ລະວັງພາຍຸ! ພາກເໜືອ ກັບ ພາກກາງ

238

ຕາມແຈ້ງການຂອງກົມອຸຕຸນິຍົມ ແລະ ອຸທົກກະສາດ ສະບັບເລກທີ 1113/ກອດທ ລົງວັນທີ 12 ຕຸລາ 2021 ເຕືອນພາຍຸເຂດຮ້ອນ ກົມປາສຸ (KOMPASU) ສະບັບທີ1 ລະບຸວ່າ: ພາຍຸເຂດຮ້ອນກົມປາສຸ, (TS KOMPASU) ຫົວທີ 18, ເຊິ່ງໃນເວລາ 8:00 ໂມງ ຂອງວັນທີ 12 ຕຸລາ 2021 ມີຈຸດສູນກາງຢູ່ເຂດທະເລຈີນໃດ້ຕອນກາງ ໃນເສັ້ນຂະໜານທີ 18.7 ອົງສາເໜືອ ແລະ ເສັ້ນແວງທີ 118,4 ອົງສາຕາເວັນອອກ.

ພາຍຸຫົວນີ້ ກໍາລັງເຄື່ອນທີ່ໃນທິດຕາເວັນຕົກ ດ້ວຍຄວາມໄວ 25 ກິໂລແມັດຕໍ່ຊົ່ວໂມງ ຈະເຄື່ອນທີ່ຜ່ານເກາະໄຮໜຳ ແລະ ຈະສືບຕໍ່ເຄື່ອນທີ່ຂຶ້ນຝັ່ງທາງພາກເໜືອຂອງປະເທດຫວຽດນາມ ໃນຕອນແລງຂອງວັນທີ 14 ຕຸລາ 2021.

May be an image of road and body of water

ໃນໄລຍະວັນທີ 14 ຫາ 15 ຕຸລາ 2021 ພາຍຸຫົວນີ້ຈະສືບຕໍ່ເຄື່ອນທີ່ເຂົ້າຢູ່ໃນລະຫວ່າງເຂດພາກເໜືອດ້ານຕາເວັນອອກ ແລະ ພາກກາງຂອງປະເທດລາວ ເຊັ່ນ: ແຂວງຫົວພັນ, ຊຽງຂວາງ, ໄຊສົມບູນ, ວຽງຈັນ, ນະຄອນຫຼວງວຽງຈັນ, ໄຊຍະບູລີ, ບໍລິຄໍາໄຊ ແລະ ຄຳມ່ວນ. ເຊິ່ງຈະເຮັດໃຫ້ມີຝົນຕົກໃນລະດັບປານກາງ ຫາຕົກໜັກຢູ່ທົ່ວໄປ ແລະ ຕົກໜັກຫຼາຍ ພ້ອມມີລົມພັດແຮງຢູ່ບາງທ້ອງຖິ່ນແຂວງ ພາກກາງ ແລະ ພາກເໜືອດ້ານຕາເວັນອອກ ດັ່ງລາຍລະອຽດລຸ່ມນີ້:

ໄລຍະວັນທີ 13 ຫາ 14 ຕຸລາ 2021: ຈະມີຝົນຕົກປານກາງ ຫາໜັກຢູ່ທົ່ວໄປ ແລະ ຕົກໜັກຫຼາຍ ພ້ອມມີລົມພັດແຮງຢູ່ບາງ ທ້ອງຖິ່ນແຂວງພາກກາງ ແລະ ພາກເໜືອ ເຊັ່ນ: ແຂວງ ສະຫວັນນະເຂດ, ຄໍາມ່ວນ, ບໍລິຄໍາໄຊ, ໄຊສົມບູນ, ວຽງຈັນ, ນະຄອນຫຼວງວຽງຈັນ, ໄຊຍະບູລີ, ບໍ່ແກ້ວ, ຫຼວງນໍ້າທາ, ອຸດົມໄຊ, ຫຼວງພະບາງ, ຊຽງຂວາງ ແລະ ຫົວພັນ.

ໄລຍະວັນທີ 15 ຫາ 16 ຕຸລາ 2021: ຈະມີຝົນຕົກປານກາງຢູ່ເກືອບທົ່ວໄປ ແລະ ໜັກຕົກຫາໜັກຫຼາຍ ພ້ອມມີລົມພັດແຮງຢູ່ ບາງທ້ອງຖິ່ນໃນແຕ່ລະພາກ. ເຊິ່ງຈະເຮັດໃຫ້ເກີດມີຕົ້ນໄມ້ຫັກລົ້ມ, ຫຼັງຄາເຮືອນເປ່ເພ, ນໍ້າຖ້ວມອັ່ງ, ນໍ້າຖ້ວມຍື່ງ ແລະ ດິນເຈື່ອນຢູ່ບາງທ້ອງຖິ່ນ.

ແຈ້ງເຕືອນເຖິງອໍານາດການປົກຄອງທຸກພາກສ່ວນ ໂດຍສະເພາະຜູ້ທີ່ອາໄສຢູ່ລຽບຕາມຮ່ອມພູ, ເປີ້ນພູ ແລະ ແຄມແມ່ນໍ້າຕ່າງໆ ຈົ່ງມີສະຕິລະມັດລະວັງຕໍ່ສະພາບດິນເຈື່ອນ, ນໍ້າຖ້ວມຊູ, ນໍ້າຖ້ວມຍື່ງ ແລະ ລົມພັດແຮງທີ່ຈະເກີດຂຶ້ນໄດ້ໃນໄລຍະນີ້ ພ້ອມທັງກະກຽມຍົກຍ້າຍວັດຖຸສິ່ງຂອງທີ່ມີຄ່າ ແລະ ສັດລ້ຽງໄປໄວ້ບ່ອນທີ່ສູງ ແລະ ປອດໄພ, ຂໍໃຫ້ຕິດຕາມຂ່າວພະຍາກອນອາກາດ ຈາກກົມອຸຕຸນິຍົມ ແລະ ອຸທົກກະສາດ ໃນໄລຍະ 1 ຫາ 4 ວັນຕໍ່ໜ້ານີ້.