ຮອບພິເສດສາຍຮູບເງົາ “ໄຂ່ຂວັນ” ມ່ວນຊົນໃຫ້ການຕອບຮັບເປັນຢ່າງດີ

709

ຈົບລົງໄປສໍາລັບຮອບພິເສດສາຍຮູບເງົາ “ໄຂ່ຂັວນ” ມື້ຮັກໝົດໃຈ ໃນຕອນຄໍ່າມື້ວານນີ້ (10 ກໍລະກົດ 2019) ທີ່ໂຮງຮູບເງົາສູນການຄ້າວຽງຈັນເຊັນເຕີ ແລະປັດຈຸບັນແມ່ນເຂົ້າສາຍຢ່າງເປັນທາງການທຸກໂຮງຮູບເງົາທົ່ວປະເທດແລ້ວໃຜທີ່ຍັງບໍ່ທັນໄປຊົມ ກໍສາມາດໄປຊົມໄດ້

ເຊິ່ງມາຊົມພາບບັນຍາກາດງານມື້ວານນີ້ເລີຍ ມີບັນນດາສື່ມວນຊົນ, ໝູ່ເພື່ອນດາລາສິນລະປິນ ຄົນດັງ ແລະ ມ່ວນຊົນເຂົ້າຮ່ວມຢ່າງຄຶກຄື້ນ

ຮູບເງົາເລື່ອງ “ໄຂ່ຂວັນ” ເປັນຮູບເງົາລາວເນື້ອເລື່ອງໂດຍຫຍໍ້ເວົ້າເຖິງ: ໄຂ່ ຊາຍໜຸ່ມຜູ້ບັງເອີນພົບພະລັງວິເສດ ສາມາດເບິ່ງເຫັນ ວັນທີ່ຄວາມຮັກໝົດອາຍຸໄດ້ ແຕ່ຕ້ອງດຶງຂົນດັງຂອງລາວກ່ອນ ເຖິງແມ່ນວ່າ ໄຂ່ຈະຮູ້ມື້້ທີ່ຕ້ອງເລີກກັບແຟນຂອງຕົນເອງ ກ່ອນວັນແຕ່ງງານບໍ່ພໍເທົ່າໃດມື້ ລາວກໍ່ບໍ່ສາມາດແກ້ໄຂຫຍັງໄດ້.

ໄຂ່ຈຶ່ງອອກເດີນທາງຄົນດຽວເພື່ອຫຼົບໜ້າ ຄອບຄົວ ແລະຄົນອ້ອມຂ້າງທີ່ບໍ່ເຂົ້າໃຈການຕັດສິນໃຈຍົກເລີກງານແຕ່ງກະທັນຫັນຂອງລາວ. ຂວັນຍິງສາວໜ້າຕາດີ ບັງເອີນພົບໄຂ່ ທີ່ສະຖານີລົດເມ. ຂວັນ ອ້າງວ່າເປັນໝູ່ເກົ່າສະໄໝຮຽນປະຖົມ ແລະ ຂໍຮ້ອງໃຫ້ໄຂ່ຍອມໃຫ້ນາງອອກເດີນທາງໄປນຳ ເພາະນີ້ອາດແມ່ນການເດີນທາງຄັ້ງສຸດທ້າຍຂອງນາງແລ້ວ ແລະ ນາງກໍ່ມີເວລາອີກບໍ່ດົນ ເພາະນາງກຳລັງຈະເສຍຊີວິດຍ້ອນພະຍາດຮ້າຍແຮງ.

ເມື່ອຕ້ອງມີເພື່ອນຮ່ວມທາງ ທີ່ບໍ່ໄດ້ຮັບເຊີນ ການເດີນທາງຂອງທັງສອງ ກາຍເປັນປະສົບການ ອັນວຸ້ນວາຍຂອງໄຂ່ ຈາກການວາງແຜນຢ່າງ ລະອຽດລະອໍຂອງຂວັນ. ທ້າຍທີ່ສຸດແລ້ວ ພວກເຂົາທັງສອງຈະພົບຄວາມຮັກທີ່ບໍ່ມີວັນໝົດອາຍຸໄດ້ແທ້ບໍ່? ໄປຊົມນໍາກັນທີ່ໂຮງຮູບເງົາໄດ້ເລີຍ

ຮູບເງົານີ້ເປັນການສ້າງຂອງ ລາວ ນີວເວບ ຊິເນມາ ໂປຣດັກຊັນ ຜູ້ກຳກັບແມ່ນ ອານິໄຊ ແກ້ວລາ ຮ່ວມກັບພອນສະຫວັນ ແສງພະຈັນ (ລຸງໜວດ) ແລະ ລີ ພົງສະຫວັນ ເຊິ່ງແຕ່ລະຄົນຕ່າງກໍ່ເປັນຜູ້ທີ່ມີຊື່ສຽງໃນວົງການບັນເທີງລາວຢູ່ແລ້ວ.

ມີນັກສະແດງນໍາຄືລູກນໍ້າ – ທິດາລັດ ວົງສິລິ ຊຸບເປີສະຕາລາວທີ່ມີຊື່ສຽງໂດ່ງດັງຢູ່ຕອນນີ້ຮ່ວມສະແດງຄູ່ກັບພະເອກໜຸ່ມຄື ຕ໋ອງ – ອາທິດອຸໄທ ວົງໄຊຊະນະ ວົງ Idolz.