ໃນພຣີເມຍລີກ ອັງກິດ ຂອງລະດູການນີ້ ສົ່ງຜົນໃຫ້ທີມມີແຕ້ມ 14 ຄະແນນ ຢູ່ອັນດັບທີ 14 ແລະ ມີຄະແນນຕາມຫຼັງ ລີເວີພູລ ທີມອັນດັບ 1 ເຖິງ 20 ຄະແນນ.