ເອົາໃຈໄປເລີຍ! ໂຈວເຫວິນຟະ ຕັ້ງໃຈບໍລິຈາກຊັບສິນທັງໝົດມອບໃຫ້ອົງກອນການກຸສົນ ຫຼັງຈາກເສຍຊີວິດໄປແລ້ວ

420

ຊີວິດທີ່ຮຸ່ງເຮືອງສູ່ຈຸດສູງສຸດຂອງນັກສະແດງຮົງກົງລຸ້ນໃຫຍ່ເຊັ່ນ ໂຈວເຫວິນຟະ ໃຜໆຕ່າງກໍ່ຮູ້ວ່າ ຕົວລາວນັ້ນໜ້າຈະເປັນຄົນທີ່ມີແຕ່ຫຼູຫຼາໄຮໂຊ ແຕ່ວ່າຕົວຕົນທີ່ແທ້ຈິງຂອງລາວນັ້ນເກືອບຄ້າຍໆກັບຄີອານູ ຣີຟ ທີ່ເຮົາຮູ້ຈັກກັນດີພະເອກຮູບເງົາ ຈອນ ວິກ (John Wick) ເລີຍກໍ່ວ່າໄດ້.

ທີ່ເປັນແບບນັ້ນກໍ່ຍ້ອນວ່າ ຕົນບໍ່ເຄີຍຖືຕົວຫຼາຍ ທັກທາຍມິດສະຫາຍແຟນຄລັບສະໝ່ຳສະເໝີ ເປັນບຸກຄົນທີ່ຕິດດິນທີ່ສຸດ ເຊັ່ນໃນກໍລະນີເດີນທາງດ້ວຍຂົນສົ່ງມວນຊົນ, ຕໍ່ຄິວຊື້ປີ້ເບິ່ງຮູບເງົາທີ່ຕົນເອງສະແດງ, ໃຊ້ເງິນບໍ່ເກີນ 8 ແສນກີບ ຕໍ່ເດືອນ, ໃຊ້ໂທລະສັບໂນເກຍລູ້ນເກົ່າ ແຖມຍັງມີຄວາມໃຈບຸນຢ່າງຫຼວງຫຼາຍອີກດ້ວຍ.

ຈາກຍຸກຮຸ່ງເຮືງຂອງວົງການຮູບເງົາຮົງກົງ ໂຈວເຫວິນຟະ ສາມາດສ້າງລາຍໄດ້ຈາກການສະແດງໄດ້ຢ່າງມະຫາສານເຊິ່ງຊັບສິນສ່ວນນີ້ ຕົນເອງຄອບຄອງຢູ່ນັ້ນ ມີມູນຄ່າປະມານ 5,6 ຕື້ ໂດລາຮົງກົງ ຫຼື ກວ່າ 6 ພັນຕື້.

ແລະ ຊັບສິນສ່ວນນີ້ທັງໝົດ ຕົນເອງກໍ່ໄດ້ປະກາດມອບໃຫ້ກັບອົງກອນການກຸສົນທັງໝົດ ຫຼັງຈາກທີ່ຕົນເສຍຊີວິດໄປແລ້ວ ໂດຍມີພັນລະຍາຊາວສິງກະໂປເປັນຜູ້ສະໜັບສະໜຸນການຕັດສິນໃຈຂອງຕົນໃນຄັ້ງນີ້ດ້ວຍ.

ໂຈວເຫວິນຟະ ໄດ້ໃຫ້ສໍາພາດກັບທາງສື່ມວນຊົນຂອງເກົາຫຼີໃຕ້ ເມື່ອອາທິດ ທີ່ຜ່ານມາ ກ່ຽວກັບການຕັດສິນໃຈຂອງຕົນໃນຄັ້ງນີ້ວ່າ:

“ເງິນທອງຄືສິ່ງທີ່ທ່ານບໍ່ສາມາດຄອບຄອງໄດ້ຕະຫຼອດໄປ ເມື່ອທ່ານຕ້ອງຈາກໂລກໄປໃນມື້ໃດມື້ໜຶ່ງ ທ່ານກໍ່ຈະຕ້ອງຖິ້ມທຸກຢ່າງໄວ້ໃຫ້ຄົນອື່ນໃຊ້, ທ່ານບໍ່ສາມາດເອົາເງິນໃນບັນຊີໄປໃຊ້ຈ່າຍໄດ້ ຫຼັງຈາກທີ່ ທ່ານເສຍຊີວິດໄປແລ້ວ ແລະ ເມຍຂອງຂ້ອຍ ກໍ່ເຫັນດີເຫັນງາມໃນເລື່ອງນີ້ດ້ວຍ “.

ໂດຍຄາດວ່າ ຊັບສິນທີ່ການກຸສົນຈະໄດ້ຮັບ ຫຼັງຈາກໂຈວເຫວິນຟະ ເສຍຊີວິດ ຈະຖືກນໍາໄປໃຊ້ພັດທະນາຄຸນນະພາບຊີວິດຂອງຊາວຮົງກົງຜູ້ທຸກຍາກ ເນື່ອງມາຈາກບັນຫາຂອງຄວາມເລື່ອມລ້ຳໃນສັງຄົມປະເທດຮົງກົງ.

ທັງນີ້ ສື່ທ້ອງຖິ່ນຮົງກົງ ພະຍາຍາມຕີມູນຄ່າຂອງຊັບສິນຂອງລາວເປັນຈໍານວນມະຫາສານແຕ່ສໍາລັບຕົວລາວເອງພັດບອກວ່າ ບໍ່ຮູ້ຈໍານວນຊັບສິນວ່າຕົວເອງມີຫຼາຍເທົ່າໃດ ເພາະມີຄວາມສຸກດີກັບຊີວິດແບບນີ້ຢູ່ແລ້ວ.