ຜົນງານ ຈາກປາຍປາກກາ ຂອງ ສິນລະປິນດີເດັ່ນສາຂາວັນນະກຳ ດາວວຽງ ບຸດນາໂຄ

660

ທ່ານ ດາວວຽງ ບຸດນາໂຄ ນັກຂຽນ, ນັກກະວີ, ນັກປະພັນເພງ ແລະ ສິລະປິນດີເດັ່ນສາຂາວັນນະກໍາປີ 2011 ເກີດເມື່ອວັນທີ 03/08/1954 – ທີ່ບ້ານຂີ້ນາກ ເມືອງໂຂງ ແຂວງຈໍາປາສັກ – ພໍ່ຊື່ຫຼ່ຽມ ແສງຣາຕຣີ – ແມ່ຊື່ຄໍາປິ່ນ ສີອັກສອນ – ມີອ້າຍນ້ອງຮ່ວມກັນ 11 ຄົນ.

ຈົບຊັ້ນປະຖົມປີ 1968 – ຈົບວິຊາຊີບຄຣູຊັ້ນຕົ້ນ ປິ 1973 – ຈົບວິຊາຊີບຄຣູຊັ້ນກາງ ປີ 1979 – ເປັນປະທານສະໂມສອນນັກຂຽນໜຸ່ມ ປີ 1988 – ເປັນໜຶ່ງໃນຄະນະບໍລິຫານ ສະມາຄົມນັກປະພັນລາວ (ຊຸດ ທີ 1) – ກະວິໃນດວງໃຈ (ສານລີບພະສູນ, ກອນຜະຫຍາພື້ນບ້ານລາວ) – ນັກກະວີໃນດວງໃຈ (ລູງມະຫາແກ້ວ ຫົວໂຂງພຣະໃຫຍ່, ທ່ານ ທອງຄໍາ ອ່ອນມະນີສອນ).

ຊີວິດຂອງທ່ານ ດາວວຽງ ບຸດນາໂຄ ຫຼັງຈາກຮຽນຈົບວິທະຍາໄລຄູຈຳປາສັກແລ້ວກໍຂຶ້ນມາ “ສ່ຽງໂຊກຜະຈົນຊີວິດ” ທີ່ນະຄອນຫຼວງວຽງຈັນ ໂດຍເລີ່ມຕົ້ນຈາກການເປັນນັກຂ່າວສັງກັດໜັງສືພິມ “ສຶກສາໃໝ່”. ດ້ວຍອຸປະນິດໄສ ໃຈຮ້ອນບໍ່ຍອມຄົນ ແລະແນວຄິດເສລີຈຶ່ງໄດ້ລາຈາກວຽກລັດຖະການມາດຳເນີນຊີວິດແບບເສລີຊົນ, ລ້ຽງຊີບດ້ວຍການເປັນນັກຖ່າຍຮູບ, ການສ້າງຄ້າຍມວຍ, ການແຕ່ງບົດເລື່ອງສັ້ນ, ກະວີ, ບົດເພງ.

ຜົນງານຮວມເຫຼັ້ມທີ່ເປັນເລື່ອງສັ້ນແລະບົດກະວີ: ທີ່ລະນຶກ (1990), ຂອງຝາກ, ປຣັຊຍາຫາງອື່ງ, ບັກໂຄນຄົນໄທໃຕ້(ຂຽນຮ່ວມ ປັນຍາ ພັນທະພານິດ), ເຝີຖ້ວຍສຸດທ້າຍ (ພາສາໄທ), ຊີວິດແລະບົດເພງ, ຫິ່ງຫ້ອຍ… ຂຽນເພງປະມານ 300 ເພງ (ມີຫຼາຍເພງດັງຊຶ່ງນັກຮ້ອງລາວແລະໄທນຳໄປຮ້ອງ)

ລາງວັນດ້ານການຂຽນ: ໄດ້ຮັບຫຼຽນນາມມະຍົດສິລະປິນດີເດັ່ນສາຂາວັນນະກຳ ໃນປີ 2011 ຈາກລັດຖະບານແຫ່ງສປປ.ລາວ ອຸດົມຄະຕິໃນຊີວິດ: “ ຄົນອື່ນເຂົາອາດຈະມີສຸກກັນດ້ວຍການມີເງິນຫຼາຍ, ມີເຮືອນຫຼັງໃຫຍ່, ມີລົດຄັນງາມໆຂີ່, ມີຖານະຕຳແໜ່ງດີ, ແຕ່ສ່ວນຕົວຂ້າພະເຈົ້າ ເມື່ອໃດໄດ້ຈັບຄັນປາກກາຂີດເນັ້ນໃສ່ໜ້າເຈ້ຍ-ຂຽນບົດປະພັນ,ກັ່ນເປັນກອນກະວີ, ຄົ້ນຄິດ, ອຸທິດປຣັຊຍາຊີວິດເພື່ອຄົນແລ້ວ, ຮູ້ຕົວວ່າຂ້າພະເຈົ້າເປັນສຸກທີ່ສຸດໃນໂລກ”.

ທ່ານ ດາວວຽງ ບຸດນາໂຄ: ເປັນນັກຂ່າວ ນັກຂຽນເລື່ອງສັ້ນ ບົດກະວີການກອນ – ໂຮມເຣື່ອງສັ້ນ ແລະ ກະວີ ຊື່ “ທີ່ລະນຶກ” ປີ 1990. ໂຮມກະວີຊຸດ “ສຸດທີອ່າວ” ປີ 1992. ໂຮມເຣື່ອງສັ້ນ ຊື່ “ຂອງ-ຝາກ” ປີ 1992.

ປຣັຊຍາ ແສງທຽນຊີວິດ 1994. ຂຽນເພງລູກທົ່ງ ໝໍລໍາ ຫຼາຍກວ່າ 5໐໐ ບົດ. ສາວດົງໂດກ, ສາວສີເມືອງ, ຈົດໝາຍລອຍລົມ, ຊີວິດເດັກເສີບ, ຜູ້ຊາຍປາຍແຖວ, ເຈົ້າຊາຍແດງ, ສາວດົງໂດກ, ຄົນປາຍແຖວ, ຟ້າສູງແຜ່ນດິນຕໍ່າ, ເສດຖີ່ຂີ່ຖີ່… ເປັນອາຣະບັ້ມເພງທີ່ມີຊື່ສຽງ ແລະ ເປັນຕໍານານ.

ບັດນີ້ຄົງເຫຼືອພຽງຜົນງານທີ່ດີຫຼາກຫຼາຍຜົນງານຂອງເພິ່ນທີ່ໄດ້ສ້າງໄວ້ໃຫ້ເຮົາ ແລະ ຄົນລຸ້ນຫຼັງ ເພາະ ທ່ານ ດາວວຽງ ບຸດນາໂຄ ແມ່ນໄດ້ຈາກໄປຢ່າງບໍ່ມີວັນຫວນຄືນອີກແລ້ວໃນວັນທີ 06/03/2019 ລວມອາຍຸໄດ້ 65 ປີ ເຊິ່ງງານປະນາກິດສົບຂອງເພີ່ນແມ່ນໄດ້ບຳເພັນກຸສົນຢູ່ເຮືອນຂອງເພີ່ນເອງ ທີ່ບ້ານ ສີວິໄລ ເມືອງ ໄຊທານີ ນະຄອນຫຼວງວຽງຈັນ.