ນຸ້ນ ທິດາຈັນ ສາວງາມພ້ອມຄວາມສາມາດໃນເວທີ ນາງສາວລາວ 2021

50

ຖ້າເວົ້າເຖິງຄົນທີ່ງາມ ແລະ ພຽບພ້ອມທັງຄວາມຮູ້ຄວາມສາມາດ ໃນເວທີນາງສາວລາວ Miss Laos 2021ນີ້ ຖືໄດ້ວ່າສາວງາມຄົນນີ້ເປັນໂຕເຕັງເລີຍກໍວ່າໄດ້ ແລະ ທີ່ສຳຄັນສາວຄົນນີ້ໄດ້ຜ່ານເຂົ້າຮອບຄັດເລືອກ 30ຄົນແລ້ວ ມາເຊຍຕໍ່ ແລະ ທຳຄວາມຮູ້ຈັກກັນເລີຍ ສໍາລັບ ທິດາຈັນ ວິສີສົມບັດ ຫລື ນຸ້ນ ປັດຈຸບັນອາຍຸໄດ້ 22ປີ ໝາຍເລກ ML10 ຈາກນະຄອນຫຼວງວຽງຈັນ. ຈົບການສຶກສາ ສົກຮຽນ 2020-2021 ທີ່ມະຫາວິທະຍາໄລແຫ່ງຊາດ & ສາຂາ: ການເງິນ-ການທະນາຄານ (ໄດ້ບົດຈົບຊັ້ນດີເດັ່ນ ແລະ ນັກຮຽນດີເດັ່ນຄະແນນສະເລ່ຍ (GPA: 3.5 ຂຶ້ນເມື່ອ) ແລະ ປັດຈຸບັນນີ້ກໍ່ເປັນ External Auditor ຫຼື ນັກກວດສອບບັນຊີພາຍນອກ ເຮັດວຽກໃຫ້ກັບ ບໍລິສັດ Ernst&Young Lao ເຊິ່ງເປັນ 1ໃນ 4ບໍລິສັດ ຍັກໃຫຍ່ທາງດ້ານການກວດສອບ.

ສໍາລັບນຸ້ນ ແມ່ນທີ່ຜ່ານມານ້ອງຍັງບໍ່ເຄີຍເຂົ້າຮ່ວມການປະກວດນາງງາມ ຫຼື ງານໃນວົງການບັນເທີງຢູ່ໃສມາກ່ອນເລີຍສ່ວນຫຼາຍແມ່ນມັກໄປເປັນອາສາສະໝັກຊ່ວຍເຫຼືອສັງຄົມ ແລະ ເສັງທຶນໄປແລກປ່ຽນຕ່າງປະເທດຫລາຍກວ່າ ເຊິ່ງເທື່ອນີ້ກໍເປັນຄັ້ງທຳອິດຂອງນ້ອງທີ່ໄດ້ເຂົ້າຮ່ວມການແຂ່ງຂັນຖືໄດ້ວ່າເປັນສິ່ງທີ່ທ້າທາຍ ແລະ ຢາກພິສູດໃຈໂຕເອງ.

ຄະຕິປະຈຳໃຈສຳລັບນ້ອງແມ່ນ: “ກ້າທີ່ຈະລອງສິ່ງໃໝ່ໆ ທ່າມກາງຄວາມຢ້ານ ເພື່ອສັກກະຍາພາບ ແລະ ທັກສະທີ່ດີຂຶ້ນ “ “Dare to try new things in the face of fear for greater potential” ແລະ ທີ່ນ້ອງມີຄວາມສົນໃຈເຂົ້າຮ່ວມການປະກວດນາງສາວລາວກໍເພື່ອຢາກສະແດງ ແລະ ພິສູດໃຫ້ເຫັນຫລາຍມູມມອງຂອງແມ່ຍິງລາວຍຸກໃໝ່ ທີ່ມີໃຈຮັກໃນດ້ານວັດທະນະທຳລາວ ແລະ ທີ່ສຳຄັນຄືການເຂົ້າປະກວດຖືເປັນໂອກາດສຳຄັນທີ່ຜູ້ຍິງ ຫຼື ໂຕນ້ອງເອງ ຈະໄດ້ສະແດງອອກທາງດ້ານຄວາມຄິດ ແລະ ຄວາມສາມາດ. ພ້ອມໄດ້ຊ່ວຍເຫຼືອສັງຄົມ ແລະ  ຍັງເປັນກະບອກສຽງໃນການສົ່ງເສີມອະນຸລັກວັດທະນະທຳຄວາມເປັນລາວທີ່ຄຽງຄູ່ກັນໄປກັບໂລກໃນປັດຈຸບັນ.

ສິ່ງທີ່ນ້ອງຈະໂຊຫຍັງໃນສິ່ງທີ່ເປັນຄວາມສາມາດຂອງຕົນເອງແມ່ນ ຄວາມສາມາດທີ່ນ້ອງຈະສະແດງໃຫ້ທຸກຄົນເຫັນນັ້ນກໍຄື: ຄວາມສາມາດທີ່ມີຄວາມຕິດພັນນຳນ້ອງມາແຕ່ນ້ອຍ ຂໍໃຫ້ທຸກຄົນຕິດຕາມນຳກັນໃນໄວໆນີ້ ຕອນນີ້ນ້ອງຂໍອຸບໄວ້ກ່ອນໄວ້ໃຫ້ທຸກຄົນໄດ້ລຸ້ນ ແລະ ຕິດຕາມໄປນຳກັນ

ສ່ວນຈຸດເດັ່ນຂອງນ້ອງທີ່ນ້ອງຄິດວ່າຈະເອົາຊະນະໃຈຄະນະກຳມະການກໍຄື: ທາງດ້ານທັດສະນະຄະຕິ, ຄວາມຄິດ-ຄວາມສາມາດ ແລະ ຄວາມອ່ອນນ້ອມຖ່ອມຕົນ ທີ່ນ້ອງເຊື່ອວ່າທຸກຄົນມີ ແຕ່ຈະມີຄວາມເປັນເອກະລັກສະເພາະໃຜລາວ.

ກ່ອນການປະກວດການແຂ່ງຂັນນ້ອງໄດ້ມີການກຽມໂຕທາງດ້ານຈິດໃຈ, ທາງດ້ານຄວາມຮູ້ ແລະ ທາງດ້ານບຸກຄະລິກກະພາບ ເພື່ອກຽມພ້ອມໃນການແຂ່ງຂັນ.

ຖ້າໄດ້ຕຳແຫນ່ງສິ່ງທີ່ນ້ອງຢາກຈະປະກອບສ່ວນໃນການຊ່ວຍເຫລືອສັງຄົມ ຄືນ້ອງຢາກຈະສານຕໍ່ສິ່ງທີ່ນ້ອງໄດ້ເວົ້າກັບຄະນະກຳມະການໃນຮອບເລືອກກໍຄື ການສ້າງໂຄງການ ຫລື ເຜີຍແຜ່ຄວາມຮູ້ກ່ຽວ ພາວະການເປັນຜູ້ນຳ ຫລື Leadership skill ໃນແກ່ໄວຫນຸ່ມ ຫລື ເດັກນ້ອຍໂດຍສະເພາະເດັກຍິງ ເພື່ອສົ່ງເສິມບົດບາດທາງສັງຄົມ ແລະ ຫລຸດຜ່ອນອັດຕາການຖືພາກ່ອນໄວອັນຄວນ.

ການປະກວດນາງສາວລາວປີນີ້ ເປັນບາດກ້າວທຳອິດໃນການເຂົ້າວົງການບັນເທິງຂອງນ້ອງ ຜົນງານຄັ້ງນີ້ຝາກອ້າຍເອື້ອຍ ແລະ ຫມູ່ຕິດຕາມ ແລະ ລຸ້ນໄປພ້ອມກັບການປະກວດ.

ສຸດທ້າຍນີ້ແອັດມິນຂໍຝາກທຸກຄົນໃນການຕິດຕາມເຊຍ ແລະ ໃຫ້ກຳລັງໃຈສາວງາມທີ່ມາພ້ອມກັບຄວາມຮູ້ຄວາມສາມາດ ແລະ ມີເປົ້າຫມາຍຢ່າງຊັດເຈນຄົນນີ້ດ້ວຍ ສໍາລັບຊ່ອງທາງໃນການຕິດຕາມ ສາມາດຕິດຕາມໄປທີ່ເຟສບຸກສ່ວນຕົວຂອງນ້ອງກໍຄື N’noon Thidachanh ແລະ ເພຈຂອງໂຄງການປະກວດ ນາງສາວລາວ Miss Laos ນັ້ນເອງ.

 

ຮູບ: N’noon Thidachanh