ແມນຢູ ຕົກລົງກັບ ເລສເຕີ ຊື້ ແມັກໄກວ ເສີມທີມ 85 ລ້ານປອນ

423

ແມນເຊັສເຕີ ຢູໄນເຕັດ ແລະເລສເຕີ ຊິຕີ້ ສອງສະໂມສອນຈາກພຣີເມຍ ລີກ ຂອງອັງກິດ ສາມາດຕົກລົງຄ່າຕົວຂອງ ແຮຣີ່ ແມັກໄກວກອງຫຼັງທີມຊາດອັງກິດ ໄດ້ແລ້ວ ຄາດ 85 ລ້ານປອນ ກາຍເປັນກອງຫຼັງທີ່ມີຄ່າຕົວແພງທີ່ສຸດໃນໂລກ.

ແມນເຊັສເຕີ ຢູໄນເຕັດໃຫ້ຄວາມສົນໃຈ ແຮຣີ່ ແມັກໄກວ ເພື່ອດຶງຕົວເຂົ້າມາເສີມແນວຮັບໃຫ້ມີຄວາມແຂງແກ່ນຫຼັງລະດູການຜ່ານມາປະສົບກັບບັນຫາກອງຫຼັງຫຼາຍຄົນບາດເຈັບ ແລະ ຜົນງານບໍ່ດີ.

ການເຈລະຈາ ລະຫວ່າງ ແມນຢູ ກັບເລສເຕີ ນັ້ນ ຍືດເຍື້ອມາດົນຫຼາຍເດືອນ ໂດຍສະເພາະບັນຫາຄ່າຕົວຂອງກອງຫຼັງທີມຊາດອັງກິດທີ່ແມນຢູ ຍື່ນໄປໃຫ້ ເລສເຕີ ຫຼາຍຄັ້ງ ແຕ່ກໍ່ບໍ່ກົງກັບຄວາມຕ້ອງການຂອງທີມທີ່ມີເຈົ້າຂອງເປັນມະຫາເສດຖີຈາກປະເທດໄທ.

ຈົນຫຼ້າສຸດ ເມື່ອຄໍ່າວັນສຸກທັງສອງສະໂມສອນ ກໍ່ສາມາດຕົກລົງຄ່າຕົວຂອງ ແມັກໄກວ ໄດ້ແລ້ວ ຄາດວ່າຈະປະມານ 85 ລ້ານປອນ(ປະມານ 895 ຕື້ກີບ) ໂດຍຕົວນັກເຕະຈະເຂົ້າສູ້ຂັ້ນຕອນການກວດສະພາບຮ່າງກາຍ ໃນວັນເສົາ ທີ3 ສິງຫານີ້ ທັນທີ.